جاقىندا نۇرلان ءابدىروۆتىڭ توراعالىعىمەن ورتالىق سايلاۋ كوميسسياسىنىڭ كەزەكتى وتىرىسى ءوتتى. وتىرىسقا ساياسي پارتيالاردىڭ, مەملەكەتتىك قىزمەت ىستەرى اگەنتتىگى, ىشكى ىستەر جانە ادىلەت مينيسترلىكتەرى, باس پروكۋراتۋرا جانە باق وكىلدەرى, بەينەبايلانىس رەجىمىندە وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ اۋماقتىق سايلاۋ كوميسسيالارىنىڭ مۇشەلەرى قاتىستى.
ەڭ اۋەلى ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ سايلاۋ قۇجاتتارىنىڭ نىساندارىن بەلگىلەۋ تۋرالى بايانداما جاسادى.
– ورتالىق سايلاۋ كوميسسيياسى پرەزيدەنت سايلاۋىن وتكىزۋ بويىنشا سايلاۋ قۇجاتتارىنىڭ 18 نىسانىن دايىندادى. اتاپ ايتساق, كانديداتتى ۇسىنۋ بويىنشا قۇجاتتار; اۋماقتىق سايلاۋ كوميسسيالارىنىڭ وكىلەتتىكتەرى شەڭبەرىندە قابىلداناتىن قۇجاتتار; ۋچاسكەلىك سايلاۋ كوميسسيالارىنىڭ وكىلەتتىكتەرى شەڭبەرىندە قابىلداناتىن قۇجاتتار جانە سايلاۋ قۇجاتتارىنىڭ باسقا نىساندارى.
پرەزيدەنتتىككە كانديداتتاردى رەسپۋبليكالىق قوعامدىق بىرلەستىكتەر اتىنان ولاردىڭ جوعارى ورگاندارى ۇسىنادى. پرەزيدەنتتىككە كانديداتتار ۇسىنۋ تۋرالى شەشىم رەسپۋبليكالىق قوعامدىق بىرلەستىكتىڭ جوعارى ورگانى مۇشەلەرىنىڭ جالپى سانىنىڭ كوپشىلىك داۋسىمەن قابىلدانادى جانە حاتتامادان ءۇزىندى كوشىرمەسىمەن رەسىمدەلەدى. رەسپۋبليكالىق قوعامدىق بىرلەستىكتىڭ جوعارى ورگانىنىڭ شەشىمى پرەزيدەنتتىككە كانديداتتىڭ نازارىنا جەتكىزىلەدى. پرەزيدەنتتىككە كانديداتتىڭ داۋىسقا تۇسۋگە كەلىسۋى تۋرالى وتىنىشىمەن بىرگە ورتالىق سايلاۋ كوميسسياسىنا ۇسىنىلادى. رەسپۋبليكالىق قوعامدىق بىرلەستىكتىڭ جوعارى ورگانى حاتتاماسىنىڭ ءۇزىندى كوشىرمەسىندە رەسپۋبليكالىق قوعامدىق بىرلەستىكتىڭ جوعارى ورگانى مۇشەلەرىنىڭ جالپى سانى جانە كانديداتتى ۇسىنۋ تۋرالى داۋىستاردى قولداۋ تۋرالى مالىمەتتەر بولۋعا ءتيىس. سايلاۋ تۋرالى كونستيتۋتسيالىق زاڭدا بەلگىلەنگەن وكىلەتتىكتەرگە سايكەس, ورتالىق سايلاۋ كوميسسياسىنىڭ پرەزيدەنتتىككە كانديداتتىڭ كونستيتۋتسيادا جانە «قازاقستان رەسپۋبليكاسىنداعى سايلاۋ تۋرالى» قر كونستيتۋتسيالىق زاڭىنا قويىلاتىن تالاپتارعا سايكەستىگىن انىقتاۋ تۋرالى حاتتاما قابىلدايدى. اۋماقتىق سايلاۋ كوميسسيالارىنىڭ فۋنكتسيالارىنا قاتىستى بىرقاتار قۇجات ازىرلەندى. بۇدان باسقا مىناداي سايلاۋ قۇجاتتارىنىڭ نىساندارى بار: سايلاۋشىلار ءتىزىمى; پرەزيدەنتتىككە كانديداتتاردى قولداۋ ءۇشىن سايلاۋشىلاردىڭ قولدارىن جيناۋعا ارنالعان قول قويۋ پاراعىنىڭ نىسانى; كانديداتتىڭ كۋالىگى; سەنىم بىلدىرىلگەن ادامنىڭ كۋالىگى; شەت مەملەكەتتىڭ, حالىقارالىق ۇيىمنىڭ بايقاۋشى كۋالىگى, – دەدى ك.پەتروۆ.
پرەزيدەنت سايلاۋىندا پرەزيدەنتتىككە كانديداتتاردىڭ زاڭناما تالاپتارىنا سايكەستىگىن تەكسەرۋدى ۇيىمداستىرۋ تۋرالى ورتالىق سايلاۋ كوميسسياسىنىڭ مۇشەسى شاۆكات وتەمىسوۆ باياندادى.
– بۇعان دەيىن كانديداتقا قويىلاتىن تالاپتار ايتىلدى. بۇدان بولەك, سوت ارەكەتكە قابىلەتسىز دەپ تانىعان, سونداي-اق سوت ۇكىمى بويىنشا باس بوستاندىعىنان ايىرۋ ورىندارىندا وتىرعان ازاماتتاردىڭ سايلاۋعا جانە سايلانۋعا, رەسپۋبليكالىق رەفەرەندۋمعا قاتىسۋعا قۇقىعى جوق. سوتتالعاندىعى بەلگىلەنگەن تارتىپپەن وتەلمەگەن نەمەسە الىپ تاستالماعان, سونىمەن بىرگە, سىبايلاس جەمقورلىق قىلمىس جانە سىبايلاس جەمقورلىق قۇقىق بۇزۋشىلىق جاساۋداعى كىناسىن سوت زاڭدا بەلگىلەنگەن تارتىپپەن تانىعان ادام دا پرەزيدەنتتىككە ۇمىتكەر بولا المايدى.
كانديداتتىڭ بارلىق تالاپتارعا سايكەستiگiن ورتالىق سايلاۋ كوميسسياسى رەسپۋبليكالىق قوعامدىق بiرلەستiكتiڭ جوعارى ورگانى وتىرىسىنىڭ كانديداتتى ۇسىنۋ تۋرالى حاتتاماسىنان ءۇزiندi كوشىرمە كانديداتتىڭ داۋىسقا تۇسۋگە كەلiسiم بەرۋi تۋرالى وتiنiشiمەن جانە كانديداتتىڭ سايلاۋ جارناسىن ەنگىزگەنىن كۋالاندىراتىن قۇجاتپەن بىرگە ۇسىنىلعان كەزدەن باستاپ بەس كۇن iشiندە ايقىندايدى. كانديداتتىڭ سايلاۋعا تۇسۋگە كەلىسىمى تۋرالى ءوتىنىشىنىڭ نىسانى ورتالىق سايلاۋ كوميسسياسىنىڭ قاۋلىسىمەن بەكىتىلەدى. وتىنىشكە جەكە نىسان بويىنشا ومىرباياندىق دەرەكتەر, مەملەكەتتىك قىزمەتتەگى نەمەسە سايلانبالى مەملەكەتتىك لاۋازىمدارداعى جۇمىس تاجىريبەسى تۋرالى مالىمەتتەر, سايلاۋ جارناسىن ەنگىزۋ تۋرالى قۇجات قوسا بەرىلەدى, – دەدى شاۆكات وتەمىسوۆ.
بۇدان كەيىن پرەزيدەنتتىككە كانديدات ورتالىق سايلاۋ كوميسسياسىنىڭ شوتىنا زاڭنامادا بەلگىلەنگەن ەڭ تومەنگى جالاقىنىڭ ەلۋ ەسەلەنگەن مولشەرىندە سايلاۋ جارناسىن ەنگىزەدى. ورتالىق سايلاۋ كوميسسياسى كورسەتىلگەن قۇجاتتار كەلىپ تۇسكەن كەزدەن باستاپ ۋاكىلەتتى مەملەكەتتىك ورگاندارعا دەرەۋ سۇراۋ سالۋلار جىبەرەدى. كورسەتىلگەن مەملەكەتتىك ورگانداردىڭ سۇراۋ سالۋلاردى قاراۋ جانە ورتالىق سايلاۋ كوميسسياسىنا مالىمەتتەردى ۇسىنۋ مەرزىمى سۇراۋ سالۋ كەلىپ تۇسكەن كۇننەن باستاپ كۇنتىزبەلىك ەكى كۇنگە سوزىلادى.
وكىلەتتى ورگانداردان ءتيىستى مالىمەتتەر تۇسكەننەن كەيىن ورتالىق سايلاۋ كوميسسياسى پرەزيدەنتتىككە كانديداتتىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ تالاپتارىنا سايكەستىگىن ورناتۋ تۋرالى ورتالىق سايلاۋ كوميسسياسىنىڭ قاۋلىسىمەن بەكىتىلگەن نىسانداعى حاتتامانى جۇزەگە اسىرادى. ورتالىق سايلاۋ كوميسسياسىنىڭ حاتتاماسىندا كانديداتتىڭ لينگۆيستيكالىق كوميسسيانىڭ مەملەكەتتىك ءتىلدى مەڭگەرگەنى تۋرالى قورىتىندىسىمەن بىرگە قولدانىستاعى زاڭناماعا سايكەس كەلەتىنى نەمەسە كەلمەيتىنى بەلگىلەنەدى.
