تىكۇشاقپەن باقىلاۋعا «قازسەلدەنقورعاۋ» مم, قالالىق تجد جانە باسقا دا مەكەمەلەردىڭ باسشىلارى مەن ماماندارى قاتىستى. ولار مورەنالىق كولدەردىڭ, سونداي-اق اقساي, قارعالى, كىشى جانە ۇلكەن الماتى وزەندەرى باسسەيندەرىنىڭ جاعدايىن كوردى. الماتىنىڭ ماڭايىندا بارلىعى 50-دەن استام مورەنالىق جانە مۇزدىق كول بار, ولاردىڭ 12-ءسى قاۋىپتى بولسا, 7-ەۋىندە بيىل سەل قاۋپىن تومەندەتۋ بويىنشا الدىن الۋ جۇمىستارى جۇرگىزىلۋدە.
«قازسەلدەنقورعاۋ» ماماندارىنىڭ مالىمەتىنە سايكەس, الماتى تاۋلارىنداعى مۇزدىق كولدەردىڭ بۇزىلۋ قاۋپى بار. تەمپەراتۋرانىڭ جوعارىلاۋىنا بايلانىستى مۇزدىقتاردىڭ ەرۋى بايقالادى, قىسقى قاردان شامامەن 40-80% ارىلعان. مورەنالىق كولدەردىڭ كوپشىلىگى سۋعا تولتىرىلعانىمەن, قاۋىپسىز دەڭگەيدە, جەر بەتىندەگى اعىندار قالىپتى شەكتە.
بىلتىر جەرگىلىكتى بيۋدجەت ەسەبىنەن 31 ستانتسيادان تۇراتىن كىشى, ۇلكەن الماتى, قارعالى جانە اقساي وزەندەرىنىڭ باسسەيندەرىنە سەل قاۋپىنىڭ اۆتوماتتاندىرىلعان مونيتورينگ جۇيەسى ەنگىزىلدى. جۇيە سۋ دەڭگەيىن, اۋا مەن سۋدىڭ تەمپەراتۋراسىن, توپىراقتىڭ ىلعالدىلىعىن, جاۋىن-شاشىننىڭ قارقىندىلىعىن, سەل ءتۇسۋ قاۋپىن قوسا العاندا, تاۋ وزەندەرىنىڭ جاي-كۇيىنىڭ 10-عا دەيىنگى پارامەترلەرىنە اۆتوماتتى تۇردە مونيتورينگ جاسايدى.
