قوعام • 09 تامىز، 2022

جاسوسپىرىمدەردىڭ ەكولوگيالىق مادەنيەتىن قالىپتاستىراتىن وقۋلىق ازىرلەندى

63 رەت كورسەتىلدى

قازاقستاندا وسكەلەڭ ۇرپاقتىڭ ەكولوگيالىق مادەنيەتىن قالىپتاستىرۋ ماقساتىندا مۇعالىمدەرگە ارنالعان ەكولوگيالىق وقۋ قۇرالى شىعارىلدى، دەپ حابارلايدى Egemen.kz ازاماتتىق باستامالاردى قولداۋ ورتالىعىنىڭ ءباسپاسوز قىزمەتىنە سىلتەمە جاساپ.

قازاقستاننىڭ ەكولوگيالىق قورى «جاستار اراسىندا ەكولوگيالىق مادەنيەتتى نىعايتۋ جونىندەگى شارالار كەشەنىن ازىرلەۋ جانە ىسكە اسىرۋ» جوباسىن ىسكە اسىرۋ شەڭبەرىندە «جاسوسپىرىمدەر اراسىندا ەكولوگيالىق مادەنيەتتى قالىپتاستىرۋ» اتتى ادىستەمەلىك قۇرالىن ازىرلەدى.

«باسىلىمدا ەكولوگيالىق مادەنيەتتى قالىپتاستىرۋ بويىنشا ساباقتان تىس ءىس-شارالار باعدارلاماسىن جۇزەگە اسىرۋعا مۇمكىندىك بەرەتىن ماتەريالدار بار. وقۋ قۇرالىنىڭ ماتەريالدارىنا وتاندىق جانە شەتەلدىك عالىمدار مەن پراكتيك-پەداگوگتەردىڭ تانىمال ادىستەمەلەرى دە ەنگىزىلگەن»، دەدى «قازاقستاننىڭ ەكولوگيالىق قورى» قق باسشىسى ايگۇل ابدۋاليەۆا.

وقۋلىقتىڭ اۆتورى – ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى جانات بازاربەكوۆا.

جوبا ۇيىمداستىرۋشىلارىنىڭ ايتۋىنشا، وقۋ قۇرالى جالپى ءبىلىم بەرۋ مەكەمەلەرىنىڭ پەداگوگتەرىنە، سونداي-اق حالىقتىڭ ەكولوگيالىق ساۋاتتىلىعىن ارتتىرۋعا مۇددەلى بارلىق تۇلعالارعا پايداسىن تيگىزەدى.

«جاستار اراسىندا ەكولوگيالىق مادەنيەتتى نىعايتۋ جونىندەگى شارالار كەشەنىن ازىرلەۋ جانە ىسكە اسىرۋ» جوباسى قر اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ قولداۋىمەن جۇزەگە اسىرىلۋدا.

سوڭعى جاڭالىقتار

ۇقساس جاڭالىقتار