«اشىق ميكروفون» فورماتىندا وتكەن جيىنعا «اتامەكەن» ۇكپ باسشىلارى, قۇقىق قورعاۋ جانە قاداعالاۋ ورگاندارىنىڭ, سالالىق قاۋىمداستىقتاردىڭ قىزمەتكەرلەرى, سونداي-اق ادۆوكاتتار, زاڭگەرلەر مەن كاسىپكەرلەر قاتىستى.
«قالا ەكونوميكاسىنىڭ نەگىزىن شاعىن جانە ورتا بيزنەس قۇرايدى. ەلوردادا ءتۇرلى سەكتورلارعا تارتىلعان جانە 500 مىڭعا جۋىق قالا تۇرعىنى قىزمەت ەتەتىن 180 مىڭعا جۋىق بيزنەس سۋبەكتىسى جۇمىس ىستەيدى. تۇرعىندار كۇن سايىن ولاردىڭ قىزمەتتەرىن پايدالانادى: بۇل قوعامدىق تاماقتانۋ جانە تۇرمىستىق قىزمەت كورسەتۋ, سونداي-اق قۇرىلىس, مەديتسينا, ءبىلىم بەرۋ سالالارى. سوندىقتان ەلوردانىڭ كاسىپكەرلىك احۋالىن ودان ءارى جاقسارتۋ تەتىكتەرى - بۇگىندە وزەكتى تاقىرىپتاردىڭ ءبىرى», دەپ جازدى التاي كولگىنوۆ Instagram جەلىسىندەگى پاراقشاسىندا.
اكىمنىڭ ايتۋىنشا, جينالىسقا قاتىسۋشىلار اكىمشىلىك كەدەرگىلەردى قىسقارتۋ, قۇرىلىس سالاسىن دامىتۋ, باس شاھاردىڭ ديزاين-كودى, جەر ۋچاسكەلەرى مەن ينجەنەرلىك جەلىلەر, سونداي-اق بىرقاتار جوبالاردى قارجىلاندىرۋعا قاتىستى تاقىرىپتاردى تالقىلادى.
«مەملەكەت باسشىسى شاعىن جانە ورتا بيزنەستى دامىتۋ ءۇشىن ءتيىستى جاعدايلاردى قامتاماسىز ەتۋگە جانە قالا مەن ەلدى دامىتۋعا جەكە ينۆەستيتسيالاردى تارتۋعا ەرەكشە كوڭىل بولەدى. اكىمدىك تاراپىنان بيزنەس وكىلدەرىنە جۇيەلى قولداۋ كورسەتۋ ءۇشىن بىرقاتار شارالار قابىلداندى. بيزنەستى, اسىرەسە شاعىن جانە ورتا كاسىپكەرلىكتى قولداۋدىڭ پارمەندى تەتىكتەرىنىڭ ءبىرى - «Astana اكك» اق قىزمەتى. الەۋمەتتىك-كاسىپكەرلىك كورپوراتسيا بيۋروكراتيالىق كىدىرىستەر مەن كەدەرگىلەرسىز جەر ۋچاسكەلەرىن, اەا اۋماعىندا «Astana Invest» جانە يندۋستريالىق پارك ارقىلى جەڭىلدىكتى پرەفەرەنتسيالار بەرۋگە مۇمكىندىك بەرەدى. بۇل شارالار داعدارىس كەزەڭىندە ماڭىزدى ءرول اتقاردى», دەلىنگەن ەلوردا اكىمىنىڭ جازباسىندا.
سونداي-اق, ول گرانتتار مەن جەڭىلدەتىلگەن نەسيەلەر ءتۇرلى باعدارلامالار بويىنشا بەرىلەتىنىن ايتتى. ماسەلەن, بيىل جاڭا بيزنەس-يدەيالاردى ىسكە اسىرۋ ءۇشىن 130-دان استام گرانت بەرىلدى, بۇل وتكەن جىلمەن سالىستىرعاندا 2 ەسە كوپ. قولداۋ شاعىن جانە ورتا بيزنەس وبەكتىلەرىنە ينجەنەرلىك جەلىلەر جۇرگىزۋ, بيزنەس شىعىندارىن قولداۋ جانە ازايتۋ ءۇشىن قاجەتتى ينفراقۇرىلىم قۇرۋ تۇرىندە كورسەتىلەدى. اتاپ ايتقاندا, بۇگىندە iQala قالالىق قىزمەتتەر ورتالىعى مەن Astana Invest ينۆەستورلارعا ارنالعان فرونت-كەڭسەسى تابىستى جۇمىسىن جالعاستىرۋدا.
