قوستاناي وبلىسىندا جوعالعان 7 جاسار قىز ءالى تابىلعان جوق

قوستاناي. 29 ءساۋىر. قوستاناي وبلىسى رۋدنىي قالاسىندا جوعالعان قىز تۋرالى تۇششىمدى اقپارات بەرگەن ادامعا پوليتسيا تاراپىنان 1 ملن. تەڭگە بەرىلەدى. بۇل تۋرالى «24 kz» ارناسى حابارلادى. قوستاناي وبلىسى رۋدنىي قالاسىندا وسىدان 5 كۇن بۇرىن ءوز ءۇيىنىڭ اۋلاسىندا ويناپ جۇرگەن جەرىنەن ءىز-ءتۇسسىز جوعالىپ كەتكەن ۆيكتوريا گانيا ەسىمدى 7 جاسار قىز بالانىڭ ءولى-ءتىرىسى بەيمالىم كۇيدە قالىپ وتىر. ونى ىزدەستىرۋ جۇمىسى كۇندىز-ءتۇنى جالعاسسا دا ەشقانداي ناتيجە بەرمەۋدە. قوستاناي وبلىستىق ىشكى ىستەر دەپارتامەنتىنىڭ وكىلى ەلەنا كاشارينانىڭ ايتۋىنشا, قىزدى ىزدەستىرۋگە 3 مىڭنان استام ادام تارتىلعان. بۇلاردىڭ دەنى اسكەري ءبولىم جاۋىنگەرلەرى مەن قالالىق ءبىلىم ءبولىمىنىڭ قىزمەتكەرلەرى, سوكولوۆ-سارىباي تاۋ-كەن وندىرىستىك بىرلەستىگىنىڭ جۇمىسشىلارى جانە ەرىكتىلەر. ىزدەستىرۋ ءىسىن قوستاناي وبلىستىق ىشكى ىستەر دەپارتامەنتىنىڭ باستىعى, پوليتسيا پولكوۆنيگى تىلەگەن ماتكەنوۆ ۇيىمداستىرۋدا. پوليتسيا قىزمەتكەرلەرىنىڭ اقپاراتى بويىنشا, بۇل ىسكە 30-35 جاستاعى, بويى ورتاشا كەلگەن ەۋروپالىق ەر ادامنىڭ قاتىسى بولۋى مۇمكىن. وبلىستىق ىشكى ىستەر دەپارتامەنتىنىڭ ءباسپاسوز حاتشىسى ادىلبەك نۇرماحين: «ىزدەۋ شارالارىنا پوليتسەيلەردەن بولەك, 3 مىڭداي ادام تارتىلسا دا كوڭىل جۇباتار حابار بولماي تۇر. بۇگىن قوستاناي وبلىستىق ىشكى ىستەر دەپارتامەنتى ۆيكتوريا گانيا تۋرالى ناقتى مالىمەتتەر ايتقان ادامعا 1 ملن. تەڭگە سىياقى بەرىلەتىنىن مالىمدەدى. ىزدەۋ شارالارىنا الەۋمەتتىك جەلىلەردىڭ مۇمكىندىگى كەڭىنەن قولدانىلۋدا, – دەدى. جولدىباي بازار. دەرەككوز: «24kz». فوتو: «قازاقپارات».