ەلوردا • 06 شىلدە، 2022

ەلوردانىڭ 300-دەن استام تۇرعىنى پاتەرلى بولدى

استانا كۇنى قارساڭىندا ءۇي كەزەگىندە تۇرعان 300-دەن استام ەلوردالىققا پاتەر كىلتتەرى تابىستالدى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

بوتاكوز باقبەرگەن

كەزەكتە تۇرعانداردىڭ اراسىندا جەتىم بالالار، تولىق ەمەس وتباسىلار، ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار، كوپبالالى وتباسىلار، ءى جانە ءىى توپتاعى مۇگەدەكتەر، زەينەتكەرلەر بار. پاتەرلەردىڭ ءبىر بولىگى جۇمىس ىستەيتىن جاستارعا ارنالعان باعدارلاما بويىنشا بەرىلدى.

«جالعا بەرىلەتىن تۇرعىن ۇيگە ءوتىنىم قابىلداۋ باستالعانىن بىلگەن سوڭ، باعىمدى سىناپ كورگىم كەلدى. سەبەبى، مەن 29 جاسقا تولاتىن ەدىم، باعدارلاماعا قاتىساتىن سوڭعى مۇمكىندىگىم بولاتىن. جاڭا جىل قارساڭىندا، ياعني 31 جەلتوقسان كۇنى كەشكە تۇرعىن ءۇي قورىنىڭ سەرتيفيكاتى مەن قۇتتىقتاۋ حاتى كەلگەندە سەنەر-سەنبەسىمدى بىلمەي ابدىراپ قالىپپىن. مىنە، از عانا ۋاقىتتان كەيىن پاتەر كىلتى تابىستالىپ وتىر. جۇمىس ىستەيتىن جاستارعا وسىنداي مۇمكىندىك بەرىپ وتىرعانى ءۇشىن مەملەكەتكە ريزامىن»، دەپ قۋانىشىمەن ءبولىستى باعدات ەسىمدى ازامات.

تۇرعىن ءۇي كەشەنى ۇلى دالا داڭعىلىندا، نۇرا-ەسىل ارناسىنىڭ قاسىندا ورنالاسقان جانە Jetisu بيگۆيللىنە كىرەدى. مۇندا تۇرعىن ۇيلەردەن بولەك، مەكتەپ، دامىتۋ ورتالىعى، ساۋدا ءۇيى جانە ت.ب. نىساندار قۇرىلىسى جوسپارلانعان.

«مەملەكەت باسشىسىنىڭ تاپسىرماسى بويىنشا ەلوردادا قولجەتىمدى الەۋمەتتىك تۇرعىن ءۇي قۇرىلىسىنىڭ كولەمى ۇلعايتىلدى. مىسالى، 2018 جىلى – 1 100 پاتەر، 2019 جىلى – 2 900، 2020 جىلى – 7 000، 2021 جىلى – شامامەن 10 000 پاتەر سالىندى. قۇرىلىس كولەمىن ساقتاۋ كەرەك. ول ءۇشىن قۇرىلىس يندۋسترياسىنىڭ ءبارى جۇمىلدىرىلعان: جەرگىلىكتى زاۋىتتار دا، ءۇي قۇرىلىسى كومبيناتتارى دا»، دەدى قالا اكىمىنىڭ ورىنباسارى نۇرلان نۇركەنوۆ پاتەر كىلتىن تاپسىرۋ راسىمىندە.