ال قازاقستان ءۇشىن ەكەۋى دە ماڭىزدى. اسىرەسە, شالعاي ايماقتار ءۇشىن سۋ, جول, گاز, عالامتور دا كۇن تارتىبىندە تۇر. وسى تۇستا بۇگىنگى ق.توقاەۆتىڭ جولداۋىندا دا بارلىق باعىتتاعى ينفراقۇرىلىمدى دامىتۋعا نازار اۋدارىلدى. اتاپ ايتساق, گەوساياسي تۇراقسىزدىق جاعدايىندا قازاقستان ءوزىنىڭ كولىك دالىزدەرىن بارىنشا دامىتۋى كەرەك, اسىرەسە كاسپي ارقىلى وتەتىن ترانسكاسپي حالىقارالىق كولىك ءدالىزىن دامىتىپ, وسى ايماقتا قازىرگى زامانعا ساي لوگيستيكالىق حاب قۇرۋ ماڭىزدى. بۇل قازىرگى جاعدايدا وسى باعىتتا ەسەلەپ ارتقان جۇك كولەمىن يگەرۋگە ىقپال ەتەدى.
جول سالۋ – بۇل شەنەۋنىكتەردىڭ «تابىس كوزىنە» اينالماۋعا ءتيىس, جول قۇرىلىسىنىڭ ساپاسىنا باقىلاۋدى كۇشەيتۋ كەرەك. «...اۆتوجول قۇرىلىسىنا, سونىڭ ىشىندە جەرگىلىكتى جولداردىڭ ساپاسىنا باسا ءمان بەرۋ كەرەك. بيۋدجەتتەن قىرۋار قارجى بولىنسە دە, بۇل ماسەلە ءالى شەشىمىن تاپپاي وتىر» دەدى پرەزيدەنت. الەۋمەتتىك ينفراقۇرىلىمنىڭ ىشىندە مەديتسينالىق جانە ءبىلىم بەرۋ مەكەمەلەرىمەن حالىقتى جەتكىلىكتى قامتاماسىز ەتۋ ايماقتار, ءتىپتى قالالار ءۇشىن دە وزەكتى. جولداۋدا ايتىلعانداي «...650 ەلدى مەكەندە ەمدەۋ مەكەمەسى جوق. الداعى ەكى جىلدا بۇل اۋىلداردا مەديتسينالىق جانە فەلدشەرلىك-اكۋشەرلىك بولىمشەلەر سالىنىپ, قاجەتتى قۇرال-جابدىقپەن تولىق قامتاماسىز ەتىلەدى. ۇلتتىق جوبا اياسىندا 32 اۋداندىق اۋرۋحانا زامانعا ساي جاڭارىپ, ەندى اۋدانارالىق كوپبەيىندى مەكەمەگە اينالادى. وندا ينسۋلتتەن ەمدەۋ ورتالىقتارى, حيرۋرگيا, جانساقتاۋ جانە وڭالتۋ بولىمدەرى اشىلادى».
مەكتەپكە دەيىنگى جانە ءبىلىم بەرۋ مەكەمەلەرىنىڭ جەتىسپەۋشىلىگى – بۇل بولاشاق ەڭبەككە قابىلەتتى ەكونوميكالىق بەلسەندى حالىقتىڭ ساپاسىنىڭ تومەن بولۋىنا تىكەلەي اسەر ەتەدى. جولداۋدا ايتىلعان وسى باعىتتاعى جۇمىستاردى دا كەيىنگە ىسىرۋعا بولمايدى.
سونىمەن قاتار جولداۋدا قالا, تۇرعىن ءۇي ينفراقۇرىلىمىن دامىتۋعا دا ناقتى ۇسىنىستار ايتىلعان. وسى تۇستا حالىقتىق ەكسپەرتيزا – الەۋمەتتىك باقىلاۋدى كۇشەيتۋدى ۇسىنامىن. سەبەبى جىل سايىن جولداۋدا كەلەلى ۇسىنىستار ايتىلادى. ال ونىڭ ورىندالۋ بارىسىن جاۋاپتى تۇلعالاردى قىزمەتتەن بوساتۋمەن عانا اقتاۋ ازدىق ەتەدى دەپ ويلايمىن. عىلىمي قاۋىمداستىق, قوعامدىق ۇيىمدار جانە حالىق بولىپ پرەزيدەنتتەن باستاۋ العان يدەيالاردىڭ ىسكە اسىرىلۋىن قاداعالاۋىمىز قاجەت.
ايسۇلۋ تۇرسىنبايقىزى,
ەكونوميكا ينستيتۋتى زاماناۋي زەرتتەۋلەر ءبولىمىنىڭ مەڭگەرۋشىسى
