مەملەكەت ادامداردىڭ دەنساۋلىعىنا ۇنەمى الاڭداۋشىلىق تانىتىپ, مەديتسينالىق كومەكتىڭ قولجەتىمدى بولۋىن باستى ورىنعا قويىپ كەلەدى. ونىڭ ءبىر كورىنىسىن وڭىردەگى مەديتسينا نىساندارىن جاڭعىرتۋ مەن جاڭادان سالۋ ىسىنەن كورۋگە بولادى. مىسالعا, جەتىسۋ وبلىسىندا رەسپۋبليكالىق بيۋدجەت ەسەبىنەن كەربۇلاق اۋدانى سارىوزەك اۋىلىندا 250 ورىندى ەمحانانىڭ قۇرىلىسى جۇرگىزىلۋدە. جالپى, بيىل دەنساۋلىق ساقتاۋدىڭ 7 نىسانى سالىنا باستادى. سونىڭ بەسەۋى وسى جىلى ىسكە قوسىلۋعا ءتيىس, 2 نىساننىڭ قۇرىلىسى كەلەسى جىلى جالعاسادى. سول سياقتى قاراتال اۋداندىق ورتالىق اۋرۋحانانىڭ «ب» بلوگىنىڭ كۇردەلى جوندەۋىن اياقتاۋعا جانە اۋرۋحانا اۋماعىن اباتتاندىرۋعا, سونداي-اق سارقان اۋدانى چەركاسسك اۋىلىنداعى دارىگەرلىك امبۋلاتوريانىڭ كۇردەلى جوندەۋىن باستاۋعا قارجى ءبولىندى. ال بۇگىندە جەتىسۋ وبلىسىندا 29 اۋرۋحانا, 278 امبۋلاتوريالىق ەمحانا جۇمىس ىستەپ تۇر ەكەن.
ايماقتا اق جەلەڭدى ابزال جانداردىڭ ەڭبەگىنە دەگەن قۇرمەت تە ەرەكشە. كۇنى كەشە «2022 جىلدىڭ ۇزدىك مەديتسينالىق قىزمەتكەرى» بايقاۋىنىڭ جەڭىمپازدارى ماراپاتتالدى. وبلىس كولەمىندە وتكىزىلگەن بايقاۋدا «ەمحانانىڭ ۇزدىك دارىگەرى» اتانعان ەسكەلدى ورتالىق اۋداندىق اۋرۋحاناسىنىڭ دارىگەرى بيجامال كۇلبەكوۆاعا جەتىسۋ وبلىسىنىڭ اكىمى بەيبىت يساباەۆ 7 ملن تەڭگەنىڭ سەرتيفيكاتى مەن ارنايى ديپلوم تاپسىردى.
– الەمدى جايلاعان كوروناۆيرۋس ىندەتىمەن كۇرەستە دارىگەرلەر ۋاقىتپەن ساناسپاي, ەرەكشە قاجىر-قايرات تانىتتى. سىن ساعاتتا مەملەكەت بارلىق قاجەتتى شارالاردى قابىلدادى. وسىنداي ورتاق كۇش جۇمىلدىرۋدىڭ ناتيجەسىندە ىندەتتىڭ بەتى قايتتى. دەگەنمەن بۇل سالادا اتقارىلاتىن شارۋا ءالى دە كوپ. سولاردىڭ قاتارىندا انا مەن بالا ءومىرىن قورعاۋ, مامانداردىڭ بىلىكتىلىگىن ارتتىرۋ, ماتەريالدىق-تەحنيكالىق بازانى نىعايتۋ, وزىق تەحنولوگيالار ەنگىزۋ سياقتى كوپتەگەن ماسەلە تۇر, – دەدى جەتىسۋ وبلىسىنىڭ اكىمى بەيبىت يساباەۆ ءوڭىر مەديتسيناسىن دامىتۋداعى الدا تۇرعان مىندەتتەرگە قىسقاشا توقتالا كەلە.
سونداي-اق وبلىس اكىمى مەديتسينا قىزمەتكەرلەرىنىڭ كاسىبي مەرەكەسىنە وراي بىرقاتار اق جەلەڭدى ابزال جاندى قۇتتىقتاپ, ماراپاتتادى. ولاردىڭ قاتارىندا وبلىستىڭ مەديتسينا قىزمەتكەرلەرى اراسىندا وتكىزىلگەن «2022 جىلدىڭ ۇزدىك مەديتسينالىق قىزمەتكەرى» بايقاۋىندا «دەنساۋلىق ساقتاۋ سالاسىنىڭ ۇزدىك مەنەدجەرى» اتالىمى بويىنشا وزىپ شىققان وبلىستىق كارديولوگيالىق ورتالىق ديرەكتورىنىڭ ورىنباسارى اسقار شورماقوۆ, «ۇزدىك فارماتسەۆت» اتانعان وبلىستىق كوپسالالى اۋرۋحانانىڭ فارماتسەۆتى ماحاببات بوداۋوۆا, «ۇزدىك مەيىربيكە» اتاعىن يەلەنگەن پانفيلوۆ اۋدانارالىق كوپسالالى اۋرۋحاناسىنىڭ مەيىربيكەسى ايجان ايماقوۆا, «ۇزدىك فەلدشەر» بولىپ تانىلعان الاكول ورتالىق اۋداندىق اۋرۋحاناسىنىڭ فەلدشەرى نۇرلان ۋاليەۆ سياقتى مەديتسينا قىزمەتكەرلەرى بار. ال وبلىستىق جۇقپالى اۋرۋحانالار اۋرۋحاناسى «ۇزدىك مەديتسينالىق مەكەمە» اتاندى. جەڭمپازدارعا 1,5 ملن تەڭگەدەن باستاپ, 7 ملن تەڭگەگە دەيىن اقشالاي سىيلىقتار بەرىلدى. مۇنان بولەك بىرقاتار دارىگەر جەتىسۋ وبلىسى اكىمىنىڭ قۇرمەت گراموتاسىمەن, العىسحاتىمەن جانە دەنساۋلىق ساقتاۋ مينيسترلىگىنىڭ «ەڭبەك ارداگەرى» مەدالىمەن جانە «دەنساۋلىق ساقتاۋ ءىسىنىڭ ۇزدىگى» توسبەلگىسىمەن ماراپاتتالدى.
جەتىسۋ وبلىسى
