الەم • 15 تامىز، 2022

ۋمراعا بارۋ جولى جەڭىلدەدى

423 رەت كورسەتىلدى

ساۋد ارابياسى ۇكىمەتى تۋريزم ماق­ساتىمەن ەلگە كەلگەندەردىڭ ەندى ارنايى رۇقساتسىز كىشى قاجىلىقتى وتەي الاتىنىن حابارلادى.

بۇل تۋرالى ساۋد ارابياسىنىڭ قاجىلىق جانە ۋمرا مينيسترلىگى ارنايى جازباشا مالىم­دەمە جاسادى. مالىمدەمەدە بۇل شەشىمنىڭ «ساۋد ارابياسىنىڭ 2030 جىلعا دەيىنگى ماق­سات­تارىنا سايكەس، بيىلعى كىشى قاجىلىق ماۋسىمىنىڭ باستالۋىمەن ۋمرا عيباداتتارىن ورىنداۋعا كەلگەندەردىڭ راسىمدەرىن جەڭىلدەتۋ اياسىندا قابىلدانعانىن» العا تارتتى.

سونداي-اق مالىمدەمەدە بۇل شەشىمنىڭ بارلىق قىزمەتتەردى جوعارى ساپادا كورسەتۋ جانە ۋمراعا كەلۋشىلەردىڭ مادەني، ءدىني تاجىريبەسىن بايىتۋعا باعىتتالعان ارەكەتتىڭ ءبىر بولىگى ەكەنى ايتىلدى.

ساۋد ارابياسىنىڭ كەز كەلگەن اۋەجايىنان ۆيزا الا الاتىن ەلدەردىڭ ازاماتتارى، سونداي-اق تولقۇجاتتارىندا ساۋد ارابياسىنا كىرۋ ءمورى بار اقش، ۇلىبريتانيا جانە شەنگەن ۆيزالارىنىڭ يەلەرى ءبىر رەت ۋمرا عيباداتتارىن ەش قيىندىقسىز ورىنداي الاتىنى ايتىلدى. ەستەرىڭىزگە سالا كەتەيىك، بۇعان دەيىن كوپتەگەن ەلدەر ۋمرا ءۇشىن ارنايى ۆيزا الۋ كەرەك ەدى.

سونىمەن قاتار مالىمدەمەدە وتباسىلىق ۆيزا جانە جەكە ۆيزا العان ازاماتتار ساۋد ارابياسىنداعى تۋىستارى مەن دوستارىنا بارعان كەزدە «ۋمرا» قوسىمشاسى ارقىلى تىر­كەلىپ جانە بىرىڭعاي ۇلتتىق ۆيزا پلاتفورماسىنا ءوتىنىش بەرىپ ۋمرا جاساي الاتىنى تۋرالى اقپارات بار.

ال قازاقستان ازاماتتارىنا بۇل جەڭىلدىك ەكى ەلدىڭ ءوزارا كەلىسىمى نەگىزىندە 2019 جىلى ەنگىزىلگەن. 2019 جىلدان باستاپ قازاقستان ازاماتتارىنان كىشى قاجىلىق ءۇشىن ساۋد ارا­بياسىنا ارنايى ۆيزا تالاپ ەتىلمەيدى. ونىڭ ورنىنا قازاقستاندىقتار ساۋد ارابيا­سىنا تۋريستىك ەلەكتروندى ۆيزا الۋعا ءوتىنىش بەرۋ ارقىلى، كىشى قاجىلىق پارىزىن وتەي الادى.

ۋمرا ساپارىنا تۋريستىك ەلەكتروندى ۆيزا الۋ ءۇشىن قازاقستان ازاماتتارىنا قاجەت بولاتىن جالعىز قۇجات – شەتەلدىك تولقۇجات. ءسىزدىڭ شەتەلدىك تولقۇجاتىڭىزدا يزرايل نەمەسە يران ۆيزاسىنىڭ بولۋى دا ساۋد ارابياسىنا ۆيزا الۋعا كەدەرگى بولمايدى. ۋمرا جاساۋعا ۆيزا الۋ ءۇشىن جالعىز شارت – شەتەلدىك تولقۇ­جات­­تىڭ جارامدىلىق مەرزىمىنىڭ ساۋد ارابيا­سىنا كىرۋ كۇنىنەن باستاپ كەمىندە 6 اي بولۋى كەرەك.

قازاقستاندىقتار ءۇشىن ساۋد ارابياسىنىڭ تۋريستىك ەلەكتروندى ۆيزاسى وتە ىڭعايلى ۆيزا. مۇنداي ۆيزامەن قازاقستان ازاماتتارى ساۋد ارابياسىنا ۋمرا عيباداتى ءۇشىن نەمەسە ءبىرشاما ۋاقىتقا ارنايى تۋريستىك دەمالىسقا بارا الادى. دەگەنمەن كەيبىر ەلدەردە ۋمرا 10 كۇنگە سوزىلۋىنا سايكەس ەلەكتروندى ۆيزالار بىرنەشە كۇندىك مەرزىمگە عانا بەرىلەدى. ال ۋمرا ءۇشىن ساۋد ارابياسىنا تۋريستىك ەلەكتروندى ۆيزا العان قازاقستاندىقتارعا بۇل ۆيزا بويىنشا ساۋد ارابياسىندا 90 كۇن قالۋعا رۇقسات ەتىلگەن.

سوڭعى جاڭالىقتار

ءوڭىر جانە وركەنيەت

ساياسات • كەشە

اعا بۋىننىڭ قولداۋى

ساياسات • كەشە

ەسىمنەن كەتپەس ەساعاڭ

رۋحانيات • كەشە

بار ءۇمىت – بۋبليكتە

تەننيس • كەشە

وقىرماننىڭ رۋحاني ولجاسى

ەگەمەن قازاقستان • كەشە

ۇقساس جاڭالىقتار