ءىس-شاراعا Chevron, ExxonMobil, Fluor, Shell USA, The Solar Turbines, S&P Global, Centrus Energy Corporation, Boeing, Amway, GE International Markets, Honeywell UOP, Philip Morris, The Procter & Gamble Company, Baker Hughes, John Deere, Bechtel, Halliburton, Valmont, Champion Foods, PepsiCo, MasterCard, Citi, McLarty Associates, Macro-Advisory LTD, private equity fund RCF, Brownstein Hyatt Farber Schreck, Greenenberg Traurig LLP, Microsoft, Coursera, StartX, EPAM, Wabtec Corporation, Zscaler, DoorDash, Amazon, Pfizer, Medtronic, Netflix سەكىلدى ءىرى امەريكالىق كومپانيالاردىڭ باسشىلارى قاتىستى.
پرەزيدەنت مۇنداي فورماتتا وتكەن كەزدەسۋ يگى داستۇرگە اينالعانىن اتاپ ءوتىپ, وسى شارانى ۇيىمداستىرۋعا اتسالىسقان اقش-تىڭ ساۋدا پالاتاسى مەن ىسكەرلىك كەڭەس مۇشەلەرىنە ريزاشىلىعىن ءبىلدىردى.
مەملەكەت باسشىسى كەزدەسۋدە ادىلەتتى قازاقستان قۇرۋعا باعىتتالعان اۋقىمدى ساياسي جانە ەكونوميكالىق رەفورمالاردىڭ جۇزەگە اسىرىلۋى جونىندە ەگجەي-تەگجەيلى ايتىپ بەردى.
قاسىم-جومارت توقاەۆ قازاقستاننىڭ ەكونوميكالىق الەۋەتى مەن ينۆەستيتسيالىق تارتىمدىلىعىن ارتتىرۋ ءۇشىن قابىلدانىپ جاتقان شارالار تۋرالى جان-جاقتى مالىمەت بەردى. اتاپ ايتقاندا, پرەزيدەنت ەنەرگەتيكا, اۋىل شارۋاشىلىعى, ونەركاسىپ, كولىك-لوگيستيكا, تسيفرلاندىرۋ, قارجى جانە جاڭارتىلاتىن ەنەرگيا كوزدەرى سالالارىنداعى بىرلەسكەن ينۆەستيتسيالىق جوبالاردى ىسكە اسىرۋ مۇمكىندىكتەرىنە توقتالدى. مەملەكەت باسشىسى قازاقستاندا امەريكالىق جاڭا ءىرى كاسىپورىنداردىڭ پايدا بولۋىنا قولداۋ ءبىلدىردى.
قاسىم-جومارت توقاەۆ قازاقستان مەن اقش اراسىنداعى ستراتەگيالىق ەكونوميكالىق سەرىكتەستىك بارلىق سالادا ءارتاراپتاندىرىلىپ, كەڭەيە بەرەتىنىن اتاپ ءوتتى.
«مەنىڭ كوماندامنىڭ ينۆەستيتسيا تارتۋداعى تاجىريبەسى مول. بۇل كومپانيالارىڭىزعا ايماقتىڭ ەڭ جىلدام دامىپ كەلە جاتقان ەكونوميكالارىنىڭ بىرىندە بيزنەس جۇرگىزۋدى جەڭىلدەتەدى. بۇگىنگى كەزدەسۋ ساۋدا-ەكونوميكالىق جانە ينۆەستيتسيالىق ىنتىماقتاستىقتى ىلگەرىلەتۋدە, سونداي-اق قازاقستان مەن اقش اراسىنداعى ستراتەگيالىق سەرىكتەستىكتى ودان ءارى نىعايتۋدا ناقتى قادام بولادى دەپ سەنەمىن», دەدى قازاقستان پرەزيدەنتى.
