سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, پەتروپاۆلدىڭ 20 جاستاعى تۇرعىنى مامىر ايىندا ۇستالعان. ونى ءتىنتۋ كەزىندە وسىمدىك تەكتەس زات سالىنعان 8 پوليمەر تۇيىنشەك تابىلعان. تاعى 52 تۇيىنشەك پەن سۇيىقتىق قۇيىلعان ەكى ىدىس حالتۋرين كوشەسى بويىنداعى تۇرعىلىقتى مەكەنجايىنان تابىلدى. ساراپتاما تۇيىنشەكتەردەگى زاتتىڭ سينتەتيكالىق ەسىرتكى «سپايس» ەكەنىن كورسەتتى. ال قالعانى - ونى دايىنداۋعا ارنالعان پرەكۋرسورلار بولعان.
تاركىلەنگەن ەسىرتكىنىڭ سانى 200 رەتتىك دوزاعا جۋىق, ەسىرتكى زاتىنىڭ جالپى سالماعى شامامەن 8 گرامم, ول اسا ءىرى مولشەرگە جاتادى. جىگىتتىڭ ۇيىنەن رەسپيراتورلار, گرامدىق تارازىلار, ولشەۋىش كولبالار مەن سينتەتيكالىق ەسىرتكىنى دايىنداۋعا ارنالعان باسقا دا قۇرىلعىلار تاركىلەندى. كۇدىكتىنىڭ ايتۋىنشا, ەسىرتكىنى ول جەكە پايدالانۋ ءۇشىن ساقتاعان.
قازىر سينتەتيكالىق ەسىرتكىنى ءوندىرۋ جانە وتكىزۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر.
«كۇدىكتى قاماۋعا الىندى. قر قىلمىستىق كودەكسىنىڭ «ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ» 297-بابى 3-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. باپتىڭ سانكتسياسى 15 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى كوزدەيدى», دەيدى سقو پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى پوليتسيا پولكوۆنيگى جاندوس باسىباەۆ.
