ءوز كەزەگىندە اۋىل تۇرعىندارى سەناتورعا اۋدانداردىڭ مىندەتتەرىن شەشۋگە قاتىسقانى ءۇشىن العىس ايتىپ, جەر كودەكسىنە وزگەرىستەر ەنگىزۋ مۇمكىندىگىن قاراستىرۋدى سۇرادى. ولار سونداي-اق اۋدانداردى جانار-جاعارمايمەن قامتاماسىز ەتۋ جانە ليزينگ ارقىلى تەحنيكاعا قول جەتكىزۋ ماسەلەلەرىندە جاردەم سۇرادى.
«سىزدەردىڭ ۇسىنىستارىڭىز نازاردان تىس قالمايدى. بارلىق ءوتىنىشىڭىز زەردەلەنىپ, ءتيىستى زاڭداردى قابىلداۋ كەزىندە ەسكەرىلەدى», دەدى ج.جورگەنباەۆ.
كەزدەسۋ بارىسىندا سەناتور مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە جۇرگىزىلىپ جاتقان ساياسي جانە كونستيتۋتسيالىق رەفورمالارعا توقتالىپ, پارلامەنت سەناتى قابىلداعان زاڭداردىڭ قازاقستاندىق قوعام ءۇشىن ماڭىزدىلىعىن اتاپ ءوتتى.
ءسوز سوڭىندا دەپۋتات كەلىپ تۇسكەن بارلىق ماسەلە باقىلاۋعا الىنىپ, جەرگىلىكتى اتقارۋشى ورگاندارمەن بىرلەسىپ پىسىقتالاتىنىن جەتكىزدى.
ال سەنات دەپۋتاتتارى ءالي بەكتاەۆ پەن ءالىمجان قۇرتاەۆ تۇركىستان وبلىسى قازىعۇرت اۋدانىنداعى فەرمەرلىك شارۋاشىلىقتاردىڭ جۇمىسىمەن تانىستى. سەناتورلارعا «بىرلىك» وندىرىستىك كووپەراتيۆىندەگى الما جيناۋ پروتسەسى كورسەتىلدى.
شارۋالار سوڭعى 10 جىلدا الما باقتارىنىڭ اۋدانى 604 گەكتاردان اسقانىن ايتتى. وندىرىستىك كووپەراتيۆتە اۋداننىڭ جۇزدەگەن تۇرعىنى جۇمىس ىستەيدى. قازىرگى تاڭدا 500 توننادان استام الما جينالعان. ولار كورشى ەلدەرگە ەكسپورتتالادى. بۇل ءوندىرىس اۋىل شارۋاشىلىعىن ءارتاراپتاندىرۋدىڭ ماڭىزدىلىعىن كورسەتەدى.
سونىمەن قاتار دەپۋتاتتار اۋدان كاسىپكەرلەرىمەن جانە شارۋا قوجالىقتارىنىڭ باسشىلارىمەن كەزدەستى. كەزدەسۋ بارىسىندا قاتىسۋشىلار ەلىمىزدىڭ الەۋمەتتىك-ەكونوميكالىق دامۋ دەڭگەيى تۋرالى پىكىر الماستى. سەناتورلار ءوز كەزەگىندە پارلامەنتتە جۇرگىزىلىپ جاتقان جۇمىستار, سونداي-اق ەل پرەزيدەنتى قاسىم-جومارت توقاەۆتىڭ باستاماسىمەن قولعا الىنعان ساياسي رەفورمالار تۋرالى ايتىپ بەردى.
«قارقىندى كوگالداندىرۋ ءار گەكتاردان استىق پەن ماقتا شارۋاشىلىعىنا قاراعاندا 1,5-3 ەسە كوپ پايدا اكەلەدى. بۇل اۋىل تۇرعىندارى ءۇشىن وتە ماڭىزدى. وسىعان بايلانىستى بەيىندى ۆەدومستۆولار ءتيىستى تەحنيكانى, ونىڭ ىشىندە جىلۋ ۇنەمدەۋ تەحنولوگيالارىن ەنگىزۋ ارقىلى بۇل سالانى كوبىرەك قولداۋى قاجەت», دەدى سەناتور ءا.بەكتاەۆ.
سونداي-اق پارلامەنت سەناتىنىڭ دەپۋتاتى بەكبولات ورىنبەكوۆ جامبىل وبلىسىنا جۇمىس ساپارى بارىسىندا شۋ اۋدانىنا بارىپ, بىرقاتار نىساننىڭ جۇمىسىمەن تانىستى.
سەناتور «تاراز حيميالىق پاركى» ارنايى ەكونوميكالىق ايماعىندا ىسكە اسىرىلىپ جاتقان جوبالارعا نازار اۋداردى. «ەكونوميكالىق ايماقتىڭ جۇمىسىن توقىراتپاۋ ءۇشىن حيميالىق سالادان باسقا باعىتتار بويىنشا دا وندىرىستىك ورتالىقتار اشۋعا ءمان بەرۋ قاجەت», دەپ اتاپ ءوتتى بەكبولات ورىنبەكوۆ.
سونداي-اق دەپۋتات اۋدانارالىق بالالاردى وڭالتۋ ورتالىعى مەن ءال-فارابي اتىنداعى مەكتەپتىڭ قۇرىلىس بارىسىمەن تانىستى.
