«سامۇرىق-قازىنا» اق باسقارما توراعاسى الماسادام ساتقاليەۆ اتاپ وتكەندەي, فورۋمدى ۇيىمداستىرۋداعى باستى ماقسات – ەڭبەك قاۋىپسىزدىگى جانە ونى قورعاۋ سالاسىندا جاڭا ءىرى ساراپتاما الاڭىن قۇرۋ, سالاداعى تۇيتكىلدى ماسەلەلەردىڭ ءتۇيىنىن تارقاتۋ, اۋقىمدى تالداۋ جۇرگىزۋ ءھام ءوزارا تاجىريبە الماسۋ.
ا.ساتقاليەۆ بۇگىنگى تاڭدا قور توبىندا ەڭبەكتى قورعاۋ جانە وندىرىستىك قاۋىپسىزدىك باعىتى بويىنشا جۇرگىزىلىپ جاتقان جۇمىس ناتيجەلەرىمەن ءبولىستى. سونداي-اق 2022-2026 جىلدارعا ارنالعان سىن-تەگەۋرىندەر تۋرالى اڭگىمەلەدى.
– «سامۇرىق-قازىنا» – قازاقستانداعى ەڭ ءىرى جۇمىس بەرۋشى. كومپانيالار توبىنداعى قىزمەتكەرلەردىڭ سانى 250 مىڭنان استام ادامدى قۇرايدى. بۇل رەتتە وندىرىستىك پەرسونالدىڭ ۇلەسى جالپى قىزمەتكەرلەر سانىنىڭ 92,4 پايىزىن قۇرايدى. اتاپ وتەرلىگى, قور كوپتەگەن جىل بويى قاۋىپسىز ءوندىرىس قۇندىلىقتارى مەن تاسىلدەرىن ىلگەرىلەتۋگە كۇش-جىگەر مەن رەسۋرستار ءبولىپ كەلەدى. دەگەنمەن ءبىز ءوز كاسىپورىندارىمىزدا نولدىك جاراقاتتانۋعا قول جەتكىزۋ بويىنشا ماقساتتى كورسەتكىشتەردەن ءالى دە الىسپىز. جىل قورىتىندىسى بويىنشا ءتيىستى كومپانيالاردىڭ ديرەكتورلار كەڭەسىنىڭ الدىنا وندىرىستىك قاۋىپسىزدىك سالاسىندا ءبىرىنشى باسشىلاردىڭ جۇرگىزگەن جۇمىسى تۋرالى سۇرايتىن بولامىز. كاسىپورىن قىزمەتكەرلەرىنىڭ قاۋىپسىزدىگىن قامتاماسىز ەتۋ مەن جالپى قور ءۇشىن باستى قۇندىلىق بولىپ سانالادى جانە ءاربىر جازاتايىم وقيعانى ەرەكشە باقىلاۋدا ۇستايتىنىمدى ەسكەرتكىم كەلەدى, – دەدى فورۋمنىڭ اشىلۋىندا الماسادام ساتقاليەۆ.
قوردىڭ باسقارما توراعاسى ەڭبەكتى قورعاۋ جانە وندىرىستىك قاۋىپسىزدىك باعىتىنداعى جۇمىستى ودان ءارى جەتىلدىرۋ ءۇشىن ناقتى تاپسىرمالار بەردى.
– قىزمەتكەرلەردىڭ دەنساۋلىعى مەن قاۋىپسىزدىگىنە قاتىستى دۇنيەنىڭ ءبارى ءبىزدىڭ ءجىتى نازارىمىزدا بولادى. وسى باعىتتاعى جۇمىستى ودان ءارى جالعاستىرۋ ماڭىزدى. بۇل رەتتە الداعى ءىس-ارەكەتتەرىمىزدى ايقىنداپ الۋ ءۇشىن ناقتى تاپسىرمالار بەرمەكپىن. ەنشىلەس كومپانيالاردىڭ باسشىلارى بۇگىن قول قويىلعان مىندەتتەمەلەردى بارلىق دەڭگەيدە ۇستانۋى كەرەك. سونداي-اق وسىعان ۇقساس مىندەتتەمەلەر كومپانيالاردىڭ ءوز ىشىندە دە جاسالۋعا ءتيىس. وندىرىستىك اپاتتارعا اكەپ سوقتىراتىن تاۋەكەلدەرگە تالداۋ جۇرگىزۋ كەرەك. ولاردىڭ الدىن الۋ ءۇشىن جۇيەلى تۇردە نازاردا ۇستالاتىن ۇسىنىمدار بەرىلۋگە ءتيىس, – دەدى «سامۇرىق-قازىنا» اق باسقارما توراعاسى.
الماسادام ساتقاليەۆ وندىرىستىك قاۋىپسىزدىك كوميتەتى الاڭىندا قاۋىپسىزدىكتى ساقتاۋ تۇرعىسىنان ءوزارا تاجىريبە الماسۋ ماڭىزدى ەكەنىن, بۇل وزىق تاجىريبەلەردى ەنشىلەس كومپانيالارعا ەنگىزىپ, تاراتۋ ءۇشىن كەرەكتىگىن جەتكىزدى.
– وزىق تاجىريبەلەرگە سۇيەنە وتىرىپ, ۇدەرىستەردى تسيفرلاندىرۋ باعىتىنداعى جۇمىستاردى قولداپ, جالعاستىرۋ قاجەت. وندىرىستەگى قاۋىپسىزدىكتى ءتيىمدى قامتاماسىز ەتۋ ءۇشىن بارلىق دەڭگەيدە اۋديت جۇرگىزىلۋگە ءتيىس. ەڭبەك قاۋىپسىزدىگى مادەنيەتىن قالىپتاستىرۋ ءۇشىن بىرىڭعاي كورپوراتيۆتىك وقىتۋ كۋرس ۇيىمداستىرۋ ماڭىزدى. باسشىلاردىڭ قورشاعان ورتانى قورعاۋ جانە وندىرىستىك قاۋىپسىزدىك باعىتىنداعى جۇمىستارىن ءادىل باعالاۋ ءۇشىن ءتيىستى كريتەريلەردى انىقتاپ, بەكىتۋ كەرەك. اتاپ وتەرلىگى, قوردىڭ نازارىنداعى تالاپتاردىڭ ءبارى ءبىزدىڭ كونتراگەنتتەردە دە قاتاڭ ساقتالۋى ءتيىس, – دەدى ا.ساتقاليەۆ.
كەز كەلگەن كومپانيا ءۇشىن ەڭبەك قاۋىپسىزدىگىن ساقتاۋ – ماڭىزدى باعىت. سوندىقتان ولار بۇل سالاداعى جۇمىستى جەتىلدىرىپ وتىرۋعا بەيىلدى. ماسەلەن, «قازمۇنايگاز» ۇلتتىق كومپانياسىندا دا بۇل باعىتتا اتقارىلعان جۇمىس اۋقىمدى. بۇل تۋرالى فورۋمدا ۇلتتىق كومپانيانىڭ قورشاعان ورتانى قورعاۋ دەپارتامەنتىنىڭ ديرەكتورى قايرات ساقتاعانوۆ ايتىپ بەردى.
– «قازمۇنايگاز» ءۇشىن قىزمەتكەرلەردىڭ ءومىرى مەن دەنساۋلىعى باسىم باعىت سانالادى. بۇل رەتتە كومپانيا نولدىك جاراقاتتانۋ قاعيداتىن قاتاڭ ۇستانادى. ءبىز ەڭبەك قاۋىپسىزدىگى مادەنيەتىن قالىپتاستىرىپ, نىعايتۋعا كۇش سالىپ كەلەمىز. وسى جىلدىڭ ناۋرىز ايىندا قورشاعان ورتانى قورعاۋ باعىتىنداعى قولدانىستاعى ماركەتينگتى جەتىلدىرۋ ماقساتىندا ۇلتتىق كومپانيا رەسمي تۇردە Vision Zero جاھاندىق باستاماسىنا قوسىلدى. بۇل باستاما «قازمۇنايگازعا» قاراستى كومپانيالاردىڭ بارىنە ەنگىزىلەدى, – دەدى ق.ساقتاعانوۆ.
فورۋم بارىسىندا مەملەكەتتىك ورگانداردىڭ وكىلدەرى, «سامۇرىق-قازىنا» توبىنا قاراستى وندىرىستىك كومپانيالاردىڭ, حالىقارالىق ۇيىمداردىڭ توپ-مەنەدجەرلەرى جانە تاۋەلسىز ساراپشىلار ويلارىن ورتاعا سالىپ, پىكىرلەرىمەن ءبولىستى. فورۋمنىڭ باستى ارتىقشىلىعى دا وسىندا جاتسا كەرەك.
سونىمەن قاتار فورۋم اياسىندا قور توبىنىڭ 13 ءىرى كومپانياسىنىڭ توپ-مەنەدجەرلەرى Health&Safety سالاسىندا جەكە مىندەتتەمەلەرگە قول قويدى. باسشىلار وزدەرى ۇلگى بولا وتىرىپ, قاۋىپسىزدىك قۇندىلىقتارىنا دەگەن ادالدىعىن كورسەتۋگە, كومپانيالاردا ەڭبەكتى قورعاۋ سالاسىندا وزىق تاجىريبەنى ەنگىزۋدى قامتاماسىز ەتۋگە, سونداي-اق قىزمەتكەرلەر ءۇشىن قاۋىپسىز جۇمىس جاعدايىن جاساۋعا مىندەتتەلدى. ءتيىستى مىندەتتەمەگە «قازمۇنايگاز» ۇك» اق, «قازاتومونەركاسىپ» ۇاك» اق, «قازاقستان تەمىر جولى» ۇك» اق, «QazaqGaz» اق, «KEGOC» اق, «سامۇرىق-ەنەرگو» اق, «قازاقتەلەكوم» اق, «قازپوشتا» اق, «ەير استانا» اق, «Qazaq Air» اق, «تاۋ-كەن سامۇرىق» ۇتك» اق, «Samruk-Kazyna Ondeu» جشس, «Samruk-Kazyna Constraction» اق سياقتى كومپانيالاردىڭ باسشىلارى وتىردى.
فورۋم جۇمىسىنا حالىقارالىق ۇيىمدار مەن كومپانيالاردىڭ وكىلدەرى قاتىسىپ, ەڭبەكتى قورعاۋ سالاسىنداعى الەمدىك جەتىستىكتەرمەن ءبولىستى. فورۋم سپيكەرلەرى اراسىندا ORP (حالىقارالىق تاۋەكەلدەردى الدىن الۋ قورى), EBRD (ەۋروپالىق قايتا قۇرۋ جانە دامۋ بانكى), EVERYCO Central Asia Kazakhstan, IOSH (قاۋىپسىزدىك تەحنيكاسى جانە دەنساۋلىقتى قورعاۋ ينستيتۋتى), NEBOSH ( ۇلىبريتانيانىڭ ەڭبەكتى قورعاۋ جونىندەگى ۇلتتىق ەمتيحان كەڭەسى), OPITO جانە باسقا دا بەلدى ۇيىمداردىڭ ساراپشىلارى بولدى.
قور وكىلدەرى وندىرىستىك كومپانيالاردا سوڭعى ءتورت جىلدا جۇمىس ۋاقىتىن جوعالتاتىن جاراقات كوەففيتسيەنتىنىڭ 24 پايىزعا تومەندەۋىنە قول جەتكىزىلگەنىن اتاپ ءوتتى. زارداپ شەككەندەر سانى 35 پايىزعا ازايعان: 2018 جىلعى 165-تەن 2021 جىلى 108-گە دەيىن تومەندەپتى.
قوردا جانە پورتفەلدىك كومپانيالاردا ەڭبەكتى قورعاۋ جانە ونەركاسىپتىك قاۋىپسىزدىك جاعدايىن مونيتورينگىلەۋ ءۇشىن ۇدەرىستەردى اۆتوماتتاندىرۋ جانە تسيفرلاندىرۋ, قىزمەتكەرلەردى وقىتۋ بويىنشا بەلسەندى جۇمىس جۇرگىزىلۋدە. بىرقاتار پورتفەلدىك كومپانيادا ەسەپتىلىكتىڭ اشىقتىعىنىڭ جەتكىلىكتى دەڭگەيىن, كوممۋنيكاتسيالاردى دامىتۋدى جانە قاۋىپتەردى سايكەستەندىرۋ مەن تاۋەكەلدەردى باسقارۋدى جەڭىلدەتەتىن باسقا دا شەشىمدەردى قامتاماسىز ەتەتىن ءىت-شەشىمدەر ىسكە اسىرىلعان.
وسىنداي قادامدار قورعا جاعدايدى بولجاي وتىرىپ جانە وندىرىستىك قاۋىپسىزدىك سالاسىندا ورتاق ماقساتتارعا قول جەتكىزۋ ءۇشىن ءتيىستى ءىس-شارالاردى الدىن الا جوسپارلاپ, پورتفەلدىك كومپانيالاردىڭ قىزمەتىنە پرواكتيۆتى دەن قويۋعا مۇمكىندىك بەرەدى. اتالعان باعىتتى دامىتۋ ءۇشىن 2022 جىل «سامۇرىق-قازىنا» اق توبىندا قاۋىپسىزدىك جىلى بولىپ جاريالانعان.
ەسكە سالا كەتەيىك, وسى جىلدىڭ 26 مامىرىندا KIOSH-2022 ەڭبەكتى قورعاۋ جانە ونەركاسىپتىك قاۋىپسىزدىك جونىندەگى X قازاقستاندىق حالىقارالىق كونفەرەنتسياسىندا ەڭبەك جانە حالىقتى الەۋمەتتىك قورعاۋ مينيسترلىگى, «سامۇرىق-قازىنا» اق جانە حالىقارالىق الەۋمەتتىك قامسىزداندىرۋ قاۋىمداستىعى اراسىندا مەموراندۋمعا قول قويىلدى. باستى ماقسات – قور كومپانيالارى توبىنىڭ تاجىريبەسىندە Vision Zero نولدىك جاراقاتتانۋ تۇجىرىمداماسىنىڭ قاعيداتتارىن ناسيحاتتاۋ.
