اباي • 11 تامىز، 2022

ۇلى شايىر ۇلىقتالعان كۇن

66 رەت كورسەتىلدى

تامىزدىڭ 10 جۇلدىزى – قازاقتىڭ باس اقىنى اباي قۇنانباي ۇلىنىڭ تۋعان كۇنى. وسىعان بايلانىستى سەمەيدە جوسپارلانعان مەرەكەلىك ءىس-شارالار ۇلى شايىردىڭ ەسكەرتكىشىنە گۇل شوقتارىن قويىپ، ونىڭ رۋحىنا تاعزىم ەتۋدەن باستالدى.

بيىل اتاۋلى كۇندى وتكىزۋدىڭ ماڭىزى زور. سەبەبى مەملەكەت باسشىسى قاسىم-جومارت توقاەۆتىڭ باستاماسىمەن اقىننىڭ تۋعان ولكەسى ءوز الدىنا وبلىس بولىپ، ونىڭ اتى جاڭا اكىمشىلىك وڭىرگە بەرىلىپ وتىر. اباي وبلىسىنىڭ اكىمى نۇرلان ۇرانحاەۆتىڭ ايتۋىنشا، زاڭعار تۇلعانىڭ ەسىمى ۇلت جادىندا ماڭگىگە ساقتالىپ، ونىڭ مادەني مۇراسى ەلىمىزدىڭ رۋحاني كەمەلدەنۋىنە ءالى تالاي سەپتەسەدى.

«ادامزاتتى باۋىرىنا بالاپ، دارىندى تۇلعالارعا اسقاق رۋح سىيلاعان ۇلى بابا­مىزدىڭ ەڭسەلى ەسكەرتكىشىنىڭ الدىندا باسىمدى ءيىپ، تاعزىم ەتەمىن! حاكىم اباي – قايتالانباس دارا تۇلعا. ۇلت ماقتانىشى، اقىل-وي كەنىشى، الەمدىك دەڭگەيدەگى ۇلى كەمەڭگەر. اقىننىڭ عيبراتتى عۇمىرى مەن مول مۇراسى حالقىمىز بەن جاھان جۇرتىنىڭ رۋحاني اسىل قازىناسى بولىپ قالا بەرەدى. «اباي كۇنىن» اباي ەلى مەملەكەت باسشىسى قاسىم-جومارت كەمەل ۇلى توقاەۆتىڭ شەشىمىنە سايكەس جاڭادان قۇرىلعان وبلىس دارەجەسىندە العاش رەت اتاپ ءوتىپ وتىر. قالىڭ ەل، قايران جۇرتتى اداستىرماي كەلە جاتقان ۇلى ابايعا حالقىمىزدىڭ كوڭىلى ەشقاشان اينىمايتىنى كۇمانسىز»، دەدى ن.ۇرانحاەۆ.

بۇدان كەيىن اقىننىڭ تۋعان كۇنىن اتاپ وتۋگە الىس-جاقىن ەلدەردەن ارنايى كەلگەن مەيماندار اباي مۇراجايى مەن نەۆزوروۆتار وتباسى مۇراجايىن ارالاپ، مەرەكەلىك ەكسپوزيتسيانى تاماشالاۋعا مۇمكىندىك الدى. مۇندا مۇحتار اۋەزوۆتىڭ «اباي جولى» رومانىنا ارنالىپ اشىلعان « ۇلى تۇلعالار ۇندەستىگى» كورمەسى كەلۋشىلەردىڭ نازارىنا ۇسىنىلعان. سونداي-اق سەمەيدىڭ ەسكى عيماراتتارىنىڭ كورمەسى دە ۇيىمداستىرىلىپتى.

حاكىمنىڭ تۋعان كۇنىنە وراي ۇلىلار ولكەسىندە روزا باعلانوۆانىڭ اتىنداعى «قازاقكونتسەرت» ۇيىمىنىڭ گاسترولدىك ساپارى دا باستالعانىن ايتا كەتكەن ورىندى.

«10 تامىز – بارلىق قازاقستاندىق ءۇشىن ۇلكەن مەرەكە، ابايدىڭ تۋعان كۇنى. ول شىن مانىندە ۇلى، دۇنيەجۇزىلىك اقىن، ويشىل جانە فيلوسوف. ءبىزدىڭ رەسپۋبليكالىق ۇيىم ۇلكەن گاسترولدىك تۋردى اباي وبلىسىنان، سەمەي قالاسىنان باستاپ وتىرعانىنا قۋانىشتى. ەلىمىزدىڭ پرەزيدەنتى قاسىم-جومارت توقاەۆتىڭ باستاماسىمەن ءۇش جاڭا وبلىس اشىلدى. سول سەبەپتى مادەني قۇندىلىقتارىمىزدى ءوڭىر حالقىنا ناسيحاتتاۋ ءۇشىن جاڭا ءۇش وبلىسقا ۇلكەن قۋانىشپەن ساياحات جاسايمىز»، دەدى روزا باعلانوۆا اتىنداعى «قازاقكونتسەرت» رەسپۋبليكالىق ۇيىمىنىڭ ديرەكتورى اقتوتى رايىمقۇلوۆا.

ۇيىم باسشىسى سەمەيلىكتەردىڭ الدىندا ەلىمىزدىڭ جەتەكشى انشىلەرى مەن ورىنداۋشىلارى ءوز ونەرلەرىن ورتاعا سالاتىنىن جەتكىزدى.

اتاۋلى كۇنگە وراي سەمەيدە بيزنەس فورۋم ۇيىمداستىرىلىپ، وندا ەلىمىز بەن الىس-جاقىن مەملەكەتتەردە تابىستى جۇمىس ىستەپ جۇرگەن ءوڭىردىڭ ىسكەر ازاماتتارى جاڭا وبلىستى كوركەيتۋگە بايلانىستى ۇسىنىستارىن جەتكىزدى.

«بيىل اقسۋات اۋدانىندا مۇراجاي قۇرىلىسى اياقتالادى. سەمەي قالاسىنىڭ پري­رەچنوە اۋىلىنداعى مادەنيەت ۇيىنە قايتا جوندەۋ جۇمىستارى جۇرگىزىلىپ جاتىر. تاياۋ جىلدارى وبلىس بويىنشا 3،8 ملرد تەڭگەگە 12 اۋىلدىق كلۋب سالىپ، جاڭارتۋ جوسپارلانعان. ۇكىمەت 2024 جىلعا قاراي سەمەيدەگى مۋزىكالىق-تەاتر كەشەنىنىڭ قۇرىلىسىن قارجىلاندىرۋدى قولدادى. مۇحتار اۋەزوۆتىڭ 125 جىلدىعىنا وراي ءتۇرلى مادەني-بۇقارالىق ءىس-شارالار وتكىزۋ كوزدەلىپ وتىر»، دەدى ءوڭىر باسشىسى.

سونداي-اق ن.ۇرانحاەۆ قالاداعى تاريحي عيماراتتاردىڭ (تەلەگراف، مۋسين ديىرمەنى، كوپەس ۇيلەرى، ءدىني عيماراتتار) ساۋلەتتىك كەلبەتىن ساقتاۋ ماقساتىندا تاريحي جانە مادەني ەسكەرتكىشتەردى تالداۋ بويىنشا جۇمىستار جۇرگىزىلىپ جاتقانىن ايتتى.

 

اباي وبلىسى

سوڭعى جاڭالىقتار

ۇقساس جاڭالىقتار