وتكەن وقۋ جىلىندا وبلىس ماماندارى ەرەكشە ءتارتىپ بويىنشا 276 تەكسەرۋ جۇرگىزدى. ناتيجەسىندە ءاربىر ەكىنشى وبەكتىدە بۇزۋشىلىقتار انىقتالدى. جوسپاردان تىس تەكسەرۋ بارىسىندا 12 عيماراتتا سايكەسسىزدىكتەر تىركەلدى.
«انىقتالعان سانيتارلىق تالاپتاردىڭ بۇزىلۋى بويىنشا 23,5 ملن تەڭگەدەن استام سوماعا 200 ايىپپۇل سالىندى, سوت ورگاندارىنا 9 ماتەريال جولداندى, ونىڭ ىشىندە 9 شەشىم قابىلداندى. حالىقتىڭ سانيتاريالىق-ەپيدەميولوگيالىق سالاماتتىلىعى سالاسىنداعى زاڭنامانى بۇزۋ بويىنشا 169 ۇيعارىم بەرىلدى. مەديتسينالىق قاراپ-تەكسەرۋدەن ءوتۋ ءۇشىن 41 ادام ۋاقىتشا جۇمىستان شەتتەتىلدى. وڭىردەگى تەكسەرۋلەر مەن سانيتاريالىق-ەپيدەميولوگيالىق احۋالدى تالداۋ ناتيجەلەرى بويىنشا جەرگىلىكتى اتقارۋشى ورگانداردىڭ, سونداي-اق ءبىلىم بەرۋ وبەكتىلەرىنىڭ اتىنا اقپارات جولداندى, وبەكتىلەردىڭ جاعدايىن جاقسارتۋ جانە وقۋشىلار ءۇشىن قولايلى جاعداي جاساۋ جونىندە ءتيىستى ۇسىنىستار بەرىلدى», دەلىنگەن كوميتەت حابارلاماسىندا.
ەپيدەميولوگيالىق تۇرعىدان ماڭىزدى ماسەلەلەردىڭ بىرى –تاماقتانۋدى ۇيىمداستىرۋ. بۇگىنگى كۇنى ءبىلىم بەرۋ وشاقتارىنىڭ 80%-ىندا تاماقتاندىرۋدى شاعىن جانە ميكرو بيزنەس سۋبەكتىلەرى ۇيىمداستىرۋدا. الايدا ولارعا قولدانىستاعى موراتوريگە بايلانىستى جوسپارلى تارتىپپەن تەكسەرىس جۇرگىزۋگە تىيىم سالىنعان.
وسىعان بايلانىستى سانيتاريالىق قاعيدالاردى ساقتاۋ جاۋاپكەرشىلىگى كاسىپكەرلەردىڭ وزدەرىنە, سونداي-اق وبەكتىنىڭ اكىمشىلىگىنە جانە مەكتەپتەردە قۇرىلعان براكەراج كوميسسيالارىنا جۇكتەلەدى.
