«قازىر ەلىمىزدىڭ اي سايىن 500 مىڭ دوزاعا دەيىن QazVac ۆاكتسيناسىن شىعارۋ مۇمكىندىگى بار. بۇل ىشكى سۇرانىستى تولىق وتەي الادى. الداعى تامىز-قىركۇيەك ايلارىنا قاراي QazVac-تىڭ قوسىمشا 500 مىڭ دوزاسى قاجەت. تاپسىرىس بەرىلدى. سونىمەن قاتار Pfizer ۆاكتسيناسىن ساتىپ الۋ بويىنشا كەلىسىم ءجۇرىپ جاتىر», دەدى ايجان ەسماعامبەتوۆا ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ۆيتسە-مينيستر Pfizer ۆاكتسيناسىنىڭ تەك جاسوسپىرىمدەرگە, جۇكتى جانە ءسابي ەمىزەتىن ايەلدەرگە عانا ەگىلەتىنىن ەسكە سالدى.
«باسقا ساناتتاعى ازاماتتارعا كوروناۆيرۋسقا قارسى Sinopharm جانە QazVac ۆاكتسيناسى ۇسىنىلادى. ال, الداعى ۋاقىتتا ەلدە تەك QazVac ۆاكتسيناسى بولۋى مۇمكىن. سەبەبى ءوندىرىس كولەمى ىشكى سۇرانىستى تولىق قامتي الادى», دەدى ول.
ايجان ەسماعامبەتوۆا شەتەلدىك ۆاكتسينالاردى اقىلى تۇردە سالدىرۋعا قاتىستى ءوز پىكىرىن ءبىلدىردى.
«قازاقستاندىقتاردا شەتەلدىك ۆاكتسينانى سالدىرتۋ مۇمكىندىگى بار بولعانىن ءبىز دە قالايمىز. بىراق ول ءبىزدىڭ عانا قولىمىزدا ەمەس. جەكە ءوز باسىم Moderna جانە Pfizer ۆاكتسيناسىنىڭ وندىرۋشىلەرىمەن كەلىسسوز جۇرگىزدىم. وكىنىشكە قاراي, بارلىق جەتكىزۋشىلەر ۆاكتسينانىڭ اقىلى بولۋىنا قارسى, ياعني كەز كەلگەن شەتەلدىك ۆاكتسينا تەك مەملەكەتتىك كەلىسىمنىڭ نەگىزىندە جەتكىزىلۋى ءتيىس», دەدى سپيكەر.
