بۇل كۇندەرى فەدوروۆتىڭ اسقان شەبەرلىگىنە ءتانتى بولعان بارلىق باق وكىلدەرى ونىڭ وسى جارقىن جەڭىسى جايىندا جارىسا جازىپ جاتىر. راسىندا دا, جەرلەسىمىزدى قالاي ماقتاساق تا جاراسادى. وتكەنگە زەر سالساق, قازاقستاندىق سپورتشىلار اراسىنان الەمدىك دودالاردا تەك الەكسەي لۋتسەنكونىڭ عانا باعى جانعانىن بايقايمىز. 2012 جىلى نيدەرلاندتىڭ ليمبۋرگ قالاسىندا وتكەن دودادا وتانداسىمىز الدىنا جان سالماي, باس جۇلدەنى ولجالادى. مىنە, ەندى اراعا 10 جىل سالىپ, ەۆگەني فەدوروۆ الەم چەمپيونى اتانىپ وتىر. وسى ورايدا, ءار جىلدارى ءدال وسى اندەرلەر سايىسىنا قاتىسقان دميتري فوفانوۆ, اندرەي كاشەچكين, ماكسيم يگلينسكي, اندرەي زەيتس, رومان كيرەەۆ جانە تاعى باسقا مىقتى ۆەلوشاباندوزدارىمىزدىڭ جۇلدەسىز قالعانىن ەسكەرگەن ءجون. وسى جايتتىڭ ءوزى-اق, فەدوروۆتىڭ الىستاعى اۋستراليادا ۇلكەن شارۋا تىندىرعانىن اڭعارتىپ تۇر.
باسەكە اياقتالعان بەتتە: «جاسىل قۇرلىقتاعى جارىسقا تىڭعىلىقتى دايارلاندىق. سول ءۇشىن دە وسىدان بىرەر اپتا بۇرىن عانا اياقتالعان «يسپانيا ۆۋەلتاسىنا» قاتىسىپ, شەبەرلىگىمدى ابدەن شىڭدادىم. بىراق سونىڭ وزىندە دە باس جۇلدەنى ولجالايمىن دەپ ەش ويلاعان جوق ەدىم. ويتكەنى بۇل بىرىنشىلىكتە باسەكەلەستىك وتە جوعارى. قىرسىققاندا سول كۇنى جاڭبىر دا جاۋا قالدى ەمەس پە. بۇل جاعداي ءبىراز قولايسىزدىق تۋدىردى. سوعان قاراماستان جارىس جولىندا بارىمدى سالدىم. ناتيجەسىن وزدەرىڭىز دە كورىپ وتىرسىزدار. مەنىڭ قۋانىشىمدا شەك جوق!», دەپ اقتارىلا سويلەدى.
ەۆگەني فەدوروۆ جايىندا تاعى ءبىراز مالىمەت بەرەتىن بولساق, ول بۇعان دەيىن دە بىرقاتار ءدۇبىرلى دودالاردا دارالانعان. اتاپ ايتساق, 2018 جىلى بۋەنوس-ايرەستە الاۋى تۇتانعان جاسوسپىرىمدەردىڭ دۇنيەجۇزىلىك وليمپياداسىندا جەڭىس تۇعىرىنىڭ ەڭ بيىك ساتىسىنا كوتەرىلدى. ەرەسەكتەردىڭ ازيا چەمپيوناتىندا التىن مەن كۇمىس مەدالداردى يەلەندى. سونداي-اق ەۆگەنيدىڭ قازاقستان چەمپيونى دەگەن اتاعى بار.
