«قاراسورا-2022» رەسپۋبليكالىق جەدەل الدىن الۋ ءىس-شاراسىن وتكىزۋ بارىسىندا پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ, پاترۋلدىك پوليتسيا باتالونىنىڭ, پد كينولوگيالىق قىزمەت ورتالىعىنىڭ قىزمەتكەرلەرى قاتارىنان قۇرالعان ءموبيلدى توپ جامبىل وبلىسىنىڭ اۋماعىنا كىرەتىن جانە شىعاتىن اۆتوكولىك قۇرالدارىن تەكسەرۋ بويىنشا ماقساتتى جۇمىستار جۇرگىزۋدە.
وسىنداي ءىس-شارالاردى جۇرگىزۋ كەزىندە الماتى-ەكاتەرينبۋرگ رەسپۋبليكالىق ماڭىزى بار تاس جولىنىڭ 360-شاقىرىمىنداعى مويىنقۇم اۋدانى شىعاناق كەنتىنىڭ جانىندا نۇر-سۇلتان قالاسىنىڭ 41 جاستاعى تۇرعىنىنىڭ باسقارۋىنداعى ۆاز-21014 اۆتوكولىگىن توقتاتتى.
تەيا قىزمەتتىك-ىزدەستىرۋ يتىمەن بىرگە اۆتوكولىكتى تەكسەرۋ بارىسىندا كولىك سالونىنان اق پوليەتيلەن پاكەتى تابىلىپ, تاركىلەندى. ونىڭ ىشىندە جالپى سالماعى 3 كەلى 30 گرامم بولاتىن گاشيش تابىلدى. كۇدىكتى ءوز كىناسىن تولىق مويىنداپ, قورداي اۋدانىنىڭ ۋاقىتشا ۇستاۋ يزولياتورىنا قاماۋعا الىندى.
«اتالعان دەرەككە قاتىستى قازاقستان رەسپۋبليكاسى قىلمىستىق كودەكسىنىڭ 297-بابى 3-بولىگى (ەسىرتكى زاتتارىن وتكىزۋ ماقساتىندا اسا ءىرى مولشەردە زاڭسىز ساقتاۋ مۇلكى تاركىلەنىپ, ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋعا جازالانادى) بويىنشا سوتقا دەيىنگى تەرگەۋ امالدارى باستالدى. قازىرگى ۋاقىتتا اتالعان قىلمىسقا باسقا دا تۇلعالاردىڭ قاتىستىلىعىن انىقتاۋ بويىنشا جەدەل-تەرگەۋ ءىس-شارالارى جۇرگىزىلۋدە», دەدى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.
