«كەشە قارجىلىق مونيتورينگ اگەنتتىگى رەيدەرلىك باسىپ الۋمەن اينالىسقان ادامدار توبىنا قاتىستى تەرگەۋ ناتيجەلەرىن جاريالادى. 12 شىلدەدە وسى توپتىڭ مۇددەسىن قورعاعان ادۆوكات بۋرحان جانسەيىتوۆ كۇدىكتىلەرگە جاسىرىن باقىلاۋ جۇرگىزىلەتىنى تۋرالى اقپارات الىپ, قۇقىق قورعاۋ ورگانىنىڭ قىزمەتكەرلەرىنە كەدەرگى كەلتىردى. اتاپ ايتقاندا, ول ماقساتتى تۇردە اراڭداتۋ ارەكەتىن ۇيىمداستىردى. ب. جانسەيىتوۆ جەدەل توپتىڭ قىزمەتتىك كولىگىنە توسقاۋىل بولىپ, اۆتوكولىكتىڭ الدىنعى دوڭگەلەگىن تەسىپ, تەرەزەسىن سىندىرماق بولدى. ول ماقساتتى تۇردە قىزمەتكەرلەرمەن جانجال تۋىنداتۋعا تىرىستى. بۋرحان جانسەيىتوۆ وقيعا ورنىنا كەلگەن پوليتسيا قىزمەتكەرلەرىنىڭ تالاپتارىنا جاۋاپ بەرمەدى, اگرەسسيا تانىتتى. سونداي-اق, ول قارجىلىق مونيتورينگ اگەنتتىگىنىڭ قىزمەتكەرىنە قول كوتەردى. ب. جانسەيىتوۆ اتالعان وقيعانى تەرگەۋگە كەدەرگى جاساۋ جانە جالعان قوعامدىق پىكىر قالىپتاستىرۋ ماقساتىندا ۇيىمداستىردى. ونىڭ جاساعان ارەكەتتەرى بيلىك ورگاندارى مەن قوعامدىق تارتىپكە قاراما-قايشى دەپ تانىلىپ, ب. جانسەيىتوۆ قاماۋعا الىندى», دەلىنگەن قارجىلىق مونيتورينگ اگەنتتىگىنىڭ حابارلاماسىندا.
سونىمەن قاتار, ب. جانسەيىتوۆ وزگە دە ادۆوكاتتارعا ولاردىڭ سىرتىنان قۇقىق قورعاۋ قىزمەتكەرلەرى اندىپ جۇرگەنى تۋرالى جالعان اقپارات تاراتقان ەكەن. قارجىلىق مونيتورينگ اگەنتتىگى بۇل اقپاراتتىڭ شىندىققا جاناسپايتىنىن مالىمدەدى.
