«مامانيا» مەكتەبىنىڭ نەگىزىن 1889 جىلى اعارتۋشى, مەتسەنات تۇرىسبەك مامانوۆ قالاعان. قازاق دالاسىنا ءبىلىم شىراعىن جاققان وقۋ ورداسىنىڭ ءبىرى. وتكەن عاسىردىڭ العاشقى جارتىسىنداعى جەتىسۋ جەرىنەن تۇلەگەن ۇلت كوشباسشىلارىنىڭ دەنى وسى مەكتەپتە ءبىلىم العان. ورتالىقتىڭ اتىن «مامانيا» دەپ اتاۋدىڭ دا ءمانى تەرەڭدە.
«ماقساتىمىز – «مامانيا» مەكتەبىنىڭ يگى ىستەرىن قايتا جاڭعىرتۋ. بۇل جەردە مۇمكىندىگى شەكتەۋلى بالالارعا ينكليۋزيۆتى ءبىلىم بەرەمىز. بولاشاقتا اۋقىمىن كەڭەيتىپ, شەبەرلەر مەكتەبىنە اينالدىرۋ ويىمىزدا بار», دەيدى «التىن ادام» جەتىسۋ شەبەرلەرى ورتالىعىنىڭ ءتورايىمى دينا باكيروۆا.
قامكوڭىل جاندارعا جاسالعان وسىنداي قامقورلىق قالا باسشىلارى مەن تۇرعىندارىن دا بەيجاي قالدىرماعانى انىق. اشىلۋ سالتاناتىنا تەكەلى قالاسىنىڭ اكىمى باتىر مولداحمەتوۆ قاتىسىپ, ىزگى نيەتىن ءبىلدىردى.
ورتالىقتا مۇمكىندىگى شەكتەۋلى بالالار تەگىن ءبىلىم الىپ, ونەرىن ورىستەتەدى. ونداعى مۇمكىندىگى شەكتەۋلى 38 بالاعا 4 شەبەر كەسكىندەمە, سۋرەت سالۋ, بەزەندىرۋ, مودەلدەۋ, كيىز باسۋ, بەسمەر تىگۋ, سابىن جاساۋ سياقتى ۇيىرمەلەردە قولونەردەن ساباق بەرەدى. ولاردىڭ الاڭسىز ءبىلىم الۋىنا بارلىق جاعداي جاسالعانى كورىنىپ تۇر.
«ورتالىقتى اشار الدىندا مۇمكىندىگى شەكتەۋلى جانداردىڭ ەركىن كىرىپ-شىعۋىنا كوڭىل بولدىك. عيماراتتىڭ كىرىپ-شىعۋ قۇرىلعىلارى, ەسىك, ۇستەل, ورىندىققا دەيىن ەۋروپالىق ستاندارت بويىنشا ورنالاستىرىلدى. سونداي-اق مۇمكىندىگى شەكتەۋلى ازاماتتارمەن جۇمىس ىستەۋدە تاجىريبەمىز مول. وسى جەرگە كەلگەن ءار ادام جاقسى ءبىلىم الىپ, شەبەرلىگىن شىڭداپ, ەشكىمگە جالتاقتاماي, جەكە كاسىبىن اشۋعا كەرەكتى بىلىكتىلىك جيناپ قايتسا, قۋانار ەدىك», دەدى ورتالىق ازيا ۋنيۆەرسيتەتىنىڭ اكىمشىلىك وكىلى رايحان سەيسەكەنوۆا.
ورتالىق اتالعان بىرلەستىكتىڭ جەكە قارجىسىمەن اشىلدى. الداعى ۋاقىتتا باسقا اۋدان, قالالاردان دا وسىنداي يگىلىكتى جۇمىس قولعا الىنباق.
جەتىسۋ وبلىسى
