1990 جىلعا قاراي قايتا قۇرۋ رەفورماسى تىعىرىققا تىرەلىپ, كەڭەس وداعىنىڭ ەكونوميكاسى كۇيرەپ جاتتى. ەڭ اۋىر كەزەڭ باستالدى. الەم ءباسپاسوزى 250 ميلليون تۇرعىننىڭ اشارشىلىققا ۇشىرايتىنى تۋرالى اشىق جازا باستادى. ونىڭ ىشىندە قازاقستاننىڭ 16 ميلليون ادامى بار ەدى. ۇزاقباي قارامانوۆ كۇن-ءتۇن دەمەي ماسكەۋ مەن الماتى, الماتى مەن ايماقتار اراسىنا شاپقىلاپ, ءوندىرىستىڭ سوڭعى تىنىسىن توقتاتپادى. رەسپۋبليكانىڭ ءوز كۇشىمەن تىربانۋىن قامتاماسىز ەتتى. وداقتىق باعىنىستاعى كاسىپورىنداردى قازاقستاننىڭ قولىنا الۋعا بارىن سالدى. وندا رەسپۋبليكا ەكونوميكاسىنىڭ 95 پايىزى تىكەلەي ماسكەۋگە باعىناتىن. جەڭىل ونەركاسىپ, جەرگىلىكتى ونەركاسىپ جانە تۇرمىستىق قىزمەت مينيسترلىكتەرى عانا الماتىعا قاراپ, ەسەپ بەرەدى.
الىپ زاۋىتتار مەن كومبيناتتاردى رەسپۋبليكانىڭ باسقارۋىنا الۋ مەن وسىندا سالىق تولەتۋ ءۇشىن كۇرەستە ازۋ تانىتتى. قىزمەتتى مينيسترلەر كەڭەسىنىڭ توراعاسى دەگەن لاۋازىممەن باستاپ, 1991 جىلدىڭ كۇزىندە ونىڭ مارتەبەسىن پرەمەر-مينيسترگە اينالدىردى. ءسويتىپ, قارامانوۆ قازاقستان رەسپۋبليكاسىنىڭ تۇڭعىش پرەمەر-ءمينيسترى بولدى.
ۇكىمەتتى باسقارۋعا اياق استىنان تاپ بولماعانىن بۇكىل ءومىر جولى ايعاقتايدى. بۇل – شىڭدالۋدىڭ, ءوزىن جەتىلدىرۋدىڭ جارقىن جولى. سوندىقتان بىرقاتار بەدەرىمەن تانىستىرىپ وتەلىك.
ۇزاقباي – ارال ايماعىنا اتى كەڭ تانىمال بولعان قارامان دەگەن بالىقشىنىڭ بالاسى. قارامان ىڭعاەۆ قازاق بالىقشىلارى اراسىندا ءبىرىنشى رەت «قۇرمەت بەلگىسى» وردەنىن العان. ونى ماسكەۋدە «بۇكىلوداقتىق ستاروستا» اتانعان ميحايل كالينين ءوز قولىمەن تاققان. سول جولى جامبىل جاباەۆ پەن قارامان ىڭعاەۆ قاتار وتىرعان اۆتوكولىك ماسكەۋدى ارالاپ, بۇلارعا قالانى مولوتوۆتىڭ ايەلى جەمچۋجينا تانىستىرعان.
قاراماننىڭ بەل بالاسى ۇزاقبايدىڭ دۇنيەگە كەلۋىنىڭ ءوز سىرى بار. ءتورت رەت قىز تاپقان اناسى ايىمسۇلۋ جانە باستارىنا قيىندىق تۇسكەن تاعى ەكى كەلىنشەك قايىقپەن قىرعا شىعىپ, بەكتاۋ دەگەن جەردەگى اۋليەنىڭ باسىنا تۇنەيدى. سوندا ايىمسۇلۋ ءتۇس كورىپ, جانعوجا باتىر بۇلاردىڭ ۇيىندەگى ادالباقانعا بوركىن ءىلىپ كەتەدى. وسىدان كەيىن بالىقشىلار بريگاديرى قارامان مەن بۇكىل تۋىستار ۇزاق كۇتكەن ۇل – ۇزاقباي ىڭگالاعان.
ءتۇستىڭ تاعى ءبىر تىلسىمى ءوزىنىڭ باسىنان وتكەن. وندا «المااتاپرومستروي» ترەسىنە قاراستى قۇرىلىس ماتەريالدارى مەن قۇراستىرمالارى زاۋىتىنىڭ ديرەكتورى بولاتىن. ترەسكە قاراستى بارلىق قۇرىلىس-مونتاج باسقارمالارىن بەتون قۇرامالارمەن, پانەلدەرمەن, ەسىك-تەرەزەمەن جابدىقتايدى. جۇمىسى ءمىنسىز. جابدىقتاۋ كەستەسى مۇلتىكسىز ورىندالۋدا. الماتىنىڭ اباي داڭعىلىن ساين داڭعىلىنا دەيىن سوزىپ, جاڭا شاعىن اۋداندار قۇرىلىسىنا كەرەك ماتەريالدىڭ ءبارىن ول باسقارعان زاۋىت شىعارادى.
ءبىر كۇنى ديرەكتور الاڭداپ ويانادى. جۇمىسقا بارار كەزدەگى تاڭعى شايىن قۇيىپ جاتىپ زايىبى ۇلداي نە بولعانىن سۇرايدى. «تۇسىمدە ستالين ەكەۋىمىز ءبىر تاباقتان ەت جەپ وتىر ەكەنبىز. ستالين ولگەن ادام عوي, مەن دە ءولىپ قالامىن با دەپ قورقىپ وتىرمىن», دەيدى ۇزاقباي. سوندا ۇلداي اپامىز «ستالين ەل باسقارعان. ونىمەن تاباقتاس بولساڭ, سەن دە ەل باسقارۋعا جەتەسىڭ» دەپ جاقسىلىققا جوريدى.
تۋرا سول كۇنى قارامانوۆتى ترەسكە شاقىرادى. بارسا, سەنى «الماتى قۇرىلىس» باس باسقارماسىنان ىزدەپ جاتىر» دەيدى. باس باسقارماعا بارسا, «ويباي, سەنى سۇراتقان ءبىز ەمەس, قالالىق پارتيا كوميتەتى, سوندا بار» دەيدى. ونداعىلار بولسا «ورتالىق كوميتەتكە زاۋلا, سولار شاقىرىپ جاتىر» دەيدى. نە كەرەك, ۇزاقبايدى ورتالىق كوميتەتتىڭ قۇرىلىس بولىمىنە جاۋاپتى قىزمەتكە تاعايىنداماق ەكەن.
ورتالىق كوميتەتتە قىزمەتتە جۇرگەنىندە ارالدان اكەسى كەلدى. بار شارۋاسى – «قوناەۆ وتىراتىن جەردى كورسەت». وردەن تاققان قارامان اقساقالدى قوناەۆتىڭ قابىلداۋ بولمەسى جانىنداعى كۇزەتكە دەيىن اپارادى. قارت بالىقشى ريزا. كەزىندە كرەملدە بولعان ەدى, ەندى الماتىداعى ۇكىمەت ءۇيىن كورىپ شىققانىنا عانا ەمەس, بالاسىنىڭ سوندا قىزمەت ىستەيتىنىنە ريزا بولعانى انىق.
ءبارىبىر كابينەتتەگى جۇمىس ۇزاقبايعا قول ەمەس ەكەن. ءبىر جىلعا جەتپەي قۇرىلىس سالاسىنا جىبەرۋگە سۇراندى. كۋيبىشەۆتەگى ساۋلەت جانە قۇرىلىس ينستيتۋتىن بىتىرگەن, تۋعان جەرى ارالدا كوپ عيمارات سالعان, ۇلكەن ۇلىنىڭ دەنساۋلىق جاعدايىمەن الماتىعا كەلىپ, مۇندا ءوزىن تانىتقان قارامانوۆ پارتيانىڭ ورتالىق كوميتەتىندەگى قىزمەتتەن باس تارتتى. بۇرىن بولماعان قۇبىلىس. ورتالىق كوميتەتتىڭ ەكىنشى حاتشىسى ۆيتالي تيتوۆ قاتتى تاڭعالعان. ترەست باسشىسىنا تاعايىنداۋعا بوس ورىن بولماي, اقىرى 22-قۇرىلىس-مونتاج باسقارماسىنا باستىق ەتتى. كەشىكپەي قارامانوۆ ءبارىبىر «المااتاپرومستروي» ترەسىن باسقاردى. كەلەسى ساتىدا قانشاما ترەستىڭ باسىن قۇرايتىن «الماتى قۇرىلىس» باس باسقارمانىڭ تىزگىنىن قولعا الدى.
الماتىنىڭ قازىرگى دوستىق, سول كەزدەگى لەنين داڭعىلى بويىنداعى توعىز قاباتتى ۇيلەردىڭ, لەنين اتىنداعى سارايدىڭ, «قازاقستان» قوناقۇيىنىڭ, مەدەۋ مۇز ايدىنىنىڭ, اۋەزوۆ اتىنداعى دراما تەاترىنىڭ قۇرىلىسىن باسقاردى. كيروۆ اتىنداعى زاۋىتتىڭ ىستىقكولدەگى قۇپيا تورپەدو سىناۋ بازاسىن سالدى. ءبارىن ساناپ تاۋىسۋ مۇمكىن ەمەس. قۇرىلىس سالاسىنان ديپلوم العان قازاق جاستارىن تاۋىپ, قامقورلىق جاسادى. كەيىن «الماتى قۇرىلىس» باس باسقارماسىنىڭ تىزگىنىن ءوزى باۋلىعان مامانداردىڭ ءبىرى امانگەلدى ەرمەگياەۆكە سەنىپ تاپسىردى.
ويتكەنى ءوزى وسە بەرگەن. ءارى قاراي جەڭىل ونەركاسىپ ءمينيسترىنىڭ ورىنباسارىنا تاعايىندالدى. وسى سالانىڭ قۇرىلىستارىن: ءار وبلىستاعى اياقكيىم, تەرى وڭدەۋ, ش ۇلىق-ۇيىق, تىگىن جانە توقىما فابريكالارىن, ونىڭ ىشىندە اتاقتى الماتى ماقتا-ماتا كومبيناتىن سالدى. بۇدان كەيىن مينيسترلەر كەڭەسى جانىنداعى قازاق سەلدەن قورعاۋ باس باسقارماسىن باسقاردى. ۇزاقباي اعانى العاش وسى قىزمەتتە كوردىك. وندا ۇلكەن الماتى كانالى سالىنىپ جاتتى. ونىڭ قۇرىلىسىن تەڭ ءبولىپ, ءۇش مەكەمەگە تاپسىرعان. سونىڭ ءبىرى قازاق سەلدەن قورعاۋ باس باسقارماسى ەدى. ءبىز جاستار گازەتىنىڭ ءتىلشىسى رەتىندە قۇرىلىس باسىندا بولىپ, «ىرىس ارناسى» اتتى ۇلكەن ماقالا جازعانبىز.
وسى الىپ قۇرىلىس كەزىندە قارامانوۆتىڭ تياناقتىلىعى, تالاپ قويعىشتىعى مەن ىسكەرلىگى رەسپۋبليكا باسشىسى قوناەۆقا قاتتى ۇنايدى. سودان قارامانوۆ اۋىر يندۋستريا كاسىپورىندارى قۇرىلىسى ءمينيسترىنىڭ ءبىرىنشى ورىنباسارىنا تاعايىندالدى. بۇل – مينيستر لاۋازىمىنا تەڭدەستىرىلگەن قىزمەت. سەبەبى: اۋىر يندۋستريا – بۇكىل ءوندىرىستىڭ جۇرەگى.
قارامانوۆ قاراعاندى, قوستاناي, شىعىس قازاقستان, شىمكەنت, اقتوبە اراسىندا تىنباي ءجۇرىپ ۇلكەن ءوندىرىس ورىندارىن ىسكە قوستى. تەمىرتاۋدا اق قاڭىلتىر تسەحىن سالدى. جەزقازعاننىڭ جايرەمىندە كەن-بايىتۋ كومبيناتىنىڭ قۇرىلىسىن قىزۋ جۇرگىزدى. ءبىزدىڭ جولىمىز وسى جەردە تاعى تۇيىسكەن. جاستار گازەتىنە «جاستىقتان بەلگى قالدى جايرەم دەگەن» تاقىرىپپەن بىرنەشە ماقالا جازدىق. قوستانايدا حيميالىق تالشىقتار زاۋىتىن, ليساكوۆ پەن قاشار قالالارىندا كەن-بايىتۋ كومبيناتتارىن, رۋدنىيداعى الىپ كومبيناتتىڭ قوسىمشا قۋاتتارىن سالۋعا باسشىلىق ەتتى. شىمكەنتتە شينا مەن مۇناي ايىرۋ زاۋىتتارىنىڭ قۇرىلىسىنا جاۋاپتى ەدى.
وسى تۇستا العاشقى رەفورماسىن جاسادى. مينيسترلىك پەن ترەستەر اراسىنداعى وبلىسارالىق باس باسقارمالاردى ارتىق بۋىن رەتىندە قىسقارتتى. ونداعى ماماندار ناقتى وندىرىسكە جىبەرىلدى. بۇكىل ترەستەردى مينيسترلىك تىكەلەي باسقارادى. جۇمىس اۋىرلادى, بىراق ءجۇرۋ قارقىنى جەدەلدەدى.
وسى قىزمەت بويىنشا كەزەكتى ىسساپارمەن قوستانايعا كەلگەن ەدى. بىراق اۋەجايدان وبلىستىق پارتيا كوميتەتىنىڭ ەكىنشى حاتشىسى كۇتىپ الىپ, ء«سىزدى ورتالىق كوميتەتتەن ىزدەپ جاتىر. وسى ۇشاقپەن الماتىعا قايتاسىز» دەيدى. «تاعى نە بولىپ قالدى» دەپ ويلاسا, رەسپۋبليكالىق ماتەريالدىق جابدىقتاۋ كوميتەتىن باسقارۋعا تاعايىنداماق ەكەن. بۇل – ۇكىمەت مۇشەسى بولۋ.
1987 جىلى قازاقستاندا «تۇرعىن ءۇي – 91» اتتى باعدارلاما باستالعان. سوعان وراي بارلىق ايماقتاعى تۇرعىن ءۇي قۇرىلىسىن قاجەتتى ماتەريالمەن قامتاماسىز ەتۋگە بىلىكتى باسشى ىزدەستىرىلگەن. تاڭداۋ ۇزاقباي قارامانوۆقا ءتۇسىپتى. وسى قىزمەتتى ابىرويمەن اتقارعاندىقتان وعان 1989 جىلى جازدا قازاقستان ۇكىمەتىن باسقارۋدى سەنىپ تاپسىردى. مىنە, قارامانوۆتىڭ ءوسۋ جولى وسىنداي. ەش جەتەكسىز, «كوكە» مەن «جاكەسىز» شىققان بيىگى.
ۇكىمەت باسشىسى كسرو جوعارعى كەڭەسىنىڭ دەپۋتاتى دا بولۋى كەرەك. سايلاۋعا تالدىقورعان وبلىسىنان تۇسۋگە ءتيىس. وسى كەزدە ايماقتىڭ سايلاۋشىلارىنا عانا ەمەس, بۇكىل رەسپۋبليكاعا ۇزاقباي قارامانوۆتى كەڭىنەن تانىستىرۋ بىزگە تاپسىرىلدى. جۇزدەسىپ, قازىرگى «Egemen Qazaqstan» گازەتىنىڭ ەكىنشى بەتىن تولتىرىپ «نار جولىندا جۇك قالمايدى» دەگەن ماقالا جازىپ ەدىك. كەشىكپەي باسىلىمنىڭ 70 جىلدىق مەرەيتويىنا ءوزى سالعان اۋەزوۆ اتىنداعى تەاترعا كەلگەندە الدىنا ماقتانىپ بارۋعا ۇيالعانبىز.
حالىققا قىزمەتىن ايتپاعاندا كىسىلىگى كوپكە ۇلگى ەدى. بويىندا تاكاپپارلىق, مەنمەنسۋ جوق. بارىنشا قاراپايىم, بىراق سۇمدىق تالاپ قويعىش. ونسىز ۇكىمەتتى دە, قۇرىلىس سالاسىن باسقارۋ مۇمكىن ەمەس. ەكى تىلدە بىردەي كىممەن بولسىن ەركىن سويلەسەدى.
ادالدىعى ادام تاڭعالارلىقتاي. قۇرىلىس سالاسىندا ءجۇرىپ وتباسىنىڭ باسپانا ماسەلەسىن ويلامايتىن. بولماعان سوڭ زايىبى ۇلداي جوعارى باسشىلاردىڭ الدىنا بارىپ, دۇرىس پاتەر سۇراعان كەزى بولعان. بۇكىل رەسپۋبليكانى ماتەريالدىق جاعىنا جابدىقتاپ تۇرىپ ۇيىنە ساباقتى ينە اكەلمەگەن. ەسەسىنە 1989 جىلى قازالى اۋدانىنا قار قالىڭ ءتۇسىپ, كوكتەمدە بىرنەشە كۇن نوسەر قۇيىپ, ەسكى ۇيلەر قۇلاپ قالعانىن كورگەندە 3 ميلليون كەڭەس سومى مولشەرىندەگى قۇرىلىس ماتەريالىن جونەلتەدى.
قىزمەتتى جەكە باسىنا پايدالانباعانىنا جانە ءبىر قىزىق مىسال بار. رەسپۋبليكا ۇكىمەتىن باسقارىپ جۇرگەنىندە ءۇش ۇلدىڭ كەنجەسىن اسكەرگە شاقىرادى. جارتى جىلدان كەيىن ايەلى ۇلداي اسكەردەگى بالاسىنىڭ جاعدايىن بىلۋگە بارماي ما. سوندا اسكەري بولىمدەگى وفيتسەرلەر ونىڭ اكەسى قازاقستان ۇكىمەتىنىڭ باسشىسى ەكەنىن ءبىر-اق ەستىپتى. نەگە اكەسى اسكەردەن الىپ قالماعان؟ نەگە سولدات اكەسىنىڭ رەسپۋبليكا مينيسترلەر كەڭەسىنىڭ توراعاسى ەكەنىن ايتپاعان؟ وتباسىنداعى ءتارتىپ پەن تاربيەنى وسى مىسال بايقاتسا كەرەك.
ۇزاقباي اعانىڭ الدىنان تالاي جاقسى ادامدار جولىققان. كۋيبىشەۆتە وقىپ جۇرگەندە پراكتيكادان ۆولگا وزەنى ارقىلى تەپلوحودپەن قايتادى. پالۋبادا ەكى ادام شاحمات ويناپ وتىر. مۇنى كۋرستاس دوسى ۆاسيلي كارپوۆ بۇيىردەن ءتۇرىپ, «سەن ويناساڭشى, ينستيتۋتتىڭ چەمپيونىسىڭ عوي» دەيدى. ءيا, وقۋعا تۇسكەنشە شاحمات ويناماعان ۇزاقباي ءتورت جىلدان سوڭ چەمپيون بولىپ شىققان. العىرلىعىنىڭ بەلگىسى.
نە كەرەك, شاحمات تاقتاسىندا ءبىر كىسىگە قارسى ويناپ, قاتارىنان ءۇش رەت ۇتىلادى. سويتسە, قارسىلاسى – شاحماتتان الەم چەمپيوندىعىنا بىرنەشە رەت ۇمىتكەر بولعان حالىقارالىق گروسسمەيستەر لەۆ پولۋگاەۆسكي, قاسىنداعىسى داڭقتى ميحايل تال ەكەن!
24 جاسىندا, ارالداعى 250 ادامى بار قۇرىلىس باسقارماسىن باسقارعان جاس مامانعا قالانى سۋمەن جابدىقتاۋ ءۇشىن امانوتكەل – ارال قۇبىرىن تارتۋعا تاپسىرما تۇسكەن. ەكى ارا 99 شاقىرىم. بولات قۇبىردىڭ ديامەترى 1 مەتر, ءارى جەر استىندا جاتادى. بەلگىلەنگەن ەكى جىلدا قۇرىلىستى قابىلداۋعا الماتىدان تۇرعىن ءۇي-كوممۋنالدىق شارۋاشىلىق ءمينيسترىنىڭ ورىنباسارى اتىمتاي قيسانوۆ كەلگەن. تۇگەل ارالاپ, سۋدى جوعارى قىسىممەن ايداپ, تەكسەرەدى. اقىرى اكتىگە قول قويىپ قابىلدايدى. سوندا «قوناەۆتىڭ ەڭ سەنىمدى ادامى» دەلىنەتىن اتىمتايدى ءبىر رەت قوناق ەتپەپتى. ەكەۋى قۇرىلىسشىلار اسحاناسىنان تۇستەنىپ, وعان ۇلگەرمەسە ماشينانىڭ كاپوتىنا قاعاز جايىپ, نان مەن بالىق جەپ, سۋ ءىشىپ جۇرە بەرەتىن.
وسىنىڭ ءبارىن باعامداعاندا قارامانوۆ اسپاننان تۇسكەن, ياعني بيلىكتە اياق استىنان پايدا بولعان تۇلعا ەمەس. قايتا بۇكىل ءبىلىمى مەن كۇش-قۋاتىن مەملەكەتىمىز تولىق پايدالانا الماعان قايراتكەر بولاتىن. اۋىل شارۋاشىلىعىن ىدىراتىپ, جەكەشەلەندىرۋگە بولمايتىندىعى تۋرالى ۇستانىمدا ەدى. ارادا وتىز جىل وتكەندە, جەر ءجۇزى ازىق-ت ۇلىكتىڭ سۇراپىل تاپشىلىعىنا تاپ بولعاندا سان سوعىپ وتىرمىز. قازاقستاندى الەمدەگى ەڭ كوپ استىق پەن ەڭ ءدامدى مال ونىمدەرىن ەكسپورتتايتىن مەملەكەتتەردىڭ الدىڭعى ساپىنا شىعارۋدىڭ مۇمكىندىگى قولدان سۋسىپ كەتىپتى.
ۇكىمەت باسقارعاننان كەيىنگى قىزمەتىندە قارامانوۆتىڭ ارال ايماعىن ساقتاپ قالۋداعى قايراتكەرلىگى ەرەكشە. بۇكىل دۇنيەجۇزىلىك بانككە دونور ەلدەردىڭ قارجى اۋدارۋى, سوعان كوكارال سۋ بوگەنىن تۇرعىزۋ ءۇشىن ەڭبەك ەتتى. بىرنەشە مەملەكەتتىڭ باسىن قوسقان حالىقارالىق ارال قورىن باسقاردى. پارلامەنت ءماجىلىسىنىڭ كوميتەت توراعاسى بولعاندا دەپۋتاتتاردىڭ ۇلكەن توبىن ايماققا اپارىپ, جەرگىلىكتى جاعدايمەن تانىستىردى. كوشپەلى ءماجىلىس وتكىزدى. سول ارقىلى ەكولوگيالىق اپات ايماعىن ساۋىقتىرۋعا ۇمتىلدى.
كەڭەس وداعىنىڭ الدىمەن ماقتا, ودان كەيىن كۇرىش دەگەن ساياساتىنىڭ قۇربان بولعان قايران ارال جاستىق شاعىنىڭ سىرىنا كۋا ەدى. امال نە؟! باستاۋىش مەكتەپتى وقىعان ءۇشمىرزا, ودان ورتالاۋ مەكتەپتى وقىعان ۇيالى اۋىلدارىنىڭ ورنى دا قالماعان. ۇيالىدا جىلىنا 20 مىڭ توننا بالىق وڭدەيتىن ۇلكەن زاۋىت بولعان. ارالدان كۇن سايىن ۇشاق قاتىنايتىن. ەكى جاعالاۋدىڭ اراسى 300 شاقىرىم.
بىردە ستۋدەنت ۇزاقباي سۋ جولى ارقىلى ۇيالىدان ارالعا كەمەمەن شىعادى. سول كەمەگە مەديتسينا ۋچيليششەسىندە وقيتىن ۇلداي دا وتىرىپتى. ديزەلدى كەمە 300 شاقىرىمعا 33 ساعات جۇزەدى. ەكى كۇن, ءبىر تۇندە ەكى جۇرەكتە ماحاببات ۇشقىندايدى. ۋادەلەسىپ الىپ, ءتورت جىلدان سوڭ ۇزاقباي ينستيتۋت ءبىتىرىپ كەلگەندە ەكەۋى ۇيلەنگەن. ءتورت كۇنگە شىدامايتىن قازىرگىلەر ءۇشىن ەرتەك شىعار.
ارالداعى كەمەنىڭ ماحاببات وقيعاسى «تيتانيكتەن» اناعۇرلىم ءساتتى بولدى. ەكەۋى ءۇش ۇل ءوسىردى. ۇزەكەڭ حالىقتىڭ قۇرمەتىنە بولەنىپ, 80 جاسقا جەتىپ, ومىردەن ءوتتى. ۇلداي اپا مەديتسينا ۋچيليششەسىنەن كەيىن ۇلىمەن قاتار وقىپ, ۋنيۆەرسيتەتتىڭ زاڭ فاكۋلتەتىن ءبىتىردى. باس پروكۋراتۋرادا جاۋاپتى قىزمەت ىستەدى.
تەك بۇل «تيتانيك»» جۇزگەن ايدىن باياعىداي شالقىمايدى. ۇلى تەڭىزدىڭ ورنىندا كىشى ارال عانا ساقتالدى. وندا دا قارامانوۆ سياقتى قايراتكەرلەردىڭ ارقاسىندا.
قاينار ولجاي
