وسىناۋ القالى باسقوسۋدى بارشامىز اسىعا كۇتكەنىمىز بەلگىلى. ولاردىڭ قاتارىندا ۇكىمەتتىك ەمەس ۇيىم وكىلدەرى دە بار. ءبىر انىعى, ۇلتتىق قۇرىلتاي قازاقستاندىق قوعامدى ۇيىستىراتىن ورتالىققا اينالعانىن جان جۇرەگىمىزبەن سەزىندىك.
قاسىم-جومارت توقاەۆ القالى باسقوسۋدا جالپىۇلتتىق بىرلىكتى نىعايتۋ تۋراسىنداعى تولعامدى ويلارىن ورتاعا سالدى.
«دەموكراتيا دەگەنىمىز – كەرەمەت ءومىر تۋرالى جالپىلاما ۇعىم, تۇسىنىك ەمەس. بۇل – كۇندەلىكتى تىنىمسىز ەڭبەكتى تالاپ ەتەتىن وركەنيەتتى ءومىر سالتى. اتاققۇمارلار مەن الاياقتاردىڭ جالاڭ ۇرانى مەن قۇرعاق ۋادەسىنە الدانباۋ قاجەت. ەلىمىزدىڭ بولاشاعى ءۇشىن اسا ماڭىزدى ماسەلەلەردى داۋ-دامايمەن ەمەس, ۇتىمدى وي-پىكىرمەن, پاراساتتى پايىممەن جانە سانالى كوزقاراسپەن شەشكەنىمىز ابزال. ءبىز ء«تۇرلى كوزقاراس, ءبىرتۇتاس ۇلت» قاعيداتىن بەرىك ۇستانۋىمىز قاجەت. ءبىر-ءبىرىمىزدىڭ وي-پىكىرىمىزدى تىڭداپ, قۇرمەتتەي بىلسەك, العا قادام باسامىز» دەگەن پرەزيدەنت ءسوزى بارشامىزدىڭ كوڭىلىمىزگە قوندى.
ۇلتتىق قۇرىلتايدىڭ العاشقى وتىرىسىنا قاتىسا الماعان تالاي ازامات ءوز ويلارىن ايتىپ جاتىر. الداعى ۋاقىتتا ولار دا روتاتسيا ەرەجەسىنە سايكەس كەلەسى باسقوسۋلاردا بوي كورسەتۋى ابدەن مۇمكىن. مۇنىڭ بارلىعى دا كەزەڭ-كەزەڭىمەن ىسكە اسىرىلاتىن قادامدار ەكەنىنە ەشقانداي كۇمانىم جوق.
ۇلتتىق قۇرىلتايدا ءسوز العان بەلگىلى عالىم اسقار جۇمادىلداەۆتىڭ كوكەيكەستى ويلارى جۇرەگىمە جەتتى. اكادەميكتىڭ ءبىلىم مەن عىلىمدى وركەندەتۋ تۋرالى ايتقان ويلارى وزەكتى ەكەنىنە ەشقانداي تالاسىم جوق.
ء«سوز بەن ءىستىڭ ۇيلەسىمى, ادەپتىلىك, جاڭا ۇمتىلىس. وسى ۇشتاعان قاپەردە تۇرعانى ءجون. «جاڭا قازاقستان قۇرامىز» دەگەن ۇعىم دۇرىس بولدى. بىراق مەنىڭ پىكىرىمشە, «جاڭا قازاقستان» دەگەن ءسوز «ەسكى قازاقستاندى» تەرىستەۋ دەگەن ءسوز ەمەس.
«ەسكى قازاقستاندا» دا جاڭا نارسەلەر كوپ بولعان. سونىڭ جاقسىسىن الىپ, جاڭا سيپات بەرىپ, سول حالىقتىڭ يگىلىگىنە جۇمساۋ كەرەك», دەگەن عالىمنىڭ پىكىرى قولداۋعا ابدەن لايىق ەكەنى تالاس تۋدىرماسا كەرەك.
حالىق زور ءۇمىت ارتقان ۇلتتىق قۇرىلتايدىڭ جالپىحالىقتىق پلاتفورماعا اينالاتىنى دا قۋانتىپ وتىر. مەملەكەت باسشىسى وسىلايشا سىندارلى ديالوگ الاڭىن ورناتتى.
القالى باسقوسۋعا قازاقتىڭ قايماقتارى قاتىسقانى ءمالىم. الاشتىڭ ارداقتى اقىنى سۆەتقالي نۇرجاننىڭ ءسوزى دە جىگەرىمىزدى جانىعانى داۋسىز. كوكەيدەگى كوپ ويدى قوزعاعان اقىنعا ايتار العىس زور. سونداي-اق كۇللى قازاق حالقى قادىرلەيتىن بەلگىلى اقىن, كۇرەسكەر تۇلعا مۇحتار شاحانوۆتىڭ پرەزيدەنت قولىنان قازاقستاننىڭ ەڭبەك ەرى اتاعىن العانى وتە دۇرىس شەشىم بولدى. مۇنداي قادامنىڭ بارلىعى دا ءبىزدى قۋانتتى. جوعارىدا ايتقانىمداي, ەلىمىزدىڭ كەز كەلگەن ازاماتىنا ديالوگقا قاتىسۋعا, ءوز ۇسىنىستارىن ەنگىزۋگە, ءوز يدەيالارىن ايتۋعا مۇمكىندىك بەرەتىن Qurultay ءموبيلدى قوسىمشاسىن قۇرۋدى ۇسىنعانى دا دۇرىس قادام ەكەنى راس.
ۇلتتىق قۇرىلتاي بۇرىنعى دالا دەموكراتياسىنىڭ جالعاسىنا اينالدى. الداعى وتىرىستاردا دا ەلدىڭ كوكەيىندەگى ماسەلەلەر قوزعالىپ, ولاردىڭ شەشىم تابۋىنا مۇرىندىق بولار باستامالارمەن جالعاسىن تابادى دەگەن سەنىم مول.
بانۋ نۇرعازيەۆا,
قازاقستان ازاماتتىق اليانسىنىڭ پرەزيدەنتى
