اتالعان ءىس-شارانى قۇسمان شالاباەۆ توراعالىق ەتەتىن حالىقارالىق «قابانباي» قورى مەن الماتىداعى حالىقارالىق «قازاق ءتىلى» قوعامى قولعا العان. ۆەلو-ەكسپەديتسياعا شىققان ەرتىس نۇرقاسىمنىڭ ايتۋىنشا, تۇتاستاي بۇل ساپاردىڭ ۇزاقتىعى مىڭ شاقىرىمدى قۇراپ, ونىڭ بارىسىندا تاريحي ورىنداردى ارالاۋ كوزدەلگەن.
«اقشاتاۋ, اياگوز, ءۇرجار جانە ماقانشى ءوڭىرى مەن ويران سىندى جەرلەردە ەلىمىزدىڭ تاۋەلسىزدىگى ءۇشىن جاۋىنگەر بابالارىمىز جان بەرىپ, وتانىمىزدى قورعاپ قالعان. وسى كيەلى ورىندارعا توقتاپ, باھادۇرلەردىڭ رۋحىنا ءتاۋ ەتەمىز. ساپارىمىز باقتى, جاربۇلاق جانە الاكولگە جەتكەن سوڭ ءتامامدالادى. تۇتاستاي العاندا, ۆەلو-ەكسپەديتسيانىڭ ۇزاقتىعى – مىڭ شاقىرىم. بۇل ساپارعا شىعۋداعى ماقساتىمىز – جاس ۇرپاققا باتىر بابالارىمىزدىڭ ەرلىكتەرىن, ەلىمىزدى قورعاۋ جولىنداعى قايراتكەرلىك ىستەرىن دارىپتەۋ. جاستار تۇكتى جۇرەكتى باھادۇرلەرىمىزدىڭ جۇرگەن جولدارىنا قانىقسا, ەلدى, جەردى, ءتىل مەن ءدىلدى قورعايتىنداي ازامات بولىپ قالىپتاساتىنىنا بەك سەنىمدىمىز. سوندىقتان دا بۇل امالىمىزدىڭ وسكەلەڭ ۇرپاقتى وتانسۇيگىشتىك رۋحتا تاربيەلەۋدە ماڭىزى زور.
ەكىنشىدەن, وسى ارقىلى كۇنى كەشكە دەيىن سمارتفونعا تەلمىرىپ وتىراتىن بالالاردى ۆەلوسيپەدكە وتىرعىزىپ, بۇقارالىق سپورتتى ناسيحاتتاۋ كوزدەلگەن. سەبەبى سالاۋاتتى ۇرپاق – ەل كەلەشەگىنىڭ كەپىلى. ايتسە دە بۇل جەردەگى ەڭ باستى ۇستانىمىمىز – ەلىنە ادال قىزمەت ەتەتىن جاس ازاماتتاردىڭ جاڭا لەگىن قالىپتاستىرۋعا ۇلەس قوسۋ.
ىقىلىم زامانداردا وسىنداي ۇلان عايىر جەرىمىزدى بابالارىمىز جازدىڭ اپتاپ ىستىعى مەن قىستىڭ قىتىمىر ايازىنا قاراماستان, سونداي-اق تەرريتوريالىق اۋماقتىڭ الشاقتىعىنا قاراماستان قورعاپ, ساقتاي بىلگەن. بىلتىر بۇعان ۇقساس ەكسپەديتسياعا كولىكپەن شىعىپ, ءبىراز قۇندى دەرەكتى تاپقان ەدىك. بيىل دا كونە تاريحىمىزدان سىر شەرتەتىن مالىمەتتەر تابىلاتىنىنا ءۇمىتىمىز باسىم», دەدى حالىقارالىق «قازاق ءتىلى» قوعامىنىڭ جاۋاپتى حاتشىسى ە.نۇرقاسىم.
اشىق دەرەككوزدەرگە سۇيەنسەك, قاراكەرەي قابانباي 100-دەن استام جەكپە-جەككە شىعىپ, جاۋدىڭ اتاقتى قولباسشىلارىن جەر جاستاندىرعان. قازاق-جوڭعار سوعىسىندا اسكەري قايراتكەرلىگىن تانىتىپ, بىرىككەن جاۋىنگەرلىك قاناتقا باسشىلىق جاساعان دارىندى باتىرلاردىڭ ءبىرى. سول سەكىلدى دارابوز قازاق-قىتاي قاتىناسىندا ديپلوماتيالىق قابىلەتىمەن تانىلعان تۇلعا. مۇنى ەرتەدەگى قىتايداعى قولجازبالار دالەلدەيدى.
اباي وبلىسى
