باتىس قازاقستان وبلىسى سىرىم اۋدانىنىڭ تۇرعىندارى «AMANAT» پارتياسىنىڭ رەسپۋبليكالىق ءموبيلدى قوعامدىق قابىلداۋ بولمەسىنىڭ وكىلدەرىنە سۋمەن جابدىقتاۋ, كەنتىشىلىك, اۋداندىق جولداردى جوندەۋ, اباتتاندىرۋ جانە وزگە دە وزەكتى ماسەلەلەر بويىنشا جۇگىندى.
ماسەلەن, ارالتوبە اۋىلىنىڭ تۇرعىنى گۇلنار كەنەسارينا گازبەن قامتۋ ماسەلەسىن قوزعادى.
«وسى اۋىلدا 30 جىل تۇرىپ جاتىرمىن. گاز تارتىلدى. الايدا ءبىر ءۇيدى كوگىلدىر وتىنعا قوسۋ ءۇشىن 400 مىڭ تەڭگە سۇراپ وتىر. ال مەنىڭ زەينەتاقىم نەبارى 50 مىڭ تەڭگە. كۇيەۋىم ەكەۋمىز مۇگەدەك جاندارمىز. سوندا بىزگە نە ىستە دەيسىزدەر؟ ءۇيدى تەزەك جاعىپ جىلىتىپ وتىرمىز. ءبىر اربا تەزەكتىڭ قۇنى 20 مىڭ تەڭگە. بۇعان قوسا, جەتكىزىپ بەرۋ ءۇشىن تاعى 3 مىڭ تەڭگە تولەيمىز. سەبەبى جەتكىزىپ بەرەتىن تراكتوردىڭ ديزەل وتىنى قىمبات تۇرادى. زەينەتكەرلەر مەن مۇگەدەكتەردىڭ ءۇيىن گازعا تەگىن قوسىپ بەرۋدى سۇرايمىز», دەيدى زەينەتكەر.
سول كۇنى پارتيالىقتار قىزىلوردا وبلىسىنىڭ جالاعاش اۋدانىندا بولدى. اققۇم اۋىلدىق وكرۋگى تۇرعىندارىنىڭ اتىنان سويلەگەن زەينەتكەر ءومىرتاي ابجاليەۆ اۋىلداعى اۋرۋحانانى قالپىنا كەلتىرىپ, عيماراتتى جوندەۋدەن وتكىزىپ بەرۋدى سۇرادى.
ال ءدۇر وڭعار اۋىلىنىڭ تۇرعىنى نۇرسەرىك بوحاەۆ جول جوندەۋ جانە گازبەن قامتۋ ماسەلەلەرىن قوزعادى.
«اۋىلدىڭ جول ساپاسى وتە ناشار. قىسى-جازى قيىنشىلىق كورەمىز. تاعى ءبىر وزەكتى ماسەلە – جىلىتۋ. قازىر كومىر مەن وتىننىڭ قۇنى اسا قىمبات. ەگەر اۋىلعا گاز تارتىلاتىن بولسا, تۇرعىندار سانى دا ارتاتىن ەدى. بۇگىن «اماNAT»-تىڭ ءموبيلدى بريگاداسى ءوتىنىش-تىلەگىمىزگە قۇلاق ءتۇردى. پارتيانىڭ قولداۋىمەن جول سالىنىپ, گاز تارتىلادى دەگەن ۇمىتتەمىز», دەدى ول.
اۋىل اكىمى ءابيمۇسلىم قوقانوۆتىڭ ايتۋىنشا, كەلەسى جىلى جوبالىق-سمەتالىق قۇجاتتاما ازىرلەنەدى. ال 2024 جىلى ەلدى مەكەنگە گاز تارتىلادى.
«ناۋرىزدان بەرى 800-دەن استام شالعاي اۋىلدىق ەلدى مەكەندە بولىپ, 7 مىڭنان استام ازاماتتى قابىلدادىق. جالپى, جىل باسىنان بەرى «AMANAT» پارتياسىنىڭ قوعامدىق قابىلداۋىنا 100 مىڭنان استام ادام جۇگىندى. تۇرعىنداردى نەگىزىنەن الەۋمەتتىك قامسىزداندىرۋ – 29%, تۇرعىن ءۇي-كوممۋنالدىق شارۋاشىلىق – 17%, تۇرعىن ۇيمەن قامتاماسىز ەتۋ جانە جەر ۋچاسكەلەرىن ءبولۋ – 10% ماسەلەلەرى تولعاندىرادى», دەدى «AMANAT» پارتياسى رەسپۋبليكالىق قوعامدىق قابىلداۋ بولمەسى جەتەكشىسىنىڭ ورىنباسارى ازامات ءبىرجانوۆ.
