اتاپ ايتقاندا, ەنەرگەتيكا مينيسترلىگى مەن «قازمۇنايگاز» تاراپىنان لوگيستيكا, مۇناي وڭدەۋ زاۋىتتارىنان ءونىم جونەلتۋ, وڭىرلەرگە قاجەتتى مۇناي ونىمدەرىنىڭ كولەمى بويىنشا ناقتى ۇيلەسىمدىلىك جوق.
سونىمەن قاتار «قازاقستان تەمىر جولى» كومپانياسى مۇناي وڭدەۋ زاۋىتتارىنا تسيستەرنالاردى ۋاقىتىلى جەتكىزبەگەن جانە مۇناي ونىمدەرىن وڭىرلەرگە تاسىمالداۋ ءۇشىن ۆاگونداردى بەرۋ كەستەلەرىن تۇزەتپەگەن.
«تىيىم سالىنعانىنا قاراماستان, بەنزين مەن ديزەل وتىنى باسقا تاۋارلار رەتىندە سىرتقا شىعارىلىپ وتىرعان. مىسالى, پەشكە ارنالعان وتىن ەكسپورتى 11 ەسە وسكەن. دەمەك, ەنەرگەتيكا مينيسترلىگى بۇعان تيىسىنشە باقىلاۋ جۇرگىزبەگەن», دەدى ءاليحان سمايىلوۆ.
پرەمەر-مينيستر «قازمۇنايگاز» كومپانياسىنىڭ سالعىرتتىعىنان جەر قويناۋىن پايدالانۋشىلار بولىپ تابىلمايتىن جەكە كومپانيالار مۇناي وڭدەۋ زاۋىتتارىندا مۇناي وڭدەپ, كەيىن ول جوعارى باعامەن ساتىلىپ وتىرعانىن ايتتى.
ءاليحان سمايىلوۆتىڭ ايتۋىنشا, وڭىرلەردەگى جەڭىلدىكتى جانار-جاعارماي وپەراتورلارىنا قويىلاتىن بىلىكتىلىك تالاپتارى مەن ولاردى ايقىنداۋ تەتىگى جوق, بۇل بەلگىلى ءبىر كومپانيالارعا «ارتىقشىلىق بەرىلۋىنە» جاعداي جاسايدى. بۇعان قوسا, ەنەرگەتيكا مينيسترلىگى جەڭىلدىكتى جانارمايدىڭ شەكتى قۇنىن بەلگىلەمەگەن. سوندىقتان باعا وپەراتوردىڭ قالاۋى بويىنشا قويىلادى.
«اتالعان فاكتىلەردىڭ بارلىعى وڭىرلەردە ديزەل وتىنىنىڭ جاساندى تاپشىلىعىنا جانە باعانىڭ كۇرت وسۋىنە اكەپ سوقتى», دەدى پرەمەر-مينيستر. ۇكىمەت باسشىسى ۋاقىتىلى شارالاردى قولدانباعانى ءۇشىن ەنەرگەتيكا مينيسترلىگى, «قازمۇنايگاز», «Petrosun» جشس جانە ءاموز لاۋازىمدى تۇلعالارىنا قاتاڭ سوگىس جاريالانعانىن اتاپ ءوتتى.
ءاليحان سمايىلوۆ باسى ارتىق دەلدالدار بولماۋى ءۇشىن مارجانىڭ شەكتى سوماسى مەن سوڭعى قۇنىن بەلگىلەي وتىرىپ, اۋىل شارۋاشىلىعى وندىرۋشىلەرىن جەڭىلدىكتى جانار-جاعارمايمەن قامتاماسىز ەتۋ ماسەلەلەرىن نورماتيۆتىك تۇرعىدان رەتتەۋدى تاپسىردى.
«اۋداندار مەن شالعاي ەلدى مەكەندەردە جانارماي قۇيۋ ستانتسيالارى بار كومپانيالارعا باسىمدىق بەرىلۋى ءتيىس», دەدى ول.
