ءوڭىر باسشىسى جەدەل مەديتسينالىق جاردەم اۋرۋحاناسى, سەمەي مەديتسينالىق ۋنيۆەرسيتەتىنىڭ گوسپيتالى جانە جەدەل مەديتسينالىق جاردەم ستانساسىنا بارىپ, قىزمەتىنە قانىقتى.
ايتالىق, 375 ورىنعا شاقتالعان جەدەل مەديتسينالىق جاردەم اۋرۋحاناسى 2013 جىلى «100 مەكتەپ, 100 اۋرۋحانا» باعدارلاماسى بويىنشا سالىنعان. تاۋلىك بويى شۇعىل تۇردە جۇمىس ىستەيتىن اۋرۋحانا تەك سەمەي وڭىرىنە عانا ەمەس, وبلىستىڭ بىرقاتار اۋدانىنىڭ تۇرعىندارىنا دا قىزمەت كورسەتەدى. مۇندا ينسۋلت پەن ءتۇرلى جۇرەك-تامىر اۋرۋلارىن ەمدەۋگە ارنالعان وپەراتسيالىق كومەكتىڭ اۋقىمدى قىزمەتتەرىن كورسەتۋگە قاۋقارلى گيبريدتى وپەراتسيالىق بولمەسى بار. سونىمەن قاتار وسىندا پوليتراۆما ورتالىعى جۇمىس ىستەي باستاعانىن ايتا كەتكەن ورىندى. گيبريدتى وپەراتسيالىق بولمەسىندە جىلىنا 3 مىڭعا دەيىن وپەراتسيا جاسالادى. ونىڭ ىشىندە كورونارلىق جانە ەندوۆاسكۋليارلىق وپەراتسيا, سونداي-اق پوليتراۆمالىق وپەراتسيالار قامتىلعان. اتالعان زاماناۋي بولمە مەديتسينا قىزمەتكەرلەرىنە جەدەل كورونارلىق سيندروم مەن مي قان اينالىمى بۇزىلعان ناۋقاستارعا جەدەل مەديتسينالىق كومەكتىڭ بارلىق سپەكترىن ۇسىنۋعا, سول سەكىلدى «التىن ساعات» قاعيداتىن ساقتاۋعا مۇمكىندىك بەردى. تۇتاستاي العاندا, مۇندا 612 925 ادامعا مەديتسينالىق قىزمەت كورسەتىلىپ ءجۇر. ونىڭ 370 مىڭى سەمەيلىكتەر بولسا, قالعان 250 مىڭداي ادام – ءوڭىر حالقى.
ال جەدەل مەديتسينالىق جاردەم ستانساسى بالالار مەن ەرەسەكتەردىڭ ومىرلەرىنە قاۋىپ تونگەن جاعدايلاردا, دەمەك شۇعىل كومەك قاجەت كەزدە, سول سەكىلدى ءجىتى سوزىلمالى اۋرۋلار مەن ولاردىڭ اسقىنۋلارى كەزىندە وقيعا ورنىندا, سونداي-اق ستاتسيونارعا بارار جولدا, ونىڭ ىشىندە توتەنشە جاعدايلاردا, جاپپاي اپاتتار كەزىندە شۇعىل كومەك كورسەتەدى. اتالعان ستانسا ءبىر تاۋلىكتە ورتا ەسەپپەن 700-دەن اسا شاقىرتۋدى ورىندايدى. ستانسا ۇجىمى توتەنشە جاعدايلاردا, ءتۇرلى وقيعالار مەن پاندەميا سىندى ەپيدەميالىق كەزەڭدە دە تۇراقتى ءموبيلدى دايىندىق رەجىمىندە جەدەل جاردەم كورسەتەدى. مۇندا 50 جەدەل مەديتسينالىق جاردەم بريگاداسى جۇمىس ىستەيدى. اتاپ ايتساق, 1 رەانيماتسيالىق بريگادا, 1 پسيحياتريالىق بريگادا, 3 كارديولوگيالىق بريگادا, 4 پەدياتريالىق بريگادا, 37 فەلدشەرلىك بريگادا جانە 4 قارقىندى تەراپيا بريگاداسى.
سەمەي مەديتسينا ۋنيۆەرسيتەتىنىڭ گوسپيتالىنە كەلسەك, ونىڭ قۇرامىنا ستاتسيونار, اۋىسىمدىق ۋاقىتتا 250 كەلۋشىگە ارنالعان كونسۋلتاتيۆتىك ەمحانا كىرەدى. وندا ورتالىقتىڭ جوعارى بىلىكتى ماماندارى جانە مەديتسينا ۋنيۆەرسيتەتىنىڭ پروفەسسورلىق-وقىتۋشىلار قۇرامى قابىلداۋ جۇرگىزەدى. گوسپيتالدىڭ بولىمشەلەرى زاماناۋي جوعارى ەمدەۋ-دياگنوستيكالىق جابدىقتار جانە اپپاراتتارمەن (گاز, ەلەكتروليت, گەماتولوگيالىق تالداۋىشتار, زاماناۋي رەنتگەنودياگنوستيكالىق, ۋلترادىبىستىق اپپاراتتار, ەندوسكوپتار, ەندوبەينەحيرۋرگيا جابدىعى) جابدىقتالعان.
جۇمىس ساپارىن تۇيىندەگەن وبلىس اكىمى جەدەل مەديتسينالىق جاردەم اۋرۋحاناسىن وڭىردەگى الدىڭعى قاتارلى مەديتسينالىق ۇيىمداردىڭ ءبىرى ەكەنىن ايتتى.
«مەديتسينالىق ۇيىمداردىڭ زاماناۋي قۇرال-جابدىقتارمەن قامتىلعانى كورىنىپ تۇر. سونىمەن بىرگە شەشىلۋگە ءتيىس ماسەلەلەر دە بار. جەدەل جاردەم ستانساسىنا توقتالساق, اباي وبلىسىنىڭ قۇرىلۋىنا بايلانىستى اقسۋات جانە كوكپەكتى اۋداندارى قوسىلعاندىقتان ونىڭ قامتۋ ايماعى ۇلعايدى. سوعان سايكەس قوسىمشا قارجىلاندىرۋ قاجەت بولادى. بۇل ماسەلەلەردى دە جان-جاقتى قاراستىرامىز», دەدى ن.ۇرانحاەۆ.
اباي وبلىسى
