الماتىدا تۋعانىنا التى كۇن بولعان قىزدى 24 جاستاعى كەلىنشەك پەن ونىمەن بىرگە تۇراتىن 21 جاستاعى ەر ادام 2 ملن تەڭگەگە ساتپاق بولدى. اتالعان قىلمىستى جاسادى دەگەن كۇدىكپەن جەتى ادام قاماۋعا الىندى. بۇل تۋرالى الماتى قالالىق پوليتسيا دەپارتامەنتى باستىعىنىڭ ورىنباسارى ديدار احانوۆ مالىمدەدى.
«جۇپ ءالى تۋماعان بالانى ساتىپ الۋشىلاردى ەكى اي بۇرىن ىزدەي باستاعان. بالانى الماتى قالاسىنىڭ تۇرعىندارى العىسى كەلگەن. ولار 48 جاستاعى ۋ. ەسىمدى ازامات پەن 46 جاستاعى ە. ەسىمدى ايەل. تاراپتار 2 ميلليون تەڭگەگە كەلىسكەن. مامىلە وتكەن دەمالىستا جاسالدى. الايدا, كريمينالدىق پوليتسيا مەن ۇيىمداسقان قىلمىسپەن كۇرەس باسقارمالارى قىزمەتكەرلەرىنىڭ قالانىڭ ءار جەرىندە ءبىر ۋاقىتتا جۇرگىزگەن ارنايى ءىس-شاراسى كۇدىكتىلەردىڭ جوسپارىن بۇزدى. العاشقى بولىپ قىزدىڭ بيولوگيالىق اتا-اناسى ۇستالدى. ودان كەيىن نارەستەنى ساتىپ الماق بولعان ادامدار جانە دەلدال ەرلى-زايىپتىلار ۇستالدى. كەلەسى قادام اقشالاي سىياقى ءۇشىن بالانىڭ قۇجاتتارىن راسىمدەۋ مىندەتىن ءوز موينىنا العان 56 جاستاعى ا. ەسىمدى ازاماتشانى ۇستاۋ بولدى», دەدى ول.
سونداي-اق پوليتسيادا نارەستە مەن مامىلەنىڭ قالعان سوماسىن ءبىر-بىرىنە بەرۋ كەزىندە ساتىپ الۋشىلار مەن دەلدالداردىڭ ءبىر ۋاقىتتا ۇستالعانىن حابارلادى.
«وتە ماڭىزدى جايت - كەزدەسۋ كەزىندە دەلدالداردىڭ قولىندا تاعى ەكى ءسابي بولعان. بولجام بويىنشا 3 جانە جانە 7 ايلىق بالالار. ەر ادام بۇلار وزدەرىنىڭ بالالارى ەكەنىن ايتا باستادى. الايدا, ولار بالالاردىڭ جەكە باسىن كۋالاندىراتىن قۇجاتتى كورسەتە المادى. وسىلايشا, وسى ارنايى ءىس-شارانىڭ ناتيجەسىندە كۇدىكتىلەردەن ءۇش ءسابي الىندى. ولار مەديتسينالىق مەكەمەگە تەكسەرىلۋ جانە قاجەت بولعان جاعدايدا كومەك كورسەتۋ ءۇشىن جەتكىزىلدى. كۇدىكتىلەر بۇل بالالاردى ء«تىرى» تاۋار رەتىندە پايدالانۋى مۇمكىن ەكەنىن جوققا شىعارمايمىز. تەرگەۋ مىندەتتى تۇردە شىندىقتى انىقتايتىن بولادى», دەدى ديدار احانوۆ.
الماتى قالالىق پوليتسيا دەپارتامەنتىنىڭ تەرگەۋ باسقارماسىنىڭ مالىمەتىنشە, اتالعان دەرەك بويىنشا قر قك-ءنىڭ 135-بابى 2-بولىگىندە كوزدەلگەن قىلمىسقا سايكەس, سوتقا دەيىنگى تەرگەۋ باستالدى.
كۇدىكتىلەر ۋاقىتشا ۇستاۋ يزولياتورىنا قامالدى.
