ەرلىك تايشىباەۆ – ماي اۋدانىنىڭ تۇرعىنى. شاعىن تراكتوردى قۇراستىرۋ يدەياسى وعان ءبىر كۇندە كەلە قالعان جوق. يەلىگىندە وندىرىستىك بازا, ارنايى الاڭ جانە مەتالمەن جۇمىس ىستەۋگە ارنالعان قۇرال-جابدىقتارى جەتكىلىكتى بولعان سوڭ اۋىلداستارىنا تەحنيكالىق تۇرعىدان كومەكتەسۋدى ويعا الىپتى. ءسويتىپ, الدىنا ءبىر ءوزى ونداعان جۇمىس ءتۇرىن اتقارا الاتىن ءارى باعاسى ارزان شاعىن تراكتور قۇراستىرسام دەگەن ماقسات قويادى. اۋىلدىق بيزنەسكە تەحنيكا قۇراستىرۋ ليتسەنزياسىن ساتىپ الۋ قارجىلىق تۇرعىدان ءتيىمسىز ءارى ۇلكەن ءوندىرىس اشۋ دا ىڭعايسىز. سوندىقتان تىم بولماعاندا جىلىنا كەمىندە 50 تراكتور شىعاراتىن شاعىن ءوندىرىس اشسام دەپ جاتسا-تۇرسا ارماندايدى.
ءسويتىپ, كۇندەردىڭ كۇنىندە YouTube پلاتفورماسىنان رەسەيلىك ينجەنەردىڭ كۋرستارىن كوزى شالىپ قالماسى بار ما. ول جاساعان تەحنيكانىڭ قاراپايىمدىلىعى ۇناپ, اۆتورعا حابارلاسىپ قاجەتتى سىزبالارىن سۇراپ العان. ال تراكتورعا قاجەت قوسىمشا بولشەكتەر مەن قوزعالتقىشتى ساتىپ الۋ ءۇشىن «بيزنەستىڭ جول كارتاسى-2025» باعدارلاماسى ارقىلى ۇتىپ العان 5 ملن تەڭگە گرانتتى پايدالاندى.
بۇگىندە «ديماش» جەكە كاسىپكەرلىگىنىڭ وندىرىستىك بازاسىندا «جۇمىسكەر» دەپ اتالاتىن 2 شاعىن تراكتور قۇراستىرىلىپ شىقتى. امبەباپ تەحنيكا 15 ءتۇرلى جۇمىستى اتقارا الادى. ءشوپتى شاۋىپ, جيناۋ, كارتوپ وتىرعىزۋ, قىستا قار كۇرەۋ سياقتى تاعىسىن-تاعى اۋىلدىڭ ءبىر بىتپەيتىن شارۋالارىن لەزدە دوڭگەلەتىپ تاستاۋعا بولادى.
– اۋىلدىڭ تىرلىگى تەحنيكاسىز بىتپەيدى. ءشوپ شابۋعا, قي ويىپ, كوڭ شىعارۋعا, قار تازالاۋعا, ايتا بەرسەڭ بارلىعىنا ماشينانىڭ كومەگى كەرەك. تراكتورىما پاتەنت الدىم. ەندى تيەۋىش ءشومىش, قار كۇرەگىشتەر, ارنايى اشا جاساپ جاتىرمىن. تەحنيكانىڭ جەبەسى 300 كيلوگرامدىق جۇكتى ءۇش مەترگە دەيىن كوتەرەدى. بۇل ءوزى «مەتيس» تراكتور بولعالى تۇر, بىرنەشە تەحنيكانىڭ بولشەكتەرىنەن قۇراستىرىلعان. بەلدىك تەمىرى مەن بەرىلىس قورابىن, ءرۋلىنىڭ كولونكاسىن «جيگۋليدەن» يەمدەنىپ الدىق, ال قوزعالتقىشى قىتايدا جاسالاتىن «ليفان برايد» دەپ اتالاتىن 15 اتتىڭ كۇشى بار اگرەگات. دوڭگەلەكتەرىن دە ەسكى ۆاز كولىگىنەن الدىق. كولىكتى قۇراستىرۋدا ينجەنەرلىك تۇرعىدان ارزان ءارى ءتيىمدى جولدارىن ىزدەستىردىك, – دەيدى كاسىپكەر.
تراكتوردىڭ بازالىق ءتۇرى 3 ملن تەڭگەدەن باستالادى. ايتۋىنشا, سوڭعى جارتى جىلدا قاجەتتى قوسالقى بولشەكتەر تىم قىمباتتاپ كەتكەن. سوندىقتان باعاسىن ءبىراز ۇستەمەلەۋگە تۋرا كەلىپتى. ءبىر ءوزى ۇلكەن تراكتورلاردىڭ جۇمىسىن تىندىرىپ جۇرە بەرەتىن شاعىن تەحنيكانىڭ ارتىقشىلىعى كەز كەلگەن قۋىسقا ەنىپ كەتەتىندىگىندە. قوزعالتقىشى بەنزينمەن جۇرەتىندىكتەن قىستا قاتىپ قالادى-اۋ دەپ قورقۋدىڭ دا قاجەتى جوق. قاڭقاسى شۆەللەر تەمىردەن جاسالعاندىقتان ءتوزىمدى ءارى اۋىر, جۇك تارتۋ كەزىندە دە باسىمدىققا يە, دەپ اتاپ ءوتتى قۇراستىرۋشى. مۇنداي تراكتوردىڭ بۇگىندە قازاقستان بويىنشا بىرنەشە ۇلگىسى كەزدەسەدى. دەي تۇرعانمەن ماي اۋدانىندا قۇراستىرىلاتىن تەحنيكانىڭ كوپتەگەن ارتىقشىلىعى بار. ماسەلەن, كوتەرگىشتىڭ جەبەسىنە بىتىرا مويىنتىرەك پرەستەلەدى. ادەتتە قۇراستىرۋشىلار ول جەرگە قاراپايىم بىلىك قويا سالاتىنى بار. بىلىك ءبىراز ۋاقىتتان سوڭ جەلىنىپ, جاڭارتۋعا تۋرا كەلەدى.
ساعاتىنا 15 شاقىرىمعا دەيىن جول جۇرەتىن, سالماعى 700 كيلوگرامم امبەباپ تەحنيكانىڭ ءبىرىن بۇگىندە اۋداندىق اكىمدىك ساتىپ الۋعا بەل بايلاپ وتىر. جاقىن كۇندەرى اگرەگات ارنايى پاتەنت الىپ, سەرتيفيكاتقا يە بولعان سوڭ ونى سۋبسيديالاناتىن اۋىل شارۋاشىلىعى تەحنيكالارى تىزىمىنە قوسۋ دا جوسپاردا تۇر. ەگەر تەحنيكا بيىل قىستا سىناقتان ءساتتى وتسە, ءوڭىردىڭ اۋىل شارۋاشىلىعىنا جاۋاپتى مەكەمەلەر ونى جارنامالاۋ ىسىنە اتسالىسپاق نيەتتە.
اتاپ وتەرلىگى, كەزىندەگى پاۆلودار تراكتور زاۋىتى جويىلعالى «جۇمىسكەر» وڭىردە العاش بولىپ تولىق قۇراستىرىلعان ءارى پاتەنتكە يە بولعان جالعىز شاعىن تراكتور. 2019 جىلى قىتايلىق Wan E كومپانياسىمەن كەلىسىمشارت نەگىزىندە وبلىس ورتالىعىندا قىتاي ەلىنىڭ ماشينالارى قۇراستىرىلادى دەپ كۇتىلگەن ەدى. «پاۆلودار» ارنايى ەكونوميكالىق ايماعىندا سالىنۋعا ءتيىس ءوندىرىس جوباسى سول كۇيى قاعاز بەتىندە عانا قالدى. بۇل تۇرعىدان العاندا اۋىل كاسىپكەرىنىڭ باتىل باستاماسى قوشەمەتتەۋگە تۇرارلىق.
پاۆلودار وبلىسى
