«بۇگىن ءبىز جەتىنشى سايلانعان قازاقستان رەسپۋبليكاسى پارلامەنتىنىڭ ەكىنشى سەسسياسىنىڭ جۇمىسىن اياقتاپ, قورىتىندىلاپ وتىرمىز. وسى سەسسيانىڭ نەگىزگى ستراتەگيالىق باسىمدىقتارىن قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ وتكەن جىلعى قىركۇيەكتە سەسسيانىڭ اشىلۋىندا, سونداي-اق قازاقستان حالقىنا جولداۋىندا ايقىنداپ بەرگەن بولاتىن. وتكەن كەزەڭدە پارلامەنتتىڭ قىزمەتى بەلگىلى وقيعالار مەن ماڭىزدى شەشىمدەرگە تولى بولدى. بىرىنشىدەن, بيىلعى سەسسيا قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا ءوتتى. بۇل ەلىمىزدىڭ باستى مەملەكەتتىك مەرەكەسى عانا ەمەس, بارشا قازاقستاندىقتاردى بىرىكتىرەتىن ۇلتتىق تاريحي ماڭىزدى كەزەڭ. ەكىنشىدەن, تاۋەلسىزدىكتىڭ 30 جىلدىعىنداعى ماڭىزدى كەزەڭدەردىڭ ءبىرى – قازاقستان رەسپۋبليكاسى پارلامەنتىنىڭ 25 جىلدىق مەرەيتويى. پارلامەنتتىڭ قالىپتاسۋى مەن دامۋى ەگەمەن قازاقستاننىڭ تاعدىرىمەن تىعىز بايلانىستى. ۇشىنشىدەن, ەل دامۋىنداعى جاڭا كەزەڭنىڭ باستالۋىن بىلدىرەتىن كونستيتۋتسياعا تۇزەتۋلەر جونىندەگى رەسپۋبليكالىق رەفەرەندۋم بولدى», دەدى ەرلان قوشانوۆ.
وسى ورايدا ول پارلامەنتتىڭ وسى سەسسياسى بارشا قازاقستاندىق قوعام ءۇشىن ايرىقشا جاۋاپتى كەزەڭدە وتكەنىن اتاپ ءوتتى.
«ەڭ الدىمەن, ءبىز ەكى جىلعا سوزىلعان كوروناۆيرۋس پاندەمياسىن ەڭسەرىپ قانا قويماي, ورتاق كۇش-جىگەرىمىزدىڭ ارقاسىندا ايتارلىقتاي ناتيجەلەرگە قول جەتكىزدىك. دەنساۋلىق ساقتاۋ جۇيەسىندەگى تاسىلدەر وزگەرتىلدى, ءبىلىم بەرۋ سالاسىندا وقىتۋدىڭ جاڭا ستاندارتتارى ەنگىزىلدى, بيزنەستىڭ, بانك جانە قارجى قۇرىلىمدارىنىڭ, قىزمەت كورسەتۋ جانە كولىك سالاسىنىڭ جۇمىس فورماتى وزگەردى. كوروناۆيرۋس پاندەمياسى كەزەڭىندەگى شەكتەۋ شارالارى پارلامەنتتىڭ قىزمەتىنە دە ءوز ەرەكشەلىگىن ەنگىزدى», دەدى ءماجىلىس توراعاسى.
سونداي-اق ءماجىلىس توراعاسى قاڭتار وقيعاسى كەزىندە ەل پرەزيدەنتى مەملەكەتىمىزدى ساقتاۋ جولىندا دۇرىس ءارى بايىپتى قادام جاساعانىن ايتتى.
«قاڭتاردا ەلىمىز ۇلكەن قاتەردەن امان-ەسەن شىقتى. مۇنداي وقيعا مەملەكەتىمىزدىڭ جاڭا تاريحىندا بۇرىن سوڭدى بولماعان. سوعان ساي, دەر كەزىندە جانە جەدەل ارەكەت ەتۋ قاجەت بولدى. مەملەكەت باسشىسى قاسىم-جومارت كەمەل ۇلى توقاەۆتىڭ جىگەرلى شەشىمدەرى ەلدى تەرروريستىك سوققىدان امان الىپ شىعىپ, جاعدايدى قىسقا مەرزىم ىشىندە تۇراقتاندىردى. بۇل ءبىزدىڭ ەلىمىز بەن مەملەكەتىمىزدى ساقتاۋ جولىنداعى بىردەن-ءبىر دۇرىس ءارى بايىپتى قادام بولدى. وسىنداي كۇردەلى كەزەڭدە, مەملەكەت باسشىسى پارلامەنت قابىرعاسىندا قازاقستان حالقىنا جولداۋ جاساپ, اۋقىمدى ساياسي جاڭعىرتۋ باعدارلاماسىن ۇسىندى. ساياسي ترانسفورماتسيانىڭ نەگىزگى وزەگى – جاڭا ءارى ادىلەتتى قازاقستان قۇرۋ, بارلىق قازاقستاندىقتارعا بىردەي مۇمكىندىكتەر جاساۋ. ال وتكەن رەفەرەندۋمنىڭ قورىتىندىلارى قازاقستاندىقتاردىڭ باسىم كوپشىلىگىنىڭ پرەزيدەنتتىڭ ساياسي جاڭعىرتۋ باعدارلاماسىن قولدايتىنىن كورسەتتى», دەدى ەرلان قوشانوۆ.
