ساقتاندىرۋ جۇيەسىمەن قامتىلماعان

اتالعان قوردىڭ نەگىزگى مىندەتى – ەلىمىزدىڭ ازاماتتارىن ساپالى مەدي­تسينالىق قىزمەت تۇرلەرىمەن قامتاماسىز ەتۋ. بۇل ۇيىممەن شارت جاساسقان كەز كەلگەن كلينيكادا ونىڭ ورنالاسقان جەرى مەن ەمدەلۋشىنىڭ وسى مەديتسينالىق ۇيىمعا بەكىتىلمەگەنىنە قاراماستان ءمامس جۇيەسىنىڭ اياسىندا كەڭ سپەكترلى مەديتسينالىق قىزمەتتەردى الۋعا بولادى. الايدا ول ءۇشىن كەز كەلگەن ازامات­تىڭ ساقتاندىرىلۋ مارتەبەسى بولۋى مىندەتتى.

قور وكىلدەرى ايتقانداي, قازىر اباي وبلىسىندا تۇراتىن 600 مىڭنان اسا حالىقتىڭ 17%-ىندا نەمەسە 114 047 ادامدا مەديتسينالىق ساقتاندىرۋى جوق. سوندىقتان قۇزىرلى ورگاندارمەن بىرلەسىپ, قازىر بۇل باعىتتا ەمحانالاردا جانە ساقتاندىرۋ جۇيەسىندە تىركەلمەگەن حالىقتى كەڭىنەن قامتۋ بويىنشا جۇمىستار قولعا الىندى. جەكە جانە زاڭدى تۇلعالارمەن دە ءمامس جۇيەسىنىڭ ماڭىزدىلىعى جونىندە ءتۇسىندىرۋ جۇمىستارى جۇرگىزىلىپ جاتىر.

«بيىل اباي وبلىسىنىڭ حالقىنا مەديتسينالىق كومەك كورسەتۋگە 64 جەت­كىزۋشىمەن كەلىسىمشارت جاسالىپ, بۇل ماقساتتا 64,2 ملرد تەڭگە قاراستىرىلىپ وتىر. ونىڭ ىشىندە تمككك – 36,1 ملرد تەڭگە, ءمامس – 28,1 ملرد تەڭگە. 6 ايدا يگەرىلگەن قاراجاتتىڭ مولشەرى – 40,7 ملرد تەڭگە, ونىڭ ىشىندە تەگىن مەدي­تسينالىق كومەكتىڭ كەپىلدىك بەرىلگەن كولەمى بويىنشا 23,1 ملرد تەڭگە, ءمامس جۇيەسىنە 17,5 ملرد تەڭگە تيەسى­لى», دەدى ع.ءابىلوۆ.

ەسەپتى كەزەڭدە مەديتسينالىق ۇيىم­داردا ستاتسيونارلىق كومەككە بايلانىس­تى ءمامس قاراجاتى ەسەبىنەن 17 مىڭعا جۋىق وپەراتسيا جۇرگىزىلىپ, ونىڭ ىشىندە جوعارى تەحنولوگيالىق مەديتسينالىق كومەك 518-گە جەتكەن. بىلتىر ۇقساس كەزەڭدە تىڭ مەديتسينالىق تەحنولوگيالاردى قولدانىپ جاسالعان حيرۋرگيالىق قىزمەت مولشەرى ءمامس قاراجاتى ەسەبىنەن 16 مىڭعا جۋىقتاپ, ونىڭ ىشىندە جوعارى تەحنولوگيالىق مەديتسينالىق كومەك – 117 وپەراتسيا­نى قۇراعان. بىل­تىرعى كەزەڭمەن سالىستىرعاندا, بيىل حيرۋرگيالىق ارالاسۋلاردىڭ كورسەت­كىشى ءوسىپ, جوعارى تەحنولوگيالىق مەدي­تسينالىق وپەراتسيالاردىڭ ەداۋىر ۇلعايۋى بايقالادى.

بيىلعى مونيتورينگ ناتيجەلەرىنە سايكەس ەسەپتى كەزەڭدە اتالعان قوردىڭ ساراپشىلارى 22 مىڭ بۇزۋشىلىقتى انىقتاعان. ايىپپۇلداردى ەسەپكە العاندا ونىڭ سوماسى – 564,2 ملن تەڭگە. ونىڭ ىشىندە ءىس جۇزىندە كورسەتىلمەگەن قىزمەتتەر بويىنشا ايىپپۇلداردى بىرگە ەسەپتەگەندە 279 جاعدايدا – 1,4 ملن تەڭگەگە جەتكەن.

قوردىڭ وكىلدەرى اسىرەسە نىسانالى توپتارداعى پاتسيەنتتەردى ءدارى-دار­مەك­پەن قامتاماسىز ەتۋگە ەرەكشە باسىمدىق بەرىلگەنىن جەتكىزدى. 2022 جىلعا امبۋلاتورلىق ءدارى-دارمەك­پەن قامتاماسىز ەتۋگە 4,6 ملرد تەڭگە ءبولىنىپ, ونىڭ 4,4 ملرد تەڭگەسى تەگىن مەدي­تسينالىق كومەكتىڭ كەپىلدىك بەرىلگەن كولەمى, سونداي-اق ءمامس اياسىندا 0,2 ملرد تەڭگە باعىتتالىپتى.

اباي وبلىسى