ءبىلىم بەرۋ نىسانى Amanat پارتياسىنىڭ سايلاۋالدى باعدارلاماسىن ورىنداۋدىڭ جول كارتاسىن ىسكە اسىرۋ اياسىندا قولعا الىنعان. سوندىقتان نىساننىڭ ساپالى ءارى ءوز ۋاقىتىندا اياقتالۋى پارتيا باقىلاۋىندا تۇر. مەكتەپتىڭ قۇرىلىسى 2020 جىلى باستالىپ, بيىلعى وقۋ جىلىنىڭ باسىندا, ياعني قىركۇيەكتە تاپسىرىلۋى كەرەك بولاتىن. مەردىگەردىڭ ايتۋىنشا, قۇرىلىس ماتەريالدارىنىڭ قىمباتتاۋى سالدارىنان جوبالىق-سمەتالىق قۇجاتتى قايتا تۇزەتۋ قاجەت بولعان. سونىڭ سالدارىنان قۇرىلىس جۇمىسى كەشىكتىرىلگەن.
ءماجىلىس دەپۋتاتى يۋليا كۋچينسكايانىڭ پىكىرىنشە, ماسەلەنىڭ تۇپكى سەبەپتەرى مەملەكەتتىك ساتىپ الۋ تۋرالى زاڭىنىڭ شيكىلىگىنەن بولىپ وتىر. ء«بىز پارتيانىڭ سايلاۋالدى باعدارلاماسى اياسىندا قولعا الىنعان قۇرىلىس نىساندارىنا مونيتورينگ جۇرگىزۋ بارىسىندا مەملەكەتتىك ساتىپ الۋ تۋرالى زاڭىنىڭ شيكىلىگىنەن تۋىنداعان ءبىرشاما ولقىلىقتى بايقادىق. ءبىز تەك مونيتورينگ جۇرگىزىپ, نىساندى ۋاقىتىندا تاپسىرماعان مەردىگەردى جازالاۋدى ماقسات تۇتپايمىز. نەگىزگى ماقساتىمىز – زاڭداردى جەتىلدىرۋ. قانداي زاڭدا, نەندەي ولقىلىقتارىن بارىن انىقتاۋعا تىرىسىپ وتىرامىز. ماسەلەن, بۇگىندە «مەملەكەتتىك ساتىپ الۋ تۋرالى» زاڭنىڭ جەتىلمەگەندىگىن بايقادىق. ودان قالدى قۇرىلىس نىساندارىن سالۋدى جوسپارلاۋ جۇيەسى دە ناقتى ەمەس. ولاي دەيتىنىم, مەردىگەرمەن اڭگىمەلەسۋ بارىسىندا جوبالىق-سمەتالىق قۇجاتتامانىڭ اۋەلدە-اق ساپاسىز ازىرلەنگەنىن, گەولوگيالىق بارلاۋمەن بايلانىستى پروبلەمالار انىقتالعانىن بىلدىك. كەلەسى سەسسياداعى جۇمىس اياسىندا ءبىز وسى ماسەلەلەردى كوتەرەمىز. «مەملەكەتتىك ساتىپ الۋ تۋرالى» زاڭدى جەتىلدىرۋ بويىنشا مەملەكەت باسشىسى بىرنەشە رەت تاپسىرما بەردى. بۇل تاقىرىپ دەپۋتاتتاردىڭ اينالىساتىن نەگىزگى باعىتتارىنىڭ ءبىرى», دەدى يۋليا كۋچينسكايا.
ءوز كەزەگىندە, قۇرىلىس نىسانىنىڭ باس مەردىگەرى «دوستار» كوپسالالى كومپانياسىنىڭ وكىلى اسلان نابيەۆ مەكتەپتى جەلتوقسان ايىندا اياقتاۋعا تىرىسامىز دەپ وتىر.
ءماجىلىس دەپۋتاتى ءمادي ەليۋباەۆ مەكتەپتىڭ قۇرىلىسى اۋىلداعى ءۇش اۋىسىمدا وقۋ ماسەلەسىن ءبىرشاما شەشۋگە كومەكتەسەتىنىن العا تارتتى. دەپۋتاتتاردىڭ ايتۋىنشا, ەلوردا ماڭىنداعى ەلدى مەكەندەردەگى ەڭ نەگىزگى پروبلەما تۇرعىندارىنىڭ رەسمي تىركەلمەگەندىگىنەن تۋىنداپ وتىر. ماسەلەن, «جىبەك جولى» اۋىلىنداعى جەرگىلىكتى حالىقتىڭ سانى رەسمي دەرەك بويىنشا 10 مىڭنىڭ اينالاسىندا بولسا, شىنداپ كەلگەندە, تۇرعىندار ودان ەكى ەسە كوپ.
بۇل ءوز كەزەگىندە ەلوردا اينالاسىنداعى اۋىلداردا الەۋمەتتىك ينفراقۇرىلىمداردىڭ جەتىسپەۋشىلىگىنە الىپ كەلۋدە. سوندىقتان حالىق قالاۋلىلارى الداعى ۋاقىتتا اگلومەراتسيالاردى دامىتۋ تۋرالى زاڭدى جەتىلدىرۋ قاجەت دەپ سانايدى.
جالپى, «جىبەك جولى» اۋىلدىق وكرۋگىندە بۇگىندە ەكى مەكتەپتىڭ قۇرىلىسى جۇرۋدە. ەكەۋى دە 300 ورىنعا شاقتالعان. ءماجىلىس دەپۋتاتتارى مەكتەپ قۇرىلىسىنىڭ جىلدىڭ سوڭىنا دەيىن جىلدام ءارى ساپالى ورىندالۋىن باقىلاۋدا ۇستايتىندارىن ايتتى.
