سۋرەتتى تۇسىرگەن ەرلان ومار, «ەQ»
بۇگىن ۇلىتاۋدا باس قوساتىن تاريحي قۇرىلتايدا دا قازاق بولىپ قامدانۋدىڭ ءبىر قامى قولعا الىنىپ جاتىر. بۇل دا – تۇپتەپ كەلگەندە الاشتىقتار اڭساعان ۇلتتىق مەملەكەت قۇرۋعا جاسالعان قادامنىڭ, ۇلت مۇددەسىن بەكەمدەتە تۇسەر العىشارتتاردىڭ ءبىرى.
ەل پرەزيدەنتى ۇلتتىق قۇرىلتاي قۇرۋ تۋرالى جارلىققا قول قويىپ, ونىڭ ەرەجەسى مەن قۇرامىن بەكىتتى. قۇرىلتايدىڭ قۇرامىنا ەركىن ويلى, تاۋەلسىز, ايتارى بار ازاماتتار ەندى. ەڭ باستىسى, بۇقارا مەن بيلىك اراسىندا ديالوگ ورناتۋدىڭ ءتيىمدى تەتىگى وڭ جولعا قويىلدى. ەندىگى مىندەت – ۇلت بولىپ ۇيىسۋدىڭ جولىن انىقتاۋ, ەل تاعدىر تارازىسىنىڭ قاي باعىتقا بەت العانىن ساراپتاپ, وڭ جولىن كورسەتۋ. ال تۇتاس ءبىر مەملەكەتتىڭ تاعدىر تارازىسىنىڭ قايدا قاراپ اۋاتىنى بيلىك باسىندا وتىرعان ازاماتتار مەن حالىق تاعدىرىنا جاۋاپتى تۇلعالاردىڭ تاعدىرشەشتى ماسەلەنى قالاي تارقاتارىنا بايلانىستى.
ۇلتتىق قۇرىلتاي ەلدىك ىستە بىرلىگى بەكەم, ىرگەسى اجىرامايتىن ءبۇتىن ءبىر قۇرىلىمعا اينالا الا ما؟ شىنى كەرەك, بايراقتى باستامانىڭ باسى-قاسىنان تابىلعان ۇلتجاندى ازاماتتاردىڭ, ەلدىڭ مۇڭ-مۇقتاجى مەن حالىقتىڭ ماسەلەسىن جەتكىزىپ جۇرگەن تۇلعالاردىڭ اتى-ءجونىن وقىعاننان كەيىن بۇل سۇراققا دا جاۋاپ تابىلعانداي بولدى.
ۇلتتىق قۇرىلتايدىڭ العاشقى جيىنى قازاق ءۇشىن قاسيەتتى مەكەن – ۇلىتاۋدان باستاۋ الۋىنىڭ ءوزى كوڭىلگە سەنىم ۇيالاتادى. بىلە بىلگەنگە بۇل دا ۇلكەن جاقسىلىقتىڭ بەلگىسىندەي. ۋاقىت تالابى مەن كۇن تارتىبىنە قويىلعان سۇراقتارعا وراي قۇرىلتاي قۇرامى وزگەرىپ تۇراتىنى – دۇرىس ءۇردىس. ونىڭ ۇستىنە قاراپايىم جۇرت قۇرىلتايعا دەگەن ۇسىنىس-تىلەگىن جولداي الاتىن ارنايى ونلاين-پلاتفورما قۇرىلاتىنى – قوعامداعى وزەكتى ماسەلەنىڭ ەشقايسىسى قالتارىستا قالمايدى دەگەندى بىلدىرەدى.
مەملەكەت باسشىسى رەفەرەندۋم قورىتىندىسى بويىنشا قازاقستان حالقىنا جاساعان ۇندەۋىندە ۇلتتىق قۇرىلتاي قۇرۋ تۋرالى باستاما كوتەرىپ, وسىلايشا ازاماتتاردىڭ مەملەكەت ىسىنە اتسالىسۋ مۇمكىندىگى ارتا تۇسەتىنىن ايتقان ەدى. «شىن مانىندە, ەلىمىزدىڭ تاعدىرى – ارقايسىمىزدىڭ قولىمىزدا», دەدى بۇل جونىندە پرەزيدەنت. ال قۇرىلتايدا «جالپىۇلتتىق قۇندىلىقتاردى نىعايتا وتىرىپ, قوعامدى ودان ءارى ۇيىستىرۋعا باعىتتالعان ۇزاقمەرزىمدى ماسەلەلەر تالقىلاناتىنىن» ەسكەرەتىن بولساق, بۇل ماڭىزدى قادامدا دا جاڭا قازاقستاننىڭ ىرگەتاسى قالانىپ جاتقانىنىڭ تاعى ءبىر دالەلى بولار.
ءسوز باسىندا الاش ارىستارىنىڭ قازاق قوعامىن ۇيىمداستىرىپ, سوڭىنان ەرتىپ, مەملەكەتتىك يدەيا تاراتۋدى قۇرىلتاي ارقىلى ىسكە اسىرعىسى كەلگەنىن ايتتىق. تاريحتا قازاق جەرىندە 60-تان استام قۇرىلتاي وتكەنى بەلگىلى. ءار قۇرىلتايدا الاشتىقتاردىڭ جانكەشتىلىگى جاتىر. حالىقتى بىرلىككە باستاعان ءار جيىننىڭ ارقالاعان جۇگى بار. ونىڭ ەڭ باستىسى – ەل بولاشاعىن جارقىن ەتۋ, حالىقتىڭ ءوسىپ-وركەندەۋىنە سەپ بولۋ. ەندەشە ۇلىتاۋدان باستاۋ العان بۇل ۇلتتىق قۇرىلتاي ەل تاعدىرىنا ىقپال ەتەر جيىنعا اينالسىن دەپ تىلەيمىز.
