جاساندى ينتەللەكت ءداۋىرى

جاساندى ينتەللەكت شەشىمدەرىنىڭ الەم­دىك نارىعى, سونىڭ ىشىندە باعدار­لا­مالىق جاساقتامانى, اپپاراتتىق قۇرال­دار­دى جانە قىزمەتتەردى قوسا العاندا, 2022 جىلدان 2026 جىلعا دەيىن جىلىنا ورتا ەسەپپەن 18,6 پايىزعا ءوسىم كور­سەت­پەك دەپ بولجايدى International Data Corpo­ration (IDC) زەرتتەۋ ۇيىمى. 2026 جىل­عا قاراي بۇل نارىقتىڭ اينالىمى
900 ملرد دوللارعا جەتپەك.

«COVID-19 پاندەمياسى قازىرگى جۇيە­لەرىمىزدىڭ ءبىز ويلاعانداي ءتوزىمدى ەمەس ەكەنىن كورسەتتى. تسيفرلى ترانسفورماتسيا ايرىقشا قاجەتتىلىككە اينالدى. قازىر تاسىمالداۋدا پروبلەمالار تۋىنداپ, بىلىك­تى مامان تاپشىلىعىنىڭ تۋىنداپ جات­قانىن بايقاپ وتىرمىز. سونداي-اق ناقتى دەرەكتەردى الۋ بويىنشا دا تۇيتكىل كوپ. ال جاساندى ينتەللەكت تەحنولوگيا­لارى ناقتى ومىردەگى كوپ پروبلەمانى شە­شىپ بەرە الاتىنىن دالەلدەدى», دەيدى كور­پو­راتسيانىڭ نارىق بويىنشا اناليتيگى مارتين نۋسكا.

ساراپشىلاردىڭ بولجاۋىنشا, جاقىن كەلەشەكتە جاساندى اقىل-وي تەحنولوگيالارى بولجاپ بىلە الماس وقيعالاردا كومەككە كەلۋى مۇمكىن: ماسەلەن, تابيعي اپات, سوعىس جاعدايلارىن الدىن الا زەردەلەۋ, مەديتسينا جۇيەسىنە تەرەڭ ءارى جەدەل تالداۋ جاساۋ, سون­داي-اق ەلەكتروندى كوممەرتسيا جانە قاۋىپ­سىزدىك سالاسى ءۇشىن تانۋ جۇيەسىن دامىتۋ بويىنشا. كورپوراتسيا دەرەگىنشە, ەۋروپا, تاياۋ شىعىس جانە افريكاداعى جاساندى ينتەللەكت شەشىمدەرى نارىعىنىڭ جيىنتىق كولەمى 2023 جىلى 100 ملرد دول­لارعا, ال 2026 جىلى 200 ملرد دوللارعا جەتەدى.

قازاقستان دا جاساندى ينتەللەكتى دا­مىتۋعا بەي-جاي قارامايدى. «جاساندى ينتەل­لەكت سالاسىنداعى زەرتتەۋلەر مەن ازىر­لەمەلەردى قولداۋ قورىنىڭ» دەرەگىنشە, قازىر وتاندىق عىلىمي زەرتحانالاردا جاساندى ينتەللەكت سالاسىنداعى زەرتتەۋلەر جۇرگىزىلىپ جاتىر. وعان بىرقاتار جوعارى وقۋ ورنىنىڭ عىلىمي-زەرتتەۋ ورتالىقتارى دا قوسىلعان. ونىڭ ادەپكى ناتيجەلەرى دە كورىنىس بەرە باستادى.

مىسالى, الماتى لابوراتورياسىندا Cerebra جوباسى دايىندالدى. قازىر ول الەمنىڭ ۇزدىك MedTech-جوبالارىنىڭ قاتارىنا كىرەدى. جاساندى ينتەللەكتى پاي­دالانا وتىرىپ جاسالعان جوبا بويىن­شا دارىگەرلەر ناۋقاستىڭ بويىنان ينسۋلت بەلگىلەرىن باستاپقى كەزەڭدە-اق ايقىنداي الادى. ونى دەنساۋلىق ساقتاۋ جۇيەسىندە قولدانۋدىڭ تاعى ءبىر مىسالى – راديولوگيالىق كەسكىندەردىڭ ورتا­لىقتاندىرىلعان مەديتسينالىق ارحيۆىندە PACS جاساندى ينتەللەكتى تاۋلىگىنە 300-گە جۋىق رەنتگەندىك سۋرەتتەردى قاراپ, 84 پايىز دالدىكپەن وكپە اۋرۋلارىنىڭ ءجيى كەزدەسەتىن 14 بەلگىسىن انىقتاپ بەرەدى. ناتيجەلەردى وڭدەۋ جانە ساقتاۋ دارىگەردىڭ قاتىسۋىنسىز اۆتوماتتى تۇردە جۇرەدى.

جاساندى ينتەللەكتكە ۇركە قاراۋشىلار قاتارى دا باسىم. ارينە, تۇسىنۋگە بولادى. ادام قابىلەتىن, ادام مۇمكىندىگىن تولى­عىمەن الماستىرۋ مۇمكىن ەمەس, تۇپتەپ كەلگەندە قاجەت ەمەس تە شىعار. روبوتتاردىڭ الەمدى باسقارۋى سەكىلدى تۇجىرىمداردىڭ بىرتىندەپ ۋتوپيادان شىندىققا اينالا باستاۋى ازداپ كوڭىلگە كىربىڭ دە ۇيالاتادى. بىراق زاماناۋي ءۇردىس ءوز دەگەنىن جاساماي قويمايدى. سولاي ەكەن, دەمەك ونىڭ جاق­سى, قاجەتتى قىرىن مەڭگەرىپ, جاساندى ينتەللەكت مامانعا كومەكشى بولارلىق­تاي نۇسقالارىن قاراستىرۋ ءجون بولاتىن سياقتى.

پرەزيدەنت قاسىم-جومارت توقاەۆ وسى­عان دەيىن قازاقستاننىڭ تەحنولوگيالىق سەرىكتەستىك تۇرعىسىنان برەندكە اينالۋى قاجەت ەكەنىن ايتتى. بۇل استە تەگىن ءسوز ەمەس. بىزدە تسيفرلى ترانسفورماتسيانى جۇزەگە اسىرۋ ءۇشىن قولايلى العىشارتتار بار. بىلىكتى, قولىنان ءىس كەلەتىن جاس تا كوپ. جاساندى ينتەللەكت بىزدە ادام قاۋىپ­سىزدىگىن قامتاماسىز ەتۋ تۇرعىسىنان, ەكونوميكا ونىمدىلىگىن ارتتىرۋ تۇرعىسىنان كومەكتەسەر بولسا, وندا ونى ەنگىزۋ جولىندا ايانىپ قالۋعا بولماس.