قازاقستاندىق پالۋان رۋسلان قاليەۆ ازيا چەمپيونى اتاندى

استانا. 23 ءساۋىر. قازاقستاندىق ەركىن كۇرەس شەبەرى رۋسلان قاليەۆ بۇگىن استانادا باستالعان ازيا چەمپيوناتىندا التىن مەدال جەڭىپ الدى. بۇل تۋرالى egemeni.kz ءتىلشىسى حابارلادى. قۇرلىق بىرىنشىلىگىندە رۋسلان قاليەۆ 57 كيلوعا دەيىنگى سالماقتا كىلەمگە شىقتى. ول فينالدا ءوزى سەكىلدى جاستار اراسىنداعى الەم چەمپيوناتىنىڭ قولا جۇلدەگەرى بولىپ تابىلاتىن موڭعول دامديربازار سونگباحتىرمەن كەزدەستى. بەلدەسۋ العاشقى مينۋتتاردان تارتىستى باستالدى. قازاق پالۋانى ءوزىنىڭ العاشقى شابۋىلدارىنىڭ بىرىندە قارسى ادىسكە ءتۇسىپ قالدى - 0:2. بۇدان ءارى رۋسلان 1 ۇپاي الا الدى. بىراق قارسىلاسى دا قاراپ قالمادى. ءسويتىپ, ەسەپ ءبىرىنشى كەزەڭدە 3:1 بولىپ توقتادى. ۇزىلىستەن كەيىن ءبىزدىڭ پالۋان بەلسەندىلىكتى ارتتىرا ءتۇستى. سونىڭ ناتيجەسىندە ول ەسەپتى تەڭەستىرىپ قويا سالماي, ودان دا ارى كەتتى – 5:3. بۇدان ءارى قاليەۆ باسىمدىعىن ۇلعايتا وتىرىپ, سوڭعى ساتتە 10:4 دەگەن ەسەپكە قول جەتكىزدى. ەسكە سالا كەتەيىك, ازيا چەمپيوناتىن استانادا بۇگىن, 23 ءساۋىر كۇنى باستالدى. جالپى, 5 كۇننىڭ ىشىندە مۇندا ەركىن كۇرەس, گرەك-ريم كۇرەسى جانە ايەلدەر كۇرەسى شەبەرلەرى 24 مەدالدار جيىنتىعىن ساراپقا سالادى. دامير قوجامقۇل. دەرەككوز: egemeni..kz. فوتو: vesti.kz.