قازاقستاندىق جوعارى وقۋ ورىندارىندا ەكولوگيا جانە قورشاعان ورتا سالاسىنداعى ءبىلىم بەرۋ باعدارلاماسىنىڭ مازمۇنىن جەتىلدىرۋگە ارنالعان جوبادا پەداگوگيكالىق شەبەرلىكتى ارتتىرۋ, ەكولوگيا جانە قورشاعان ورتا سالاسىنداعى ساراپتامالىق ءبىلىمدى دامىتۋ قاراستىرىلىپ وتىر. وعان جەرگىلىكتى وقۋ ورنى ماماندارىمەن قاتار قازاق ۇلتتىق اگرارلىق زەرتتەۋ ۋنيۆەرسيتەتى, ءى.جانسۇگىروۆ اتىنداعى جەتىسۋ ۋنيۆەرسيتەتى, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى, س.سەيفۋللين اتىنداعى قازاق اگروتەحنيكالىق ۋنيۆەرسيتەتى, م.ح.دۋلاتي اتىنداعى تاراز ۋنيۆەرسيتەتى جانە ق.جۇبانوۆ اتىنداعى اقتوبە وڭىرلىك ۋنيۆەرسيتەتى, ا.باراەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ جاس عالىمدارى قاتىستى.
قورشاعان ورتانىڭ احۋالىن ءبىلۋ ءۇشىن جاسالعان جۇمىستار بارىسىندا ءار 25 مەتر سايىن وسىمدىكتىڭ تۇرلەرىنە زەرتتەۋ جاسالىپ, سول اۋماقتاعى كولەمى انىقتالدى. جاس عالىمدارعا اقش-تاعى ىرگەلى وقۋ ورىندارى پروفەسسورلارى, قازاق ۇلتتىق اگرارلىق زەرتتەۋ ۋنيۆەرسيتەتىندەگى تۇراقتى ەگىنشىلىك ورتالىعى ماماندارى وفلاين جانە ونلاين فورماتتا ءدارىس وقىدى.
– بۇل – نەگىزىنەن ايماقتىق ۋنيۆەرسيتەتتەرگە ارنالعان جوبا. قازىرگى ۋاقىتتا ناسا-مەن بىرلەسىپ عىلىمي جوبا دايىنداپ, ارال تەڭىزى تارتىلۋىنىڭ الەمدىك كليماتقا اسەرىن زەرتتەۋ ۇستىندەمىن. سونداي-اق سەمينار بارىسىندا قازاقستاندىق جانە امەريكالىق ءبىلىم بەرۋ باعدارلامالارىن سالىستىرىپ تالداۋ جاسادىق, – دەيدى پروفەسسور دجيحۋان چەن.
امەريكالىق ماماننىڭ ايتۋىنشا, جاس زەرتتەۋشىلەردىڭ ناسا عارىشتىق اگەنتتىگىنىڭ قازاقستانداعى جانە ورتالىق ازياداعى جوبالارىنا قاتىسۋعا مۇمكىندىكتەرى بار.
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وقىتۋشىسى ابىلايحان ءازىمباي – ۆوركشوپ بارىسىندا مازمۇندى اقپاراتپەن, جاڭا قۇرىلعىلارمەن تانىسقان جاس ماماننىڭ ءبىرى. ول ءۇشىن عالامدىق وزگەرىستەر مەن جەردى باقىلاۋ ورتالىعىنىڭ پروفەسسورى فەن پەيلەيدىڭ جەتەكشىلىگىمەن دالالىق جۇمىستار اياسىندا وسىمدىك قۇرامى مەن ساپاسى جايلى جۇرگىزىلگەن زەرتتەۋلەر, جاڭا قۇرىلعىلار ارقىلى اۋانىڭ ىلعالدىلىعىن, سۋدىڭ مولشەرىن انىقتاۋ قاتتى قىزىقتىرىپتى. ول پروفەسسور دجيحۋان چەننىڭ «بيوفيزيكالىق مودەلدەر جانە ولاردى ەكوجۇيەلىك تالداۋدا قولدانۋ» اتتى وقۋ قۇرالىنىڭ وسى سالا ماماندارىنا بەرەرى مول ەكەنىن ايتادى.
م.ح.دۋلاتي اتىنداعى تاراز ۋنيۆەرسيتەتى «ەكولوگيا» كافەدراسىنىڭ مەڭگەرۋشىسى, PhD دوكتورى ەلميرا ماداليەۆا شەتەلدىك وقىتۋشىلار ءبىلىم بەرۋدىڭ جاڭا تاسىلدەرىن ۇيرەتكەنىن جەتكىزدى.
قىزىلوردا
