وبلىستاعى وقۋشى سانى 330 مىڭنىڭ ۇستىندە ەكەن. ال 35 مىڭ بالا بيىل تۇڭعىش رەت مەكتەپ تابالدىرىعىن اتتاماق. دەرەككە جۇگىنسەك, وبلىستاعى بارلىق مەكتەپ 100 پايىز كومپيۋتەرلىك تەحنيكامەن جابدىقتالعان جانە ينتەرنەت جەلىسىنە قوسىلعان. سونداي-اق «كۇندەلىك» اۆتوماتتاندىرىلعان اقپاراتتىق جۇيەسىنىڭ قىزمەتىن 396 ءبىلىم بەرۋ ۇيىمى قولدانادى. ال تسيفرلىق ءبىلىم بەرۋ رەسۋرستارىنا ايماقتاعى 385 مەكتەپ قوسىلۋعا مۇمكىندىك السا, ونىڭ تۇگەلگە دەرلىگى BilimLand جۇيەسىمەن جانە ءبىر مەكتەپ Daryn.online.kz جۇيەسىمەن جۇمىس ىستەيدى.
– بيىل ايماقتا 35 مىڭ وقۋىشى مەكتەپ تابالدىرىعىن ءبىرىنشى رەت اتتاعالى وتىر. قازىر وقۋشىلاردى مەكتەپكە دايىنداۋ جۇمىسى قارقىن العان. ول جاقىن كۇندەرى تولىق اياقتالادى. ونىڭ ىشىندە از قامتىلعان وتباسىدان شىققان
27 765 بالانى تەگىن مەكتەپ فورماسىمەن جانە كەڭسە زاتتارىمەن قامتاماسىز ەتۋ جوسپارلانۋدا. ءبىر بالاعا مەكتەپ فورماسى مەن كەڭسە تاۋارلارىن 37 500 تەڭگەگە الۋعا بولادى. سونداي-اق «مەكتەپكە جول» اكتسياسى اياسىندا بالالارعا 736 ملن تەڭگە كولەمىندە كومەك كورسەتىلدى. وقۋلىقتار ساتىپ الۋ جانە كىتاپ قورىن جاڭارتۋ ءۇشىن 2,7 ملرد تەڭگە قاراجات ءبولىندى, – دەيدى وبلىستىق ءبىلىم باسقارماسى باسشىسىنىڭ ورىنباسارى گۇلسارا يساعۇلوۆا.
الماتى وبلىسى ەلىمىزدەگى ءۇش اۋىسىمدا وقيتىن مەكتەپ سانى جونىنەن الدىڭعى ورىندا. قازىر ايماقتاعى 54 ءبىلىم وشاعىنا بالا سىيماعاندىقتان, وقۋشىلار ءۇش اۋىسىمعا ءبولىنىپ وقۋعا ءماجبۇر. جالپى, وڭىردە 54 ءۇش اۋىسىمدى مەكتەپ بار, مەكتەپ جەتىسپەۋشىلىگى, اسىرەسە الماتى قالاسى ماڭىنداعى اۋدانداردا قاتتى سەزىلىپ وتىر. مىسالعا, ىلە اۋدانىندا – 20, قاراساي اۋدانىندا – 12, جامبىل اۋدانىندا – 10, تالعار اۋدانىندا – 6, ەڭبەكشىقازاق اۋدانىندا – 5 جانە ۇيعىر اۋدانىندا 1 مەكتەپتە ورىن جەتىسپەۋشىلىگى بار. جالپى, ايماق بويىنشا 23,3 مىڭ وقۋشىعا ورىن سانى جەتكىلىكسىز. سونداي-اق وڭىرگە 467 پەداگوگ مامان قاجەت. ونىڭ ىشىندە تالعار اۋدانىندا – 133, ىلە اۋدانىندا – 89, ەڭبەكشىقازاق اۋدانىندا – 67, قاراساي اۋدانىندا – 55, جامبىل اۋدانىندا 40 مۇعالىمگە سۇرانىس بەرىلگەن.
– وبلىستا 21 ءبىلىم بەرۋ نىسانىنىڭ قۇرىلىسى جۇرگىزىلۋدە, 20 مەكتەپتىڭ ون جەتىسى ءۇش اۋىسىمدى مەكتەپتەر ماسەلەسىن شەشۋگە باعىتتالعان. جىل سوڭىنا دەيىن 13 نىساندى پايدالانۋعا بەرۋ جوسپارلانعان, ونىڭ ىشىندە كەگەن اۋدانىنىڭ جالاڭاش اۋىلىنداعى مەكتەپ 1 قىركۇيەككە دەيىن پايدالانۋعا بەرىلەدى. وسى ماقساتتا بولىنگەن 39 ملرد تەڭگە قارجىنىڭ 5,2 ملرد تەڭگەسى يگەرىلدى نەمەسە كورسەتكىشى 13,3 پايىزدى قۇراعان. جاڭا وقۋ جىلىندا 1 300 ورىندىق 2 مەكتەپ, سونداي-اق 250 ورىندىق 2 جەكەمەنشىك مەكتەپ قولدانىسقا بەرىلەدى. قالعان ون مەكتەپ جىل سوڭىنا دەيىن وقۋشىلارعا ەسىگىن ايقارا اشپاق. مۇنان بولەك, 18 ءبىلىم بەرۋ نىسانىنا 8,7 ملرد تەڭگەگە كۇردەلى جوندەۋ جۇرگىزىلىپ جاتىر. ونىڭ ۇشەۋىندە جوندەۋ جۇمىستارى اياقتالدى, – دەيدى وبلىستىق ءبىلىم باسقارماسى باسشىسىنىڭ ورىنباسارى گۇلسارا يساعۇلوۆا.
كۇردەلى جوندەۋ جۇمىسى اياقتالعان ءبىلىم وشاعىنىڭ ءبىرى – كەگەن اۋدانى, جالاڭاش اۋىلىنداعى ج.ەرمەگياەۆ اتىنداعى ورتا مەكتەپ. قازىر 940 بالاعا ارنالعان مەكتەپتە 245 وقۋشى ءبىلىم الادى ەكەن. جاقىندا كەگەن اۋدانىنىڭ اكىمى تالعات بايەدىلوۆ وسى ءبىلىم شاڭىراعىنىڭ بوس تۇرعان سىنىپ بولمەلەرىنىڭ نەگىزىندە فيزيكا-ماتەماتيكا باعىتىنداعى ليتسەي اشۋدى ۇسىنعان بولاتىن. بۇل ۇسىنىس وبلىستان قولداۋ تاپقان, ياعني ەندى اۋىل بالالارى تەرەڭدەتىلگەن ءبىلىم الاتىن كۇن الىس ەمەس.
الماتى وبلىسى
