كەزىندە تاريحىمىزدا ەل باسىنا كۇن تۋعان زاماندا ەلدىڭ بەتكە ۇستار ازاماتتارى جينالىپ, قۇرىلتايدا ەلدە تۋىنداعان ماسەلەلەردى كوتەرىپ, دەر كەزىندە شەشىپ وتىرعان. سوندىقتان دا بۇل دالا دەموكراتياسىنا جاتاتىن قازاققا جاقىن دۇنيەلەردىڭ ءبىرى.
قازىرگى قۇرىلىپ جاتقان قۇرىلتايدىڭ جاۋاپكەرشىلىگى وراسان, ودان حالىقتىڭ كۇتىپ وتىرعان ءۇمىتى دە زور. بۇگىنگى تاڭدا الەمدەگى گەوساياسي جاعداي دا كۇردەلى. مەملەكەتىمىزدە «ەكىنشى رەسپۋبليكا», «جاڭا قازاقستان» ۇعىمدارى پايدا بولىپ, رەفورمالار ءجۇرىپ جاتىر. وسىنداي كەزەڭدە ەلدى تولعاندىرعان ماسەلەلەر قۇرىلتايدا ەلگە تانىمال تۇلعالارمەن كوتەرىلىپ, شەشىلگەنى – بىرلىگىمىزدى ارتتىراتىن دۇرىس باعىتتاردىڭ ءبىرى. قۇرىلتاي قۇرامىنا ەنگەن تۇلعالاردىڭ ءتىزىمىن قاراساڭىز, ءارتۇرلى سالانىڭ وكىلدەرى بار, عالىمدار دا, دەپۋتاتتار دا, جاس ساياساتتانۋشىلار دا, قوعام بەلسەندىلەرى دە, جالپى ەلگە تانىمال ادامدار وسى قۇرىلتايعا مۇشە بولدى. وسى جەردە ەلىمىزدى تولعاندىرىپ جۇرگەن ماسەلەلەردىڭ بارلىعى قۇرىلتايدا كوتەرىلىپ, ناقتى شەشۋ جولدارى ۇسىنىلىپ, ۇكىمەتپەن تىعىز جۇمىس ىستەپ, ولار تاراپىنان ءتيىستى ءىس-شارالار قابىلداناتىن, تۇيتكىلدى ماسەلەلەر شەشىلەتىن ءبىر قۇرىلىم بولارى ءسوزسىز.
مەملەكەت باسشىسىنىڭ باستاماسىمەن قۇرىلعاننان كەيىن ۇلتتىق قۇرىلتايدىڭ قازاقستان زاڭدارىنىڭ شەڭبەرىندە ناقتى ارەكەت ەتەتىن مۇمكىندىكتەرى پايدا بولادى. قۇرىلتايدا قازىرگى كەزدەگى ەكونوميكالىق ماسەلەلەر, قوعامدىق ۇيلەسىم, جاڭا قازاقستان قاي باعىتتا دامۋى كەرەك, ەلىمىزدەگى الەۋمەتتىك ماسەلەلەر قاراستىرىلىپ, پرەزيدەنت جانىنداعى كونسۋلتاتيۆتىك-كەڭەسشى ورگان قازاقستاننىڭ ۇزاقمەرزىمدى دامۋ پەرسپەكتيۆالارىن انىقتايتىن قۇرىلىمعا اينالادى دەپ سەنەمىن.
باۋىرجان سەرىكباەۆ,
ساياساتتانۋشى
