كۇزگى شاقىرۋ ناۋقانى كەزەڭىندە قارۋلى كۇشتەردىڭ تاجىريبەلى وفيتسەرلەرى مەن ارداگەرلەرىنەن, «جاس سارباز» قوزعالىسىنىڭ بەلسەندىلەرى مەن ۇلتتىق اسكەري-پاتريوتتىق ورتالىقتىڭ شىعارماشىلىق ۇجىمىنان قۇرالعان «دەسانت» وقۋ ورىندارى مەن اسكەري بولىمدەردە جاستارمەن كەزدەسىپ, پاتريوتتىق اكتسيالار مەن كونتسەرتتەر ۇيىمداستىرادى. جەرگىلىكتى جەرلەردە بۇل جۇمىسقا جەرگىلىكتى اتقارۋشى ورگاندار مەن قوعام وكىلدەرى كوپتەپ تارتىلعان.
العاشقى جۇمىس كۇنى اقتاۋداعى قالا كۇنىنە وراي قارۋلى كۇشتەردىڭ ۇلتتىق اسكەري-پاتريوتتىق ورتالىعى جاعالاۋدا كونتسەرت وتكىزدى. سونىمەن قاتار كورەرمەندەر اسكەري-تەڭىز كۇشتەرى «ماڭعىستاۋ», «ورال», «سارىارقا», «قازاقستان» كورابلدەرىنىڭ, «جايىق» گيدروگرافيالىق كەمەسىنىڭ, «الاتاۋ» مينا تارتقىش كورابلىنىڭ, سونداي-اق ۇقك شەكارا قىزمەتىنىڭ بەس كورابلى مەن كاتەرىنىڭ تەڭىزدەگى شەرۋىن تاماشالادى.
ورتالىق اسكەري وركەستر مەن ورتالىق انسامبل قالا تۇرعىندارى ءۇشىن پاتريوتتىق كونتسەرت ۇيىمداستىردى. قارۋمەن دەفيلە جاساپ, ساپتىق دايىندىق ەلەمەنتتەرىن كورسەتكەن قۇرمەت قاراۋىلى روتاسىنىڭ ايشىقتى ونەرى كورەرمەندەردى تاڭعالدىردى.
اقپاراتتىق-ءتۇسىندىرۋ توبىنىڭ جۇمىس جوسپارىندا اقتاۋ, بەينەۋ, جاڭاوزەن قالالارىندا اسكەرگە شاقىرۋعا دەيىنگى جانە اسكەرگە شاقىرۋ جاسىنداعى ازاماتتارمەن, ولاردىڭ اتا-انالارىمەن كەزدەسۋلەر, وقۋ ورىندارىندا ەرلىك ساباقتارى, سونداي-اق اسكەري بولىمدەردە وتكىزىلەتىن ءىس-شارالار بار.
