قاسكويلەر ءموبيلدى قوسىمشالار, سايتتار مەن جارنامالىق روليكتەر جاساۋعا بەيىمدەلىپ العان. ولاردىڭ مازمۇنى جەكە تۇلعالاردىڭ قاراجاتىن باسقارۋعا تارتۋ سەكىلدى باعدارلامالاردى سيپاتتايدى جانە ونى ەكىنشى دەڭگەيلى بانكتەرمەن, قۇب-پەن نەمەسە باسقا دا مەملەكەتتىك ورگاندارمەن بىرلەسىپ ازىرلەنگەن دەپ كورسەتەدى. مۇنداي جارنامالار – فەيك.
«انىقتالعان الاياقتىق پيعىلداعى رەسۋرستار مەن تەلەفون قوسىمشالارى قازاقستاننىڭ «مەملەكەتتىك قورىنان», «ۇلتتىق رەسۋرستاردان» نەمەسە قارجى نارىعىن ديناميكالىق بولجاۋدان تەز پايدا تابۋدى ۇسىنادى, الايدا, مۇنداي مۇمكىندىكتەر تەك تولەم جاساعان قولدانۋشىعا عانا بەرىلەدى. سونداي سايتتارعا ءوتىنىش قالدىرعان ينتەرنەت-قولدانۋشىلار اقشاسىنان ايىرىلاتىنداي تاۋەكەلگە بارادى: الاياقتار الدىمەن ونىڭ جەكە دەرەكتەرىن قولعا تۇسىرەدى, ءسويتىپ تەلەفون ارقىلى حابارلاسىپ, اقشانى ءوز رەكۆيزيتتەرىنە اۋدارتىپ الۋعا ارەكەت ەتەدى. ءارى قاراي, اقشا اۋدارىلعاننان كەيىن ونى كەرى قايتارۋ پروتسەدۋراسى ۇزاق تا كۇردەلى بولۋى مۇمكىن. سويتە تۇرا سالىنعان قاراجاتتى كەرى قايتارۋ ءۇشىن قوسىمشا اقشا سالۋعا قولدانۋشىنى تاعى ماجبۇرلەۋى ىقتيمال», دەپ ءتۇسىندىردى ۇلتتىق بانك.
سونداي-اق ۇلتتىق بانك جەكە تۇلعالاردىڭ شوتتارىنا قىزمەت كورسەتپەيتىنىن, اقشالاي ەسەپ ايىرىسۋلار مەن مامىلەلەر جاسامايتىنىن, مەملەكەتتىك قورلاردا تابىس تابۋ ءۇشىن قانداي دا ءبىر پلاتفورمالار ازىرلەۋگە قاتىسپايتىنىن ايتتى.
وسىنداي سايتتارعا, ءموبيلدى قوسىمشالارعا تاپ بولعاندار نەمەسە تەلەفون-الاياقتارىنىڭ قۇربانى بولعاندار – الاياقتىق فاكتىسى بويىنشا قۇقىق قورعاۋ ورگاندارىنا ارىزبەن جۇگىنۋى قاجەت.
وعان قوسا, ۇلتتىق بانكتىڭ رەسمي بايلانىس ورتالىعىنا 1477 قىسقا ءنومىرى ارقىلى حابارلاسۋعا بولادى.
ايانا توعانبەك
