قازاقستان تەننيس فەدەراتسياسى ايتۋلى دوداعا قاتىسۋشىلاردى تانىستىرۋدى الەمنىڭ 1-راكەتكاسى, رەسەيلىك دانيل مەدۆەدەۆتەن باستادى.
دانيل 1996 جىلى 11 اقپاندا ماسكەۋدە دۇنيەگە كەلگەن. قازىرگى كەزدە مونتە-كارلودا (موناكو) تۇرادى.
تەننيسپەن التى جاسىنان اينالىسقان د. مەدۆەدەۆ كاسىپقوي سپورتتاعى جولىن 2014 جىلى باستادى. سول جىلى بىرنەشە رەت ITF دودالارىندا جەڭىسكە جەتتى. ATP جارىستارىندا 2015 جىلدان ونەر كورسەتىپ كەلەدى. ورىس, اعىلشىن جانە فرانتسۋز تىلدەرىندە سويلەيدى. كوگالداعى توسەنىشتە ويناعاندى جانە دوپ قابىلداعاندى جاقسى كورەدى. ميۋنحەندىك «باۆاريا» كلۋبىنىڭ جانكۇيەرى. فۋتبولشىلاردان روبەرت لەۆاندوۆسكي مەن داۆيد الابانى ءپىر تۇتادى.
دانيل 2010 جىلى 18 جاسقا دەيىنگىلەر اراسىندا وسكەمەن قالاسىندا وتكەن ITF Junior G3 جارىسىنا قاتىستى. ال, 2016 جىلى الەمنىڭ 171-راكەتكاسى رەتىندە نۇر-سۇلتاندا قر پرەزيدەنتى كۋبوگىندە ATP Challenger ءتۋرنيرىنىڭ شيرەك فينالىنا دەيىن جەتتى.
تابىستارى: 2021 جىلعى اقش اشىق چەمپيوناتىنىڭ جەڭىمپازى, ءۇش «ۇلكەن دۋلىعا» ءتۋرنيرىنىڭ (اقش اشىق چەمپيوناتى – 2019, اۋستراليا اشىق چەمپيوناتى – 2021 جانە 2022) ءفيناليسى, 2020 جىلعى ATP قورىتىندى دوداسىنىڭ چەمپيونى, 14 ATP جارىسىنىڭ جەڭىمپازى, رەسەي قۇراماسى ساپىندا دەۆيس كۋبوگى مەن 2021 جىلى ATP كۋبوگىن جەڭىپ الدى. رەسەي تاريحىندا جەكەلەي سىندا «ۇلكەن دۋلىعادا» ۇزدىك شىققان ءۇش تەننيسشىنىڭ ءبىرى.
