توتەنشە جاعدايلار مينيسترلىگىنىڭ ءباسپاسوز قىزمەتىنەن ءمالىم ەتكەندەي, 23 ماۋسىم كۇنى ساعات 20.00-دە قورداي اۋدانى, ۇلكەن ءسۇلۋتور اۋىلىندا نوسەر جاڭبىر سالدارىنان ىرعايتى وزەنىنىڭ بويىمەن سەل تاسقىنى ءوتتى.
سالدارىنان اۋىل جولدارىن سۋ باستى. سونداي-اق جەكە تۇرعىن ۇيلەردىڭ 2 شارۋاشىلىق قۇرىلىسى قيرادى.
«قازا بولعاندار مەن زارداپ شەككەندەر جوق. الدىن الا مالىمەت بويىنشا, مال شىعىنى بار. جەرگىلىكتى اتقارۋشى ورگاننىڭ كوميسسياسى كەلگەن زالال مولشەرىن انىقتاپ جاتىر», دەدى ۆەدومستۆودان.
وقيعا ورنىنا توتەنشە جاعدايلار دەپارتامەنتىنەن 8 قىزمەتكەر, 2 تەحنيكا, جەرگىلىكتى اتقارۋ ورگاندارىنان 5 قىزمەتكەر جانە 2 تەحنيكا بارعان.
بۇدان بولەك, وسى كۇنى ساعات 23:25-تە قورداي اۋدانى, شارباقتى اۋىلىنان 4 شاقىرىم جەردە ىرعايتى وزەنىنىڭ دەڭگەيى كۇرت كوتەرىلىپ, ارناسىنان اسقان.
«وزەن جاعاسىندا 11 ادام دەمالىپ جاتقان. سۋدىڭ كوتەرىلۋ سالدارىنان اينالاسىن سۋ باسقان دوڭەس جەردە 6 ادام كولىك ىشىندە قالىپ قويدى. سونداي-اق ەكپىندى اعىس دەمالۋشىلاردىڭ ەكىنشى كولىگىن شايىپ كەتتى.
24 ماۋسىمدا ساعات 01:15-تە تجد قۇتقارۋشىلارى ارالدا قالعان بارلىق ادامدى قۇتقاردى. ولارعا مەديتسينالىق كومەك قاجەت بولمادى. قازا بولعاندار مەن زارداپ شەككەندەر جوق», دەدى قر تجم ءباسپاسوز قىزمەتىنەن.
