جۋىردا ءۇش جىل بويى پرەزيدەنت باستاماشىل بولعان ساياسي رەفورمالاردى ودان ءارى جۇزەگە اسىرۋعا اتسالىستى. ازاماتتىق قوعام وكىلدەرى, بەلسەندىلەر, دەپۋتاتتاردىڭ مۇرىندىق بولۋىمەن كەڭەس رەفورمالارعا قاتىستى ءوز ۇستانىمدارى مەن ۇسىنىستارىن وتكىزدى. ناتيجەسىندە, ساياسي پارتيالار, بەيبىت شەرۋلەر وتكىزۋ تۋرالى جانە باسقا دا الەۋمەتتىك ساياسي ماسەلەلەرگە بايلانىستى زاڭدارعا وزگەرىستەر ەنگىزىلدى. سونىمەن قاتار پرەزيدەنتتىڭ ساياسي رەفورمالارىنىڭ ءتورت پاكەتى جۇزەگە استى. بۇل ەلىمىزدەگى ساياسي ليبەراليزاتسيا مەن دەموكراتيالىق باستامالاردىڭ ىسكە اسۋىنا ءوز ۇلەسىن قوستى.
ۇلتتىق قۇرىلتايدىڭ قۇرىلۋىن ۇلتتىق قوعامدىق سەنىم كەڭەسى اياسىنىڭ كەڭەيۋى دەپ قابىلداعان ءجون. مۇندا پرەزيدەنت ەڭ الدىمەن, قوعامنىڭ ءار سالاسىنداعى بىلىكتى مامانداردى, عالىمدار, جۋرناليستەر, ازاماتتىق قوعام بەلسەندىلەرى, ايماقتارداعى قوعامدىق كەڭەس مۇشەلەرىن شاقىرۋ ارقىلى جالپىۇلتتىق ديالوگ الاڭىنا اينالدىرۋدى كوزدەدى. ەلىمىزدەگى ءتۇرلى سالادا قوردالانعان ماسەلەلەردى تالقىلاۋ الداعى ۋاقىتتا پرەزيدەنتتىڭ رەفەرەندۋمنان كەيىنگى ساياسي رەفورمالارىنىڭ ودان ءارى جالعاسىن تابۋىنا سەپتەسەدى.
ۇلتتىق قۇرىلتايدىڭ باستى ماقساتى – قوعامدىق سانانىڭ وزگەرۋى. يدەولوگيا ماسەلەسى دە نازاردان تىس قالماق ەمەس. سونداي-اق ۇلتتىق بىرەگەيلىكتى قالىپتاستىرۋداعى باستامالاردى تالقىلاۋعا ارنالعان جالپىۇلتتىق ورتالىققا اينالماق.
ءبىرىنشى وتىرىستا مەملەكەت باسشىسى ەلىمىزدەگى قانداي قۇندىلىقتاردى دارىپتەۋ كەرەك جانە قانداي باعىتتا جۇمىس ىستەۋ قاجەت دەگەن ماسەلەگە قاتىستى ءوز ويىن ورتاعا سالدى. اسىرەسە ەڭبەككە باۋلۋ, تاربيە ماسەلەسىنە نازار اۋدارىلدى. بۇل قۇرىلتايدىڭ جيىرماسىنشى عاسىردىڭ باسىنداعى الاش ارداقتىلارىنىڭ قۇرىلتايىمەن تاريحي ساباقتاستىعى بار ەكەنىن دە اتاپ ءوتتى.
الەۋمەتتىك ماسەلە قاي كەزدە دە ماڭىزدى بولعانىمەن, قازىرگى تاڭدا رۋحانيات ماسەلەسىنىڭ ءمانى زور ەكەنىن دە ۇمىتپاعان ءلازىم. سول تۇرعىدان الىپ قاراعاندا جاڭا پاراديگمالار, قوعامدىق سانا مەن قوعامدىق قۇندىلىقتاردىڭ جاڭا ءبىر تۇجىرىمداماسى قاجەت. وسىعان بايلانىستى تۇركىستاندا وتەتىن باسقوسۋدا ۇلتتىق قۇرىلتاي مۇشەلەرىنەن ناقتى ءبىر سالالار بويىنشا ۇسىنىستار ءتۇسۋى كەرەك. ناتيجەسىندە, ۇلتتىق بىرەگەيلىك پەن ۇلتتىق قۇندىلىقتاردى ودان ءارى قاراي دارىپتەۋ مەن دامىتۋدىڭ تىڭ باعدارى انىقتالۋعا ءتيىس.
قازبەك مايگەلدينوۆ,
«قازاقستاندىق قوعامدىق دامۋ ينستيتۋتىنىڭ» باسقارما توراعاسى,
ساياساتتانۋشى
