قۋانارلىعى, قازىر الاتاۋ ايماعىنداعى اۋا قىسىمى قالىپتى, وراقشىلارعا تابيعات كومەكتەسىپ تۇرعانداي. تەحنيكانىڭ دا ءتىلىن تاۋىپ, جۇمىس ىستەپ جاتقان بەساسپاپ جاندار جاراپ تۇر. الايدا مەملەكەت قولداۋىمەن ءبولىنىپ, ارزان باعادا بەرىلەتىن جانارمايدىڭ جەتىسپەۋشىلىگى تۋىندادى. جالپى, بىلتىر ايماقتا ەگىن ەگۋ جۇمىستارىنا بارلىعى 29,5 مىڭ توننا ديزەل وتىنى ءبولىنىپ, ديقان مەن شارۋا ونىڭ 15,3 مىڭ تونناسىن نەمەسە 51,8 پايىزىن عانا يگەرگەن كورىنەدى. بۇل قيسىنسىزداۋ ءۇردىس بيىل بايقالىپتى. ماسەلەن, وسى جىلى وبلىسقا 24,5 مىڭ توننا ديزەل وتىنى ءبولىندى. ونىڭ ىشىندە كوكتەمگى ەگىن جۇمىستارىنا بەرىلگەن 14,4 مىڭ توننا ديزەل وتىنىنىڭ 6,9 مىڭ تونناسى عانا پايدالانىلعان.
اۋىل شارۋاشالىعى باسقارماسىنىڭ ماماندارى مۇنى شارۋا قوجالىقتارىنان ءوتىنىمنىڭ از مولشەردە بولعانىمەن تۇسىندىرەدى. ياعني الدىن الا تاپسىرىس بەرىلمەگەننەن كەيىن قاجەتتى مولشەردەگى جانارمايدى تومەندەتىلگەن باعادا الۋ مۇمكىن ەمەس.
بىراق وسى باعىتتاعى جۇمىسقا تالداۋ جاساعان قارجىلىق مونيتورينگ اگەنتتىگىنىڭ الماتى وبلىسى بويىنشا ەكونوميكالىق تەرگەۋ دەپارتامەنتى اۋىل شارۋاشىلىعى تاۋارىن وندىرۋشىلەرگە بولىنگەن ديزەل وتىنىن كەپىلدى باعامەن ءبولۋ جانە جەڭىلدىكپەن بەرىلەتىن ديزەل وتىنىن جوسپارلاۋ زاڭمەن رەتتەلمەگەنىن انىقتادى. ەكونوميكالىق تەرگەۋ دەپارتامەنتى باسشىسىنىڭ ورىنباسارى باقىتجان تولەۋوۆتىڭ ايتۋىنشا, ماۋسىمدىق جۇمىس كەزىندە ارزانداتىلعان ديزەل وتىنىنىڭ تاپشىلىعى تۋىنداعان. قازىر جانارماي باعاسىنىڭ ورىنسىز وسۋىنە جول بەرمەۋ, ونى ءبولۋ, تاراتۋ, يگەرۋ جانە ورىن العان كەمشىلىكتەردى زاڭ اياسىندا شەشۋ جولدارى قاراستىرىلدى. وسى ورايدا شارۋالار مەن ماماندار پىكىر الماسىپ, ۇسىنىس-تىلەكتەرىن ورتاعا سالۋى دا ماڭىزدى. قۇزىرلى ورگاننىڭ تەكسەرۋىنەن كەيىن كۇزگى جيىن-تەرىنگە بولىنگەن 10,1 مىڭ توننا ديزەل وتىنى كەستەگە ساي يگەرىلە باستاعان. قازىر جەڭىلدەتىلگەن رەسۋرستاردى پايدالانۋ كەزىندە زاڭ تالاپتارىنىڭ ساقتالۋىن قامتاماسىز ەتۋ جۇمىسى جالعاسۋدا.
ايتپاقشى, جەڭىلدىكپەن بەرىلگەن جانارماي جەرگىلىكتى شارۋالارعا ۇلكەن دەمەۋ. مۇنى سەزىنگەن شارۋا قوجالىقتارى ەكپىندى ەڭبەكپەن وراق ناۋقانىنا ۇلەس قوسۋدا. مىسالى, بالقاش اۋدانىنداعى مال ءوسىرۋشى شارۋاشىلىقتار جەمشوپ دايىنداۋ جۇمىسىنا قىزۋ كىرىستى. بيىل اۋدان كولەمىندە 14 877 گەكتار سۋارمالى جەرگە كوپجىلدىق جوڭىشقا ەگىلگەن. بۇگىندە ەكىنشى ورىلىمنىڭ 6 836 گەكتارى شابىلىپ, 5 498 گەكتارى باستىرىلدى. مۇنىڭ سىرتىندا 236 گەكتار جەردەن 12 828 توننا پىشەندەمە دايىندالعان. وسى اۋدانداعى «وتەس-اقدالا» سەرىكتەستىگىنىڭ شابىندىق القابىندا شالعىنىڭ ۇنىنەن قۇلاق تۇنادى. شارۋاشىلىق بريگاديرى ءابىش بىرلىكباەۆ وزدەرىنە تيەسىلى
1 548 گەكتار جەرگە كوپجىلدىق ءشوپ ەككەنىن, بۇگىندە القاپقا ەكىنشى وراق تۇسكەنىن ايتادى. شابىندىقتىڭ 140 گەكتارىن شاۋىپ, 60 گەكتارىن باستىرعان. ءشوپ شابۋعا قاجەتتى تەحنيكالار دا ساقاداي ساي جۇمىس ىستەپ تۇر ەكەن.
– قىسقى مال ازىعىن ۋاقتىلى دايىنداۋدى ماقسات ەتكەن پىشەنشىلەر, تاڭ بوزىنان كەشكە دەيىن ماڭداي تەرلەتىپ, ەڭبەك كورىگىن قىزدىرۋدا. جوڭىشقا جاپىراعى كوك مايسا كۇيىندە ءتيىستى جەرگە جونەلتىلىپ جاتىر. ءشوپ ورۋ ناۋقانى باستالعالى جۇمىستارىن تياناقتى اتقارىپ جۇرگەن قۇرىش قيقاەۆ پەن ەرعانات اسانباي سياقتى مەحانيزاتورلاردى ماقتان ەتەمىز, – دەيدى شارۋاشىلىق بريگاديرى ءابىش بىرلىكباەۆ.
الماتى وبلىسى
