2022 جىلعى 17 ماۋسىمدا قازاقستاننىڭ توراعالىعىمەن دۇنيەجۇزىلىك ساۋدا ۇيىمىنا مۇشە مەملەكەتتەر مينيسترلەرىنىڭ 12-كونفەرەنتسياسى ءوتتى. جيىن قورىتىندىسى بويىنشا حالىقارالىق ساۋدا سالاسىندا اسا ماڭىزدى شەشىمدەر توپتاماسى قابىلداندى. وسى رەتتە بىرقاتار كەلىسىم بويىنشا كەلىسسوزدەر ونداعان جىلعا سوزىلدى.
دسۇ-عا بار-جوعى جەتى جىل بۇرىن عانا كىرگەن قازاقستان – مينيسترلەر كونفەرەنتسياسىنا توراعالىق ەتكەن ەڭ جاس ەل. دسۇ-نىڭ جوعارى باسقارۋشى ورگانىن ۇيىمعا وسى ينستيتۋت قۇرىلعاننان كەيىن كىرگەن جانە تەڭىزگە شىعاتىن جولى جوق ەۋرازيا ايماعىنىڭ ەلى تاريحتا العاش رەت باسقاردى.
قازاقستاننىڭ تابىستى توراعالىق ەتۋىنە جوعارى دەڭگەيدەگى تۇراقتى بايلانىستار ىقپال ەتتى. جيىن بارىسىندا 12-كونفەرەنتسيانىڭ كۇن تارتىبىندەگى ماسەلەلەر مەن ونى دايىنداۋعا كوبىرەك كوڭىل ءبولىندى.
قازاقستان پرەزيدەنتى قاسىم-جومارت توقاەۆ دسۇ باس ديرەكتورى نگوزي وكوندجو-يۆەالامەن جۇرگىزگەن كەلىسسوز بارىسىندا قازاقستاننىڭ دسۇ اياسىنداعى ىنتىماقتاستىعىنىڭ ستراتەگيالىق ماڭىزىن جانە ەلىمىزدىڭ دسۇ كەلىسسوزدەر كۇن تارتىبىندەگى شەشىلمەگەن بارلىق ماسەلەنى رەتتەۋگە سىندارلى ۇلەس قوسۋعا ءازىر ەكەنىن بىرنەشە رەت اتاپ ءوتتى.
قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ اتالعان 12-كونفەرەنتسياعا توراعا بولدى.
دسۇ باس ديرەكتورى نگوزي وكوندجو-يۆەالا قازاقستاننىڭ توراعالىعىنا جوعارى باعا بەرىپ, كونفەرەنتسياعا دايىندىق اياسىنداعى جەمىستى ىنتىماقتاستىعى, سونداي-اق كوروناۆيرۋس پاندەمياسىنا بايلانىستى وسى جاھاندىق ءىس-شارانى نۇر-سۇلتاننان جەنەۆاعا اۋىستىرۋدى قوسا العاندا, ءتۇرلى سىن-قاتەرلەردى ەڭسەرۋدەگى شەبەرلىگى مەن ەپتىلىگى ءۇشىن ەلىمىزدىڭ باسشىلىعى مەن ۇكىمەتىنە ريزاشىلىعىن ءبىلدىردى.
كونفەرەنتسيا قورىتىندىسى بويىنشا دسۇ-عا مۇشە 164 ەلدىڭ ساۋدا مينيسترلەرى زاڭسىز, حابارلانبايتىن جانە رەتتەلمەيتىن بالىق كاسىپشىلىگىنە ىقپال ەتەتىن سۋبسيديالارعا تىيىم سالۋ تۋرالى تاريحي كەلىسىمدى قابىلدادى. بۇل كەلىسىم ازىق-ت ۇلىك قاۋىپسىزدىگى مەن جۇمىس ورىندارى تۇرعىسىنان بالىق اۋلاۋعا تاۋەلدى قوعامداستىقتار ءۇشىن تىرشىلىك ەتۋ قۇرالىن ساقتاۋ ماقساتىندا بالىقتى شامادان تىس اۋلاۋدى شەكتەۋگە باعىتتالعان.
دسۇ-عا مۇشە مەملەكەتتەر مينيسترلەرىنىڭ 12-كونفەرەنتسياسىندا قابىلدانعان قاۋىپسىز ءارى ءتيىمدى ۆاكتسينالاردى ءوندىرۋ, دامۋشى جانە ناشار دامىعان ەلدەرگە ۆاكتسينالار بەرۋدى كەڭەيتۋ جونىندەگى زياتكەرلىك مەنشىك قۇقىقتارىن شەكتەۋ مۇمكىندىگى تۋرالى شەشىم COVID-19 پاندەمياسىنىڭ الدىن الۋ, ونى ەمدەۋ نەمەسە تارالۋىن تەجەۋ ءۇشىن ۇلكەن ماڭىزعا يە.
ازىق-ت ۇلىك باعاسىنىڭ وسۋىنە بايلانىستى كەدەي ەلدەردىڭ حالقىن تاماق ونىمدەرىمەن قامتاماسىز ەتۋ ءۇشىن بۇۇ دۇنيەجۇزىلىك ازىق-ت ۇلىك باعدارلاماسى اياسىندا كورسەتىلەتىن ازىق-ت ۇلىك كومەگىن ەكسپورتتىق تىيىمداردان نەمەسە شەكتەۋلەردەن شىعارىپ الۋ تۋرالى شەشىم قابىلداندى.
مينيسترلەر كورسەتىلەتىن تسيفرلىق قىزمەتتەر مەن ونىمدەردى, اسىرەسە پاندەميا جانە ەكونوميكانى قالپىنا كەلتىرۋ كەزەڭىندە دامىتۋدىڭ ماڭىزدىلىعىن مويىنداي وتىرىپ, ەلەكتروندىق ساۋدا جونىندەگى جۇمىس باعدارلاماسىن ىسكە اسىرۋدى جالعاستىرۋعا جانە ەلەكتروندىق ترانزاكتسيالار كەزىندە كەدەندىك باجداردى الۋ ءموراتوريىن دسۇ-نىڭ كەلەسى مينيسترلىك كونفەرەنتسياسىنا دەيىن ۇزارتۋعا كەلىستى. بۇل شەشىم بيزنەس پەن تۇتىنۋشىلار ءۇشىن ايقىندىلىق پەن بولجامدىلىقتى قامتاماسىز ەتەدى, سونداي-اق تسيفرلىق ەكونوميكانى دامىتۋدىڭ ارتىقشىلىقتارىن كورسەتۋگە سەپتىگىن تيگىزەدى.
دسۇ باس ديرەكتورى مينيسترلەردىڭ 12-كونفەرەنتسياسىندا سويلەگەن قورىتىندى سوزىندە ساۋدا قازىرگى داعدارىستاردى شەشۋدىڭ ءبىر بولىگى ەكەنىن جانە قول جەتكىزىلگەن كەلىسىمدەر توپتاماسى دسۇ-عا مۇشە ەلدەردىڭ گەوساياسي جارىلىستاردى ەڭسەرۋ, الەم قوعامداستىعىنىڭ پروبلەمالارىنا دەن قويۋ, ەكولوگيالىق پروبلەمالاردى شەشۋ جانە اۋقىمدى الەۋمەتتىك-ەكونوميكالىق ينتەگراتسياعا جاردەمدەسۋ ءۇشىن بىرىگۋگە قابىلەتتى ەكەنىن اتاپ ءوتتى.
بۇرىن-سوڭدى بولماعان شەشىمدەر سانى دسۇ-عا مۇشە مەملەكەتتەر مينيسترلەرىنىڭ 12-كونفەرەنتسياسىنىڭ ەرەكشەلىگى بولىپ تابىلادى. بۇل دسۇ-نىڭ حالىقارالىق ساۋدا قاعيدالارىن ازىرلەۋ جانە رەتتەۋ جونىندەگى جالعىز كوپجاقتى الاڭ بولىپ قالا بەرەتىنىن, سونداي-اق اسا وزەكتى جاھاندىق پروبلەمالاردى شەشۋدە ماڭىزدى ءرول اتقاراتىنىن بىلدىرەدى.
