جاقىندا اقتوعاي اۋدانىندا ەكىنشى شاعىن يندۋستريالىق ايماق ءوز جۇمىسىن باستادى. بىلتىر اۋەلبەك اۋىلىندا تۇرعىنداردىڭ جەكە ءىسىن دوڭگەلەتۋىنە مۇمكىندىك بەرىلگەن ەدى. قوجامجار اۋىلىندا دا وسى ىسپەتتى ورتالىق اشىلىپ, كاسىپ باستاۋعا نيەتتى ازاماتتارعا قولايلى جاعداي جاسالدى.
قوجامجار اۋىلىنىڭ تۇرعىنى شىنار تۇسىپبەكوۆانىڭ ماماندىعى – تىگىنشى. بۇعان دەيىن تۇرعىنداردان تاپسىرىستاردى قابىلداپ, تۇرمىستىق قاجەتتىلىكتەردى تىگەتىن ارنايى ورىن بولماعاندىقتان, بۇل ىسپەن ۇيىندە اينالىسقان. اۋىلداستارى مەن جاقىن ەلدى مەكەندەردەگى تۇرعىندارعا كورپە, جاستىق, قورجىن تىگىپ, كۇندەلىكتى ناپاقاسىن تاۋىپ وتىرىپتى. ايتسە دە, ۇيدە تىگىن تىگۋ ىڭعايسىزدىق تۋدىراتىنى بەلگىلى. ەندىگى جەردە ول اۋىلدىق اكىمدىك عيماراتىنىڭ سول قاناتىندا اشىلعان شاعىن يندۋستريالىق ايماقتا جۇمىسىن جالعاستىراتىن بولدى.
– تۇرعىندار تاراپىنان تىگىنشىلەردىڭ ونىمىنە سۇرانىس جوعارى. اسىرەسە جازعى ۋاقىتتا سىرعا سالۋ, قۇدالىق, مەرەيتوي سىندى تويلارعا قاجەت دۇنيەلەرگە تاپسىرىس ءجيى ءتۇسىپ جاتادى. ودان بولەك, كويلەك, جەيدە تىگۋ سياقتى جەكە تاپسىرىستار بولادى. بۇعان دەيىن ونىڭ بارلىعىن ۇيدەگى قاۋىرت تىرلىكتىڭ ورتاسىندا وتىرىپ دايىنداۋ ءسال قولايسىزدىق تۋدىرسا, ەندى جارىق ءارى كەڭ بولمەدە جۇمىس ىستەۋگە جاعداي قاراستىرىلدى. اۋىلىمىز وركەندەپ, شاعىن دا بولسىن جەكە ءىسىن دوڭگەلەتىپ وتىرعان تۇرعىندارعا وسىنداي مۇمكىندىكتىڭ بەرىلىپ وتىرعانىنا قۋانىشتىمىز, – دەيدى ول.
قوجامجارداعى شاعىن يندۋستريالىق ايماقتا تىگىن سالونىمەن قاتار, فوتو-ۆيدەو ستۋدياسى, شاشتاراز بەن سۇلۋلىق سالونى بار. بۇل عيماراتتى جوندەۋگە اۋداندىق بيۋدجەتتەن شامامەن 4 ملن تەڭگە جۇمسالعان. جەرگىلىكتى بيلىكتىڭ قارجىلاي قولداۋى ناتيجەسىندە قازىرگى تاڭدا ءتورت تۇرعىن اۋىلداستارىنا جايلى جەردە ساپالى قىزمەت كورسەتە الادى. الداعى ۋاقىتتا شاعىن يندۋستريالىق ايماقتان ورىن العان كاسىپكەرلەر بيزنەسىن ودان ءارى دامىتۋ ءۇشىن مەملەكەتتىك باعدارلامالارعا قاتىسۋعا نيەتتى.
پاۆلودار وبلىسى
اقتوعاي اۋدانى
