قوعام • 15 شىلدە، 2022

قوردان كۇتەر ءۇمىت مول

39 رەت كورسەتىلدى

«قازاقستان حالقىنا» قورىنىڭ توراعاسى بولات جامىشەۆتىڭ قاراعاندىعا نەندەي ماقساتپەن كەلگەنى بەلگىلى بولدى. وبلىستىق اكىمدىكتە قوعام بەلسەندىلەرىمەن وتكەن كەزدەسۋدە ول اتالعان ۇيىمنىڭ ءوز جۇمىسىنىڭ فورماتىن تۇبەگەيلى وزگەرتۋدى قولعا الماقشى ەكەنىن ءمالىم ەتتى.

– قىركۇيەك ايىندا ءبىز ازا­مات­تىق قوعام وكىلدەرىن، قور دونورلارىن، قازاقستاندىق ءىرى كاسىپ­ورىندار مەن كاسىپكەرلەردى، ۇكى­مەت مۇشەلەرىن، دەپۋتاتتاردى شاقى­رىپ، ۇلكەن ونلاين-كونفەرەن­تسيا وتكىزۋدى جوسپارلاپ وتىرمىز. وسى القالى جيىندا ءبىز قوردىڭ جاڭا تۇجىرىمداماسىن، قايىرىمدىلىق باعدارلامالار مەن جوبالار نوبايىن بەكىتكىمىز كەلەدى. سىزدەردىڭ ۇسىنىستارىڭىزدى ەستۋ ءبىز ءۇشىن ماڭىزدى. وسى ماقساتتا وڭىرلەردى ارالايمىز، – دەپ اتاپ ءوتتى ب.جا­مىشەۆ.

سونىمەن قاتار توراعا «قازاق­ستان حالقىنا» قورىنىڭ بۇگىنگى تىنىس-تىرشىلىگى مەن تىڭ باستامالارى تۋرالى بايانداپ بەردى. مى­سالى، ۇيىم قازىرگى ۋاقىتتا اۋىل­دىق جەرلەردەگى ءبىلىم بەرۋدى قولداۋ جونىندەگى ءتيىمدى جوبالاردى ىزدەستىرىپ جاتىر ەكەن.

– ارنايى مەكتەپ-ينتەرناتتار­دى جابدىقتاۋ بويىنشا جوبا دايىنداپ جاتىرمىز. بۇل باعدار­لاما 99 مەكتەپتەن ءوتىنىم الدى. سونداي-اق «100 سپورت زالى» باعدار­لاماسىن قارجىلاندىرۋ باستالدى، – دەدى قور توراعاسى.

كەزدەسۋ بارىسىندا قوعام بەل­سەن­­دىلەرى دەنساۋلىق ساقتاۋدى قول­داۋعا، ەرەكشە بالالار مەن مۇ­گەدە­ك­تىگى بار ادامدارعا كومەك كورسە­تۋ­گە قاتىسى بار ۇسىنىستارىن جەتكىزدى.

قور باسشىسى بولسا، بۇل ۇسى­نىس­تاردىڭ ءبىر دە ءبىرىنىڭ نازاردان تىس قالمايتىنىن ايتىپ، ولار­دىڭ الداعى ۋاقىتتا كەشەندى جۇ­مىس باعدارلاماسى اياسىندا مۇمكىن­دى­­گىن­شە جۇزەگە اسىرىلىتىنىنا سەن­دىردى.

كەزدەسۋدە قاراعاندى وبلىسى­نىڭ اكىمى جەڭىس قاسىمبەك بۇگىندە جەرگىلىكتى اتقارۋشى ورگاندار­دىڭ الەۋمەتتىك كومەك كورسەتۋ بويىن­شا جۇمىس ىستەپ جاتقانىن باياندادى.

– مىسالى، ورفاندىق اۋرۋلارى بار ەمدەلۋشىلەرگە ارنالعان دارى­لىك پرەپاراتتاردى ساتىپ الۋ بيۋدجەتتەن قارجىلاندىرىلدى. جۇيەلى ماسەلەلەردى ءوز دەڭگەيىندە شەشۋگە تىرىسامىز. مەتسەناتتار، دەمەۋشىلەر دە كومەكتەسەدى، – دەپ اتاپ ءوتتى ول.

دەگەنمەن ءوڭىر باسشىسى ءالى دە بولسا كۇردەلى ماسەلەلەردىڭ بار ەكەنىن جاسىرمادى. سول سەبەپتى دە ول ءوڭىردىڭ اتالعان قورمەن ءوزارا ءتيىمدى ءىس-قيمىل جاساۋعا مەيلىنشە بەيىلدى ەكەنىن جەتكىزدى.

كەزدەسۋدىڭ سوڭىنا تامان «قازاقستان حالقىنا» قوعامدىق قورى مەن قاراعاندى وبلىسىنىڭ اكىمدىگى ىنتىماقتاستىق جونىندەگى مەموراندۋمعا قول قويدى.

 

قاراعاندى

سوڭعى جاڭالىقتار

ۇقساس جاڭالىقتار