سپورت • 26 ماۋسىم، 2022

شاۆقات جەڭىسكە جەتتى

كەشە اقش-تىڭ لاس-ۆەگاس قالاسىندا ارالاس جەكپە-جەكتەن UFC پروموۋشەنىنىڭ كەزەكتى ءتۋرنيرى ءوتتى. اتالعان جارىستىڭ باستى باسەكەلەرىنىڭ بىرىندە كۇنى بۇگىنگە دەيىن جەڭىلىستىڭ كەرمەك ءدامىن تاتپاعان قازاقتىڭ قايسار ۇلى شاۆقات راحمونوۆ جارتىلاي ورتا سالماقتاعى ۇزدىكتەر تىزىمىندە توعىزىنشى ورىندا تۇرعان اقش-تىڭ بەلدى سپورتشىسى نيل مەگنيمەن ايقاستى.

عالىم سۇلەيمەن

بۇگىنگى تاڭدا ءبىزدىڭ عانا ەمەس، بارشا شەتەلدىك باق وكىلدەرى جارىسا ماقتاپ جاتقان شاۆقات راحمونوۆ بۇل جولى دا قازاق جانكۇيەرلەرىن قۋانىش پەن شاتتىققا بولەدى. بارلىعى 34 باسەكە وتكىزىپ، 26 مارتە جەڭىسكە جەتكەن 35 جاستاعى نيل مەگني قانداسىمىزعا لايىقتى قارسىلىق كورسەتە المادى. باسەكە باستالعان بەتتە تىزگىندى قولىنا العان شاۆقات وعان بىرنەشە اۋىر سوققىسىن دارىتتى. نيل ۇزىلىسكە دەيىن شىدادى. ەكىنشى راۋندتا دا ءدال سول جاعداي قايتالاندى. دەسەك تە بۇل جولى قازاق سپورتشىسى باسەكەنى ۇزاققا سوزبادى. ۇزىلىسكە ءۇش سەكۋند قالعاندا راحمونوۆ مەگنيدى قىلقىندىرىپ تاستادى. وسىلايشا، شاۆقات ءوزىنىڭ 16-شى جەڭىسىنە قول جەتكىزدى.

سول جارىستا جەڭىل سالماقتاعى سەرگەي موروزوۆ تا (17-5) وكتاگونعا شىقتى. بيىل جازدا 33 جاسقا تولعالى وتىرعان ول UFC-دەگى ءۇش باسەكەنىڭ ەكەۋىندە قارسىلاستارىنا جول بەردى. ەندى جەرلەسىمىزدىڭ جەڭىلۋگە قاقى جوق ەدى. وسى جولى موروزوۆ راۋليان پايۆامەن (21-4) كۇش سىناستى. 26 جاستاعى برازيليا وكىلىنىڭ وسىدان ەكى جىل بۇرىن ءبىزدىڭ جالعاس جۇماعۇلوۆتى ۇپاي سانىمەن ۇتقانى ەسىمىزدە. ءوزىنىڭ كوماندالىق ارىپتەسى جىبەرگەن ەسەنى سەرگەي قايتاردى. العاشقى راۋندتا برازيليالىقتىڭ باسىمدىعى بايقالعانىمەن، ودان كەيىن موروزوۆ تىزگىندى قولعا الىپ، ۇپاي سانىمەن جەڭىسكە جەتتى.

سونىمەن قاتار لاس-ۆەگاستا جارتىلاي جەڭىل سالماقتاعى سايران نۇردانبەك تە (37-10) سايىسقا شىقتى. قىتايدا تۋىپ-وسكەن قانداسىمىز امەريكالىق تي دجەي براۋنمەن (16-8) كۇش سىناستى. وتە تارتىستى وتكەن جەكپە-جەك سايراننىڭ پايداسىنا شەشىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز