نۇر-سۇلتان قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەرلان نۇرلان ۇلى قالا بويىنشا جۇمىسسىزدار سانى 6 500 ادام ەكەنىن, ونىڭ 20 پايىزىن 29 جاسقا دەيىنگى جاستار قۇرايتىنىن اتاپ ءوتتى.
«بۇگىنگى جارمەڭكە جۇمىس بەرۋشىلەرگە دە, جۇمىس ىزدەۋشىلەرگە دە وتە پايدالى. سەبەبى اركىم ءوزىنىڭ قالاعانىن ءبىر الاڭنان, ءبىر ورتادان تابۋعا مۇمكىندىك تۋىپ وتىر. ءبىز جىلدىڭ سوڭىنا دەيىن وسىنداي سيپاتتا ءالى بىرنەشە جارمەڭكە ۇيىمداستىرۋدى كوزدەپ وتىرمىز», دەدى ول.
بيىل جۇمىسپەن قامتۋ ورتالىعى 18 جارمەڭكە وتكىزگەن, جىل سوڭىنا دەيىن تاعى وسىنشا وتكىزۋ جوسپارلاپ وتىر.
«قالامىزدا ءوتىپ جاتقان وسىنداي ءىس-شارالار جاستاردىڭ تۇراقتى جۇمىسقا ورنالاسۋىنا وڭ ىقپالىن تيگىزەتىنى انىق. سەبەبى جۇمىس ىزدەۋشى جاس مامان جۇمىس بەرۋشى تاراپپەن تىكەلەي جانە بەتپە-بەت جولىعۋىنا مۇمكىندىك بار. ءوزى تۋرالى ايتىپ, ءوزى قالاعان ماماندىق تۋرالى تولىقتاي اقپارات الۋىنا دا جاعداي جاسالعان. جانە دە جارمەڭكەگە كەلگەن جاستار جۇمىس بەرۋشى مەكەمەنىڭ قوياتىن تالاپتارىمەن تانىسىپ, ماماندىعىنىڭ قىر-سىرىنا ۇڭىلەدى. بولاشاق ءومىرىن باعدارلايدى. سول سياقتى جۇمىس ۇسىنۋشى كومپانيا دا جاس تۇلەكتىڭ ەڭبەككە دەگەن ىنتاسى مەن ءبىلىمىن بايقاپ, كەڭىرەك ديالوگ قۇرا الادى. مەنىڭ ويىمشا وسىنداي جارمەڭكەلەر قالامىزدا ءجيى ۇيىمداستىرىلۋى كەرەك», دەدى جاس تۇلەك باۋىرجان نۇرعاليەۆ.
جارمەڭكەگە ارنايى كەلگەن جەكە كاسىپكەر مەيرام ءابدىراحمانوۆ ءوزىنىڭ جيھاز شىعاراتىن كاسىپورنىنا ەكى قىزمەتكەر ىزدەيتىنىن, ەگەر جاس مامانداردىڭ جۇمىسقا دەگەن ىنتاسى بولسا, ءارى قاراي ءوسىپ-وركەندەۋىنە قولداۋ بىلدىرەتىنىن ايتتى.
«بۇگىن نۇر-سۇلتان قالاسى اكىمدىگىنىڭ قولداۋىمەن ۇيىمداستىرىلعان شاراعا كەلىپ وتىرمىن. ءبىزدىڭ جەكە كاسىپكەرلىگىمىزدىڭ اتاۋى – ء«تورت اعايىندى». نەگىزگى جۇمىسىمىز – جيھاز جاساۋ. سوندىقتان ماعان ەكى جۇمىسشى قاجەت. ءبىرىنشىسى – ديزاينەر, ەكىنشىسى – جيھاز قۇراستىرۋشى. سول ەكى ماماندى تاپسام دەپ كەلىپ تۇرمىن. نەگىزىنەن جۇمىسقا جاس ماماندار كەرەك. سەبەبى قازىرگى جاستاردىڭ ويلاۋى, ومىرگە, قوعامعا دەگەن كوزقاراسى جاڭاشا. جۇمىسىمىزعا تىڭ باعىت بەرە مە دەگەن ءۇمىتىم بار. ءبىزدىڭ تاراپتان قويىلاتىن نەگىزگى تالاپ – جۇمىسقا دەگەن ىنتاسى بولسا, ءبىز قالعانىن ۇيرەتىپ, ونىڭ كاسىبي مامان بولىپ قالىپتاسۋىنا كومەكتەسەمىز. كەز كەلگەن ادام مامان بولىپ تۋمايدى, ۋاقىت وتە كەلە جەتىلەدى جانە ءوز ءىسىنىڭ شەبەرىنە اينالادى. ء«تورت اعايىندى» جەكە كاسىپكەرلىگىمىز 2020 جىلدىڭ قازان ايىندا قۇرىلعان. كىشكەنتاي عانا ورىننان كولەمدى كاسىپورىنعا قادام باسىپ جاتىرمىز. جاڭادان جەكە كاسىپكەر بولىپ تىركەلىپ, جۇمىس جۇرگىزىپ كەلە جاتقان ازاماتتار مەملەكەت تاراپىنان قانداي قولداۋ بارىن تولىقتاي بىلمەيدى, سول سەبەپتى بىزدە وزىمىزگە بەرىلەتىن مۇمكىندىكتەردى ءبىلۋ ماقساتىندا وسىنداي ءىس-شاراعا كەلىپ وتىرمىز», دەدى جەكە كاسىپكەر مەيرام ءابدىراحمانوۆ.
جاستارعا ارنالعان جارمەڭكەمەن قاتار, كاسىپكەرلەر ءۇشىن اشىق ەسىك كۇنى ۇيىمداستىرىلدى. شاعىن جانە ورتا بيزنەس وكىلدەرى مەملەكەتتىك قولداۋ بويىنشا قابىلدانىپ جاتقان شارالار, ونىڭ ىشىندە بانكتەردىڭ باعدارلامالارى مەن نەسيە ونىمدەرى تۋرالى تولىق مالىمەت الۋعا مۇمكىندىك تۋدى. ماۋسىم ايىنىڭ ورتاسىندا كاسىپكەرلىكتى دامىتۋ جانە قولداۋ اياسىندا ەلوردادا مەملەكەتتىك ورگاندار, كۆازيمەملەكەتتىك سەكتور, «دامۋ» كاسىپكەرلىكتى دامىتۋ قورى» اق, «اتامەكەن» وڭىرلىك پالاتاسى, ەكىنشى دەڭگەيلى بانك وكىلدەرى مەن كاسىپكەرلەردىڭ قاتىسۋىمەن دوڭگەلەك ۇستەل وتكەن بولاتىن. كەزدەسۋ قورىتىندىسى بويىنشا كاسىپكەرلەردى مەملەكەتتىك, سونداي-اق جەكە نەسيە ونىمدەرىن قولداۋدىڭ قولجەتىمدى شارالارى تۋرالى قوسىمشا حاباردار ەتۋ قاجەتتىلىگى انىقتالدى. اشىق ەسىك كۇنىنە قالانىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ, حالىقتى جۇمىسپەن قامتۋ ورتالىعىنىڭ, «Astana» اكك, «AstanaInvest» ينۆەستيتسيالاردى دامىتۋ ورتالىعىنىڭ, «دامۋ» قورىنىڭ, «اتامەكەن» ۇلتتىق كاسىپكەرلەر پالاتاسىنىڭ, سونداي-اق ەكىنشى دەڭگەيدەگى بانكتەر مەن قارجى ۇيىمدارىنىڭ وكىلدەرى قاتىستى.
نۇر-سۇلتان قالاسى كاسىپكەرلەر پالاتاسىنىڭ ديرەكتورى بەيسەن بوگەنباي ۇلى اتالعان ءىس-شارا كاسىبىن ەندى باستاعان ازاماتتارعا كەڭىنەن كەڭەس الۋعا مۇمكىندىك بەرەتىن تاپتىرماس الاڭ ەكەنىن جەتكىزدى.
«نۇر-سۇلتان قالاسى كاسىپكەرلەر پالاتاسى, كاسىپكەرلەر باسقارماسىمەن بىرلەسىپ ارنايى اشىق ەسىك كۇنىن ۇيىمداستىرۋدامىز. نەگىزگى ماقسات – مەملەكەت تاراپىنان قاراستىرىلعان قولداۋلاردى جەكە كاسىپكەرلەرگە كەڭىنەن ءتۇسىندىرۋ. ولاردىڭ ىشىندە قاراپايىم قاعيدالاردان باستاپ بيزنەستىڭ جول كارتاسى, قارجىلىق ۇيىمداردىڭ قىزمەتى بار. ءوزىمىزدىڭ كاسىپكەرلەر پالاتاسىنان دا بىرنەشە قىزمەتكەر كەلدى. ولاردىڭ بارلىعى اقىسىز قىزمەت كورسەتەدى. قازىرگى تاڭدا جەكە كاسىپكەرلەر جارتى جىلدىڭ قورىتىندى ەسەبىن تاپسىرىپ جاتىر. مىسالى, كىشى كاسىپكەرلەردىڭ جەكە بۋحگالتەرلەرى بولماعاسىن, بۇگىن ءبىز ولارعا اقپاراتتىق جاعىنان كومەكتەسەمىز. قوسىمشا مەملەكەتتىك قولداۋلار بويىنشا ونى قالاي الۋعا بولادى, قاي سالالار جاتادى دەگەن ساۋالدارعا جاۋاپ بەرۋ, كاسىپ باستايمىن دەگەن ازاماتتارعا جول كورسەتۋ ماقساتىندا وسىنداي ءىس-شارا ۇيىمداستىرىلىپ, بىرنەشە سالا ماماندارىن ءبىر الاڭعا جيناپ وتىرمىز. پاندەميا, كارانتين كەزىندە شەكارالار جابىلىپ, سىرتتان كەلەتىن جۇمىس كۇشى توقتاپ قالعان بولاتىن. سوعان بايلانىستى قۇرىلىس سالاسىنداعى وكىلدەرىمەن سۇحباتتاسقانىمىزدا قۇرىلىسقا ماماندار تاپپاي جاتقانىن ايتقان بولاتىن. نۇر-سۇلتان قالاسىندا 70-تەن استام وقۋ ورتالىقتارى بار. ول جەردە قىسقا مەرزىمدى وقۋ باعدارلاماسىنا نەگىزدەلگەن ءارتۇرلى مامان دايىندالادى», دەدى ب.بوگەنباي ۇلى.
ينۆەستيتسيالار جانە كاسىپكەرلىكتى دامىتۋ باسقارماسى كاسىپكەرلىكتى دامىتۋ ءبولىمىنىڭ باسشىسى نۇرجان ءاشىموۆ ەلوردا ەكونوميكاسىندا ورتا جانە شاعىن بيزنەستىڭ ۇلەسى 67 پايىزدى قۇرايتىنىن مالىمدەدى.
ء«بىزدىڭ ماقساتىمىز – بۇل كورسەتكىشتى ودان ءارى دامىتۋ جانە سونىڭ نەگىزىندە جۇمىس ىستەۋ. كاسىپ اشقىسى كەلەتىن ازاماتتار بىزگە ءارتۇرلى سۇراقپەن جۇگىنەدى. ونىڭ ىشىندە كاسىپ اشۋ ءۇشىن نە ىستەۋ كەرەك, قايدا بارۋ كەرەك, مەملەكەت تاراپىنان قانداي قولداۋ باعدارلامالارى بار, ەكىنشى دەڭگەيدەگى بانكتەردىڭ قانداي نەسيەلەرى بار نەمەسە ولاردىڭ پايىزدىق مولشەرلەمەلەرى قانشا دەگەن سياقتى سۇراقتار بار. سوندىقتان كاسىپكەرلەر مەن تۇرعىنداردىڭ ۋاقىتىن ۇنەمدەۋ ءۇشىن قارجى ۇيىمدارى مەن قالا تۇرعىندارىن ءبىر الاڭعا جيناپ وتىرمىز. بۇگىن 17 ۇيىم قاتىسىپ وتىر. ونىڭ ىشىندە 12-ءسى – ەكىنشى دەڭگەيدەگى بانك, 3-ەۋى – شاعىن قارجى ۇيىمى, قالعان 2-ەۋى – نەسيە كورپوراتسياسى. بۇل جەردە تولىققاندى كەڭەس بەرۋ, اقپاراتتاندىرۋ جۇمىستارى جۇرگىزىلەدى», دەدى ن.ءاشىموۆ.
