21 تامىز كۇنى جەدەل جاردەم قىزمەتىمەن ناۋقاس بالا اۋىر جاعدايدا قالالىق كلينيكالىق بالالار اۋرۋحاناسىنا جەتكىزىلىپ, وڭ تىزە استىنان قان كەتۋ, اياقتىڭ تىزەدەن تومەن بولىگىنىڭ كوگەرۋى, مۇزداۋى سىندى بەلگىلەرمەن جانساقتاۋ بولىمىنە جاتقىزىلعان.
ماماندار وڭ تىزە استى ارتەرياسى مەن ۆەناسىنىڭ تولىقتاي كەسىلگەنىن انىقتادى. بالاعا شۇعىل تۇردە وتا جاسالماسا, اياعىنداعى جاراقاتى اسقىنىپ مۇگەدەك بولىپ قالۋ قاۋپى باسىم ەدى. وسىنى ەسكەرگەن تاجىريبەلى انگيوحيرۋرگ, انەستەزيولوگ دارىگەرلەر جەدەل وتا جاسادى.
حيرۋرگتار ناۋقاس بالاداعى تامىرلارىنىڭ ديامەترىنىڭ كىشكەنتاي بولۋىنا بايلانىستى, ميكروسكوپيالىق LEICA ONX اپپاراتىنىڭ كومەگىمەن وتا جاساعان. وپەراتسيا كەزىندە ماماندار ۇزىلگەن تىزە استى ارتەرياسىن ۇشپا-ۇش جالعاپ تىگىپ بەردى.
«وتادان كەيىن اياقتىڭ تومەنگى بولىگىنە قان بارىپ, جىلىپ, توبىق ايماعىندا پۋلس پايدا بولدى. بالانىڭ قازىرگى جاعدايى قاناعاتتانارلىق, ۇيگە شىعۋعا دايىندالىپ جاتىر. تامىردىڭ جاراقاتىنا دەر كەزىندە جوعارعى مەديتسينالىق كومەكتى دۇرىس كورسەتپەگەن جاعدايدا, كوبىنە ديستالدى بولىگى امپۋتاتسيامەن اياقتالۋى مۇمكىن. اتا-انالارعا بالالارىنا كوڭىل ءبولىپ, قاۋىپسىزدىك شارالارىن ساقتاپ جۇرۋگە شاقىرامىز», دەيدى ءبولىم مەڭگەرۋشىسى ولجاس شىنتاسوۆ.
