«ادام كاپيتالىن دامىتۋ ىسىندە ءبىلىم سالاسى نەگىزگى ءرول اتقارادى. ءبىز جۋىردا ءبىلىم جانە عىلىم مينيسترلىگىن ەكىگە بولدىك. بۇل قادام قوردالانعان ماسەلەلەردى شەشۋ ءۇشىن قاجەت بولدى. ۇكىمەت جانە جاڭا مينيسترلىكتەردىڭ باسشىلارى وتاندىق ءبىلىم جانە عىلىم سالاسىن تىڭ سەرپىنمەن دامىتۋعا كۇش سالادى دەپ سەنەمىن», دەدى مەملەكەت باسشىسى ۇكىمەتتىڭ كەڭەيتىلگەن وتىرىسىندا.
سونداي-اق پرەزيدەنت سوڭعى جىلدارى مەكتەپ قابىرعاسىندا زورلىق-زومبىلىقتىڭ كوبەيىپ كەتكەنىنە الاڭداۋلى ەكەنىن جەتكىزدى.
«مەن وسى جىلدى بالالار جىلى دەپ جاريالادىم. بىراق, سوڭعى جىلدارى مەكتەپ قابىرعاسىندا زورلىق-زومبىلىقتىڭ كوبەيىپ كەتكەنى الاڭداتادى. ونىڭ ۇستىنە, تولىق جابدىقتالعان مەكتەپتەردىڭ 65 پايىزىندا, ياعني 3 مىڭ مەكتەپتە بەينەباقىلاۋ جۇيەسى تالاپقا ساي ەمەس, كەيدە مۇلدەم جۇمىس ىستەمەيدى. جالپى, ەلىمىز بويىنشا بالالار مەن جاسوسپىرىمدەردىڭ ءوز-وزىنە قول سالۋى, ياعني سۋيتسيد ازايدى. دەگەنمەن, الماتى, جامبىل, قوستاناي جانە ماڭعىستاۋ وبلىستارىندا مۇنداي وقيعالار كوبەيىپ بارادى. بالالاردى زورلىق-زومبىلىقتان قورعاۋعا, ءسۋيتسيدتىڭ الدىن الۋعا, ءاربىر بالانىڭ قۇقىقتارىن قامتاماسىز ەتۋگە ارنالعان كەشەندى جوسپار قاجەت», دەدى قاسىم-جومارت توقاەۆ.
